Баранавічы адгароджваюцца пастамі ДАІ: з тэмпэратурай у горад ня пусьцяць
25–28 красавіка на ўезьдзе ў Баранавічы будуць дзяжурыць пасты ДАІ з мэдыкамі і правяраць стан здароўя людзей, якія едуць у горад.
Хворых на вострыя рэсьпіраторныя інфэкцыі і кантактаў першага і другога ўзроўняў з хворымі на каранавірус у горад ня пусьцяць, паведаміў Баранавіцкі гарвыканкам у афіцыйным Telegram-канале.
Ва ўмовах пандэміі бізнэс ідзе на звальненьні, зьніжэньне заробкаў, няпоўны працоўны дзень. Вынікі апытаньня
Ва ўмовах пандэміі ключавыя праблемы для беларускага бізнэсу — падзеньне выручкі і захаваньне ранейшых ставак арэнднай платы, вынікае з апытаньня, якое правёў Беларускі эканамічны дасьледча-адукацыйны цэнтар (BEROC) сумесна зь Бізнэс-школай ІПМ. Усяго апыталі 143 прадпрымальнікаў.
Паводле прадстаўнікоў бізнэсу, найбольш значныя праблемы зьвязаныя:
- з рэзкім скарачэньнем попыту на ўнутраным рынку (78,3% рэспандэнтаў),
- з арэнднай платай і падаткамі, памеры якіх засталіся бязь зьменаў (на гэта ўказалі 57,3%).
- Усё больш бізнэсаў сутыкаецца з праблемай ліквіднасьці
- і ростам дэбіторскай запазычанасьці.
Цалкам чытайце па спасылцы.
«Кіраўніцтва папрасіла напісаць заяву». Як беларусы трацяць працу з прычыны пандэміі
Праз эпідэмію каранавірусу эканамічны крызіс прыйшоў у многія сфэры эканомікі. Свабода распытала людзей, якія страцілі частку заробку і нават працу.
Супрацоўніца турыстычнай фірмы, таксіст, работнік «Белмастацккерамікі» і дрэсіроўшчыца сабак распавядаюць, як засталіся бяз грошай праз эпідэмію і што робяць цяпер. Чытайце па спасылцы>>
Мастакі правялі аўкцыён «Дзякуй», грошы за карціны пойдуць мэдыкам
15 — 22 красавіка на пляцоўцы «Куфар» прайшоў дабрачынны аўкцыён «Дзякуй», на які выставілі свае работы больш за 100 сучасных беларускіх мастакоў.
Цэны стартавалі ад 10 рублёў. Сума дапамогі, якую змогуць атрымаць беларускія лекары па выніках дабрачыннага аўкцыёну, перавысіць 37 тысяч рублёў. Атрыманыя сродкі будуць адрасна накіраваныя ў дапамогу мэдыкам. Падрабязна чытайце тут.
«Кідацца такімі словамі — блюзьнерства». Удава памерлага ад COVID-19 адказала Лукашэнку
Удава памерлага ад новага каранавірусу Эдуарда Ціхамірава зьвярнулася да Tut.by і выказалася пра словы Лукашэнкі пра тое, што ў Беларусі «ніхто не памірае ад каранавірусу»:
«Мяне проста калоціць, калі я чытаю заявы, што ў Беларусі ніхто не памёр і не памрэ ад каранавірусу. Як кіраўнік дзяржавы можа так казаць, бо ён фактычна гарантуе гэта! Але мой муж памёр!
Кідацца такімі словамі — гэта проста блюзьнерства. Людзі слухаюць гэта і вераць! Мы цяпер з сынам на самаізаляцыі, сябры прывозяць нам прадукты пад дзьверы, але я ж бачу ў акно, як па-ранейшаму людзі ходзяць бяз масак, пры сустрэчы вітаюцца за руку і абдымаюцца. Яны не разумеюць, як гэта небясьпечна. Я нават уявіць не магла, што гэтая бяда закране маю сям'ю, што гэта заб'е майго каханага мужа, бо ён нават не хварэў», — кажа ўдава памерлага Тацяна. Цалкам чытайце тут.
Як інтэрнэт-махляры карыстаюцца пандэміяй
Нацыянальны цэнтар рэагаваньня на кампутарныя інцыдэнты распаўсюдзіў заяву аб «шматлікіх» выпадках эксплюатацыі зламысьнікамі тэмы каранавіруснай пандэміі.
Паводле цэнтру, самы распаўсюджаны спосаб махлярства — «фішынгавыя» лісты, у якіх нібыта прапануюць купіць мэдычныя маскі, ахвяраваць грошы на барацьбу з хваробай, паглядзець мапу распаўсюду вірусу і гэтак далей. На самой справе такія лісты правакуюць карыстальніка адкрыць шкодны файл (а шкодная праграма можа быць нават у DOC- або PDF-файле) або ўвесьці свае паролі ад папулярных сэрвісаў.
Карыстальнікаў заклікаюць сьцерагчыся лістоў, у якіх просяць перайсьці па спасылцы або адкрыць укладзены файл, а таксама лістоў ад людзей і арганізацыяў, якія вам звычайна ня пішуць.
Чытайце таксама: 7 правілаў інтэрнэту, якія мы ігнаруем >>
Сем патрабаваньняў да Міністэрства здароўя ад кампаніі «Гавары праўду». Ідзе збор подпісаў
У сеціве зьбіраюць подпісы з патрабаваньнем ад Міністэрства аховы здароўя даваць праўдзівую інфармацыю пра сытуацыю з каранавірусам у Беларусі, а ад уладаў — не забараняць лекарам гаварыць пра тое, што адбываецца ў лякарнях, і дазволіць мэдустановам прымаць спонсарскую дапамогу без абмежаваньняў і перасьледу з боку пракуратуры. Падрабязьней чытайце па спасылцы, пэтыцыю можна папісаць тут.
Беларуская чыгунка падоўжыла дзеяньне «супрацькаранавіруснай» схемы рассаджваньня пасажыраў да канца траўня
Тэрмін дзеяньня новай схемы рассаджваньня ў цягніках, накіраванай на «прафіляктыку распаўсюду вірусных інфэкцый сярод пасажыраў», падоўжылі да 31 траўня, паведамляе прэс-цэнтар БЧ.
Паводле яе, у купэйных вагонах — ня больш за 2 пасажыры ў купэ, у пляцкартных — ня больш за 3 у адным адсеку. У вагонах зь месцамі для сядзеньня схема рассаджваньня пасажыраў залежыць ад іх канфігурацыі — 2 + 2 ці 3 + 2: у двухмесным шэрагу пасажыр займае месца ля акна, у трохмесным — адзін пасажыр каля акна, а другі — празь месца ля праходу (сярэдні шэраг застаецца вольным).
Наглядна: каравірус у сьвеце 24 красавіка
Паводле стану на 24 красавіка праз каранавірус у сьвеце памерлі 190 978 чалавек, больш як 745 000 чалавек паправіліся.
Каранавірус як рэванш дзяржаўнай эканомікі. Разважае Віталь Цыганкоў
Усе апошнія гады прадстаўнікі бюджэтнай сфэры ў Беларусі атрымлівалі заробак, меншы за сярэднестатыстычны. Звычайна гэтая лічба не дасягала 80% ад заробку ў эканоміцы ў цэлым. І хаця Лукашэнка заяўляў, што трэба даходы бюджэтнікаў давесьці да сярэдніх па краіне, гэтага ніяк не атрымлівалася.
Каранавірус кардынальна мяняе сытуацыю. Што б там ні было з эканомікай і крызісам, але бюджэтнікі свае заробкі атрымаюць. Нават калі зьнізяцца агульныя паступленьні падаткаў у бюджэт, не ўяўляю сытуацыі, каб кіраўніцтва, асабліва ў год выбараў, дапусьціла намінальнае зьніжэньне заробкаў работнікаў бюджэтнай сфэры.
Прыватны бізнэс банкрутуе, а ўсё дзяржаўнае застаецца выспай пэўнай фінансавай стабільнасьці. Такі падарунак для кіраўніка дзяржавы, які ўсю сваю палітыку будуе на дзяржаўным патэрналізьме, супрацьдзеяньні прыватызацыі і эканамічным рэформам, недаверы да «прыватніка»!
Хакеісты каманды Лукашэнкі здалі тэст на COVID-19
Гульцы хакейнай каманды Аляксандра Лукашэнкі здалі тэст на новы каранавірус пасьля таго, як заразіўся форвард каманды Дзьмітры Мялешка, піша «Прессбол».
Паводле выданьня, «першыя адмоўныя вынікі ўжо атрымалі». Ці ёсьць новыя станоўчыя вынікі, не паведамляецца. Але хакеістам параілі заставацца дома ў бліжэйшы час.
Апошнюю гульню каманда правяла 11 красавіка — тады яна 11-ы раз выйграла турнір на прызы Прэзыдэнцкага спартовага клюбу, на лёд выходзілі ў тым ліку Аляксандар і Мікалай Лукашэнкі, Дзьмітры Мялешка.
«Мяне бянтэжыць пошук праз сацсеткі». Распыталі ў экспэрта, як лячыць пераліваньнем плязмы пацыентаў з COVID-19
У Беларусі хворым на каранавірус пачалі пераліваць плязму. Дырэктар РНПЦ трансфузіялёгіі і мэдычных біятэхналёгій Фёдар Карпенка паведаміў, што на сёньня 20 донараў, якія выздаравелі, ужо здалі сваю плязму. Шасьцёра інфікаваных атрымалі па некалькі данацый плязмы.
Свабода даведалася, як працуюць антыцелы ў тых, хто перахварэў; ці ўсе, хто выздаравеў, могуць стаць донарамі, а хто інфікаваны — рэцыпіентамі; чаму плязму ня возьмуць у тых, хто меў пнэўманію.
Google: У Беларусі сталі на чвэрць менш хадзіць на працу і езьдзіць на транспарце. «Яндэкс»: у самаізаляцыі сталі сядзець менш
Сэрвіс Google Maps працягвае публікаваць дэталёвы аналіз паводзінаў карыстальнікаў падчас пандэміі каранавірусу. Новая справаздача ёсьць і пра Беларусь. Паводле Google, па стане на 17 красавіка беларусы, калі параўноўваць са «звычайнымі паводзінамі» да пандэміі каранавірусу, сталі:
- на 21% менш хадзіць у рэстарацыі, кавярні, забаўляльныя цэнтры, музэі, кінатэатры і бібліятэкі;
- на 5% больш хадзіць у крамы, на кірмашы і ў аптэкі;
- на 3% менш хадзіць у паркі і сквэры;
- на 26% менш карыстацца грамадзкім транспартам;
- на 27% менш знаходзіцца на працоўных месцах;
- на 10% больш знаходзіцца дома.
Тыдзень таму ў аналягічнай справаздачы падзеньне наведваньня рэстарацыяў і забаўляльных установаў было большым (–31%), але транспарт і працоўныя месцы былі прыблізна ў тых жа значэньнях (–27% і –22%), крамы і аптэкі былі ня ў плюсе, а ў мінусе (–7%), а паркі — наадварот у плюсе (+5%).
Расейская кампанія «Яндэкс» штодзень абнаўляе дасьледаваньне аб самаізаляцыі людзей у Расеі і краінах СНД, у тым ліку Беларусі, і «мапу самаізаляцыі». Гарадам выстаўляюцца балы ад 0 (як у час пік у звычайны дзень) да 5 (на вуліцах нікога).
Сярэдні «бал за самаізаляцыю» па днях на бягучым тыдні ніжэй, чым на мінулым, у шматлікіх гарадах Беларусі. Так, у Менску на мінулым тыдні гэты бал вагаўся між 1,9 і 2,1 у працоўныя дні, на бягучым упаў да 1,7 сярэднедзённага бала на 23 красавіка — да ўзроўню пачатку месяца. Менск разам з Магілёвам, дзе лічбы прыблізна тыя ж, цяпер найменш «самаізаляваныя» ў рэйтынгу «Яндэкса».
Найбольшы сярэднядзённы «бал за самаізаляцыю» на 23 красавіка мелі Салігорск і Рэчыца. Але цяперашнія іхныя 2,4 бала таксама ніжэйшыя за тое, што было ў працоўныя дні на мінулым тыдні.
26 мільёнаў амэрыканцаў страцілі працу за апошнія пяць тыдняў
Каля 26 мільёнаў чалавек падалі заяўкі на дапамогу з прычыны беспрацоўя за пяць тыдняў, якія прайшлі з моманту пачатку ўспышкі каранавірусу, якая прымусіла закрыцца мільёны кампаній.
Пачынаючы зь сярэдзіны сакавіка, працу страціў кожны шосты работнік, што зьяўляецца найгоршым паказчыкам за ўсю гісторыю назіраньняў. Эканамісты прагназуюць, што ў красавіку ўзровень беспрацоўя можа дасягнуць 20%.
Велізарная колькасьць скарачэньняў працоўных месцаў увяла эканоміку ЗША ў найгоршы крызіс з часоў Вялікай дэпрэсіі 1930-х гадоў. Некаторыя эканамісты гавораць, што аб'ём вытворчасьці ў краіне можа скараціцца ўдвая ў параўнаньні з узроўнем часоў Вялікай рэцэсіі, якая скончылася ў 2009 годзе.
Адміністрацыйныя захады, прынятыя для барацьбы з эпідэміяй, выклікалі бурныя пратэставыя дзеяньні ў некалькіх сталіцах штатаў. Натоўпы людзей патрабавалі ад улады аднаўленьня дзейнасьці прадпрыемстваў.
У Чэхіі зьнялі агульнанацыянальны карантын
Урад Чэхіі ў чацьвер, 23 красавіка прыняў рашэньне адмяніць агульнанацыянальны карантын, уведзены ў сярэдзіне сакавіка ў сувязі з эпідэміяй каранавірусу.
Жыхары краіны з 24 красавіка зноў змогуць вольна перамяшчацца па Чэхіі і выяжджаць за мяжу (пры ўмове двухтыднёвага карантыну пасьля вяртаньня). Дазволена зьбірацца групамі да 10 чалавек.
Чэхія — адна зь першых эўрапейскіх краін, якія ўвялі жорсткі карантын, і адной зь першых яго здымае.
Урад Чэхіі таксама перагледзеў ухвалены раней графік паслабленьня іншых абмежавальных захадаў. Крамы і прадпрыемствы сфэры паслуг адкрыюцца раней, чым чакалася.
Ужо ў панядзелак 27 красавіка адкрыюцца крамы з плошчай, меншай за 2500 мэтраў, акрамя разьмешчаных у гандлёвых цэнтрах. Раней чакалася, што гэта адбудзецца толькі ў канцы траўня. Адкрыюцца таксама фітнэс-цэнтры і заапаркі. ВНУ зноў адкрыюцца для студэнтаў.
11 траўня адкрыюцца гандлёвыя цэнтры, цырульні, масажныя салёны, музэі. Нарэшце, 25 траўня будуць адкрытыя кавярні і рэстараны і здымуць большасьць астатніх абмежаваньняў. Пакуль незразумела, калі межы краіны адкрыюцца на ўезд для іншаземцаў.
Суд у Празе ў чацьвер адмяніў шэраг карантынных захадаў, прызнаўшы, што яны былі ўведзеныя з парушэньнем закону. Рашэньне набудзе моц 27 кастрычніка — да гэтага часу ўрад, відавочна, аформіць іх інакш. Частка зь іх, зрэшты, у любым выпадку фактычна перастане дзейнічаць у сувязі з апошнім рашэньнем уладаў.
Лічбы на раніцу 24 красавіка
- У сьвеце зафіксавалі звыш 2,7 мільёна выпадкаў COVID-19: звыш 866,5 тысячы ў ЗША, 213 тысяч у Гішпаніі, амаль 190 тысяч у Італіі, 158 тысяч у Францыі, 153 тысячы ў Нямеччыне, 138 тысяч у Вялікай Брытаніі, звыш 101,5 тысячы ў Турэччыне, 87 тысяч у Іране, каля 84 тысяч у Кітаі.
- Ад хваробаў, якія выклікаў новы каранавірус, у сьвеце памёр 191 061 чалавек. Зь іх 50 243 у ЗША, 25 549 у Італіі, 22 157 у Гішпаніі, 21 856 у Францыі, 18 738 у Вялікай Брытаніі, 6 490 у Бэльгіі, 5 575 у Нямеччыне, 5 481 у Іране, 4636 у Кітаі.
- Выпісалі амаль 746 тысяч пацыентаў, якія паправіліся ад COVID-19. «Актыўных выпадкаў» хваробы застаецца амаль 1,79 млн, зь іх звыш 58 тысяч людзей у цяжкім ці крытычным стане.
- У Беларусі, паводле афіцыйных зьвестак на 23 красавіка, пацьверджана 8022 выпадкі COVID-19 (плюс 741 за дзень). Ад каранавірусу ў Беларусі прызналі сьмерць 60 чалавек. Лекары ананімна заяўляюць, што ня ўсім хворым ставяць адпаведны дыягназ. Міністэрства здароўя не залічвае да памерлых ад COVID-19 тых, у каго вірус «элімінавалі», а яны ўсё роўна памерлі.
«Нашы мазкі на COVID-19 проста згубілі ці выкінулі ў сьметніцу!» Супрацоўніца «хуткай» — пра сытуацыю ў Буда-Кашалёве
У Буда-Кашалёве — успышка каранавірусу, кажа адна з супрацоўніц хуткай дапамогі.
«Афіцыйна нам, мэдыкам, ня кажуць лічбы. Па нашых падліках, тут каля сотні пацьверджаных выпадкаў. Хварэюць мэдыкі. Памерла мэдсястра з „хуткай“. Інжынэр-праграміст — у цяжкім стане. А мы працуем на выкліках у марлевых масках!», — сказала Свабодзе адна з супрацоўніц «хуткай» у Буда-Кашалёве.
«Вы бачыце каранавірус? Ідзіце вучыцеся» — студэнта БДАТУ не задавальняюць захады бясьпекі ва ўнівэрсытэце
Беларускім дзяржаўным аграрна-тэхнічным унівэрсытэце няма студэнтаў і выкладчыкаў, якія захварэлі на каранавірус — гэтак кажуць у рэктараце ВНУ. Між тым некаторыя студэнты БДАТУ просяць дапамогі.
Асноўныя прэтэнзіі такія: зьвесткі пра каранавірус замоўчваюць, дыстанцыйнага навучаньня не наладзілі, гоняць на суботнік, а з 5 траўня могуць аднавіць лекцыйныя заняткі. Свабода высьвятляла, ці слушныя гэта прэтэнзіі. Чытайце па спасылцы>>
Агнешка Рамашэўска-Гузы: «Я б хацела, каб Лукашэнка меў рацыю»
Свабода задае вядомым інтэлектуалам пытаньні пра антрапалягічны сэнс пандэміі, пра тое, як яна ўжо зьмяніла і яшчэ зьменіць Беларусь, сьвет і чалавека. Сёньня прапануем вашай увазе адказы польскай журналісткі, кіраўніцы тэлеканалу «Белсат» Агнешкі Рамашэўскай-Гузы.
Сьцісла:
- У Беларусі спыненьне эканомікі ў спалучэньні з агульным эканамічным правалам і нафтавым канфліктам з Расеяй можа прывесьці да поўнай катастрофы
- Лукашэнка дзейнічаў паводле прынцыпу, які Валэнса аднойчы апісаў так: «Зламай тэрмомэтар, і ў цябе ня будзе тэмпэратуры»
- У беларусаў існуе вялікая схільнасьць да фаталізму ў стаўленьні да няшчасьця
- Законы біялёгіі, на жаль, аднолькавыя для беларусаў і гішпанцаў, і я баюся гішпанскага сцэнару, хаця я б хацела, каб Лукашэнка меў рацыю
- Асабіста я была б вельмі рада, калі б гэты крызіс выклікаў усьведамленьне таго, што глябальная эканоміка ня можа быць настолькі залежнай ад небясьпечнай таталітарнай дзяржавы
Пра гэта і іншае — чытайце інэтрвію па спасылцы.
«Усё на самым сучасным узроўні». Япрынцаў расказаў пра свой каранавірус і лячэньне ў «прэзыдэнцкім» мэдцэнтры
Сярод пацыентаў Рэспубліканскага клінічнага мэдцэнтру кіраўніцтва спраў прэзыдэнта ў Ждановічах — сябра выканкаму Міжнароднай фэдэрацыі самба Ўладзімер Япрынцаў. Сюды яго паклалі з двухбаковым запаленьнем лёгкіх і каранавірусам, цяпер ён у палаце інтэнсіўнай тэрапіі.
Уладзімер Япрынцаў кажа, што ўжо восем дзён ён у лякарні ў ізаляцыі, нікуды не выходзіць. Ён ня ведае, як мог заразіцца каранавірусам, бо з 28 сакавіка знаходзіўся ў Беларусі. Ён расказаў Свабодзе, як пачуваецца цяпер і наколькі задаволены лекаваньнем у «прэзыдэнцкім» цэнтры. Чытайце па спасылцы>>