У ЗША зафіксавалі мільён выпадкаў COVID-19
У ЗША зафіксавалі больш за мільён выпадкаў каранавіруснай хваробы COVID-19, сьведчаць дадзеныя Цэнтра сыстэмных дасьледаваньняў пры Ўнівэрсытэце Джонса Гопкінса.
Хвароба забрала жыцьці 57 266 чалавек на тэрыторыі краіны. 112 315 пацыентаў паправіліся.
За час эпідэміі ў ЗША зрабілі больш 5,6 млн тэстаў на COVID-19.
Усяго ў сьвеце выявілі больш за тры мільёны зарэгістраваных выпадкаў каранавіруснай хваробы, у выніку якой памерлі амаль 214 000 чалавек.
У ЭЗ распавялі, як краіны зьбіраюцца аслабляць памежны кантроль
Дзяржавы Эўразьвязу адзіныя ў меркаваньні, што зачыненыя праз каранавірус унутраныя межы нельга адкрываць адразу. Меры процідзеяньня SARS-CoV-2 будуць аслабляцца краінамі ЭЗ толькі ва ўзгадненьні адзін з адным.
Паводле Давара Бажынавіча, міністра ўнутраных справаў Харватыі, якая старшынюе цяпер у Эўразьвязе, кіраўнікі МУС краін ЭЗ падчас відэаканфэрэнцыі, якая прайшла ў панядзелак, адзінагалосна выказаліся за тое, што пры адкрыцьці ўнутраных межаў варта дзейнічаць гэтак жа абачліва, як і ў выпадку магчымага адкрыцьця вонкавых.
«Абмежаваньні будуць аслабляцца з цягам часу, у першую чаргу ў сфэрах з адносна нізкім рызыкай распаўсюджваньня віруса», – заявіў харвацкі міністар.
Камісар ЭЗ па ўнутраных справах Ільва Ёгансан таксама заявіла, што кантроль на межах ня варта адмяняць разам, а толькі паэтапна.
У сувязі з крызісам вакол каранавіруса многія краіны аднавілі пагранічны кантроль унутры Шэнгенскай зоны, у якую ўваходзяць 26 эўрапейскіх дзяржаў.
Кіраўнік Мэдычнай асацыяцыі Японіі: правесьці Алімпіяду без вакцыны будзе цяжка
Кіраўнік Мэдычнай асацыяцыі Японіі Эсітаке Якакура заявіў, што краіне будзе складана прыняць перанесеныя на наступны год Алімпійскія гульні ў адсутнасьць вакцыны ад каранавірусу.
«Я не сьцьвярджаю, варта ці ня варта праводзіць Алімпіяду, але гэта будзе цяжка зрабіць, — сказаў ён. Калі ня будзе распрацаваная эфэктыўная вакцына, то я мяркую, што правесьці Алімпіяду будзе складана».
Пандэмія прымусіла арганізатараў адмовіцца ад правядзеньня Алімпіяды ў ліпені гэтага года і перанесьці мерапрыемства на наступнае лета.
У цяперашні момант праца над вакцынай вядзецца ў многіх краінах, аднак экспэрты папярэджваюць, што працэс можа заняць ад года да паўтарох гадоў.
«Працаваць лепш, чым бязьдзейнічаць». Віцебская рэстарацыя ўжо месяц гатуе абеды для мэдыкаў. ВІДЭА
Рэстарацыя «Витебский трактир» адной зь першых у горадзе пачала бясплатна карміць мэдыкаў. На рэстараннай кухні, разьлічанай на індывідуальныя замовы, штодня гатуюць больш за сто абедаў. Прадуктамі і грашыма ініцыятыву падтрымліваюць пастаўшчыкі, буйныя гандлёвыя сеткі, прадстаўнікі дабрачынных арганізацый і простыя гараджане.
Рэпартаж з рэстарацыі, фота і відэа глядзіце па спасылцы.
Міністэрства адукацыі: атэстацыю плянуюць правесьці пры ўзаемадзеяньні выкладчыкаў з навучэнцамі
У Міністэрстве адукацыі лічаць, што студэнты і школьнікі мусяць асабіста прысутнічаць на атэстацыі. Пра гэта заявіў начальнік галоўнага ўпраўленьня прафэсійнай адукацыі Міністэрства адукацыі Сяргей Касьпяровіч на тэлеканале СТВ.
Што маецца на ўвазе? Залікі, экзамэны і гадавыя адзнакі школьнікаў.
«Асабісты ўдзел — гэта дэманстрацыя асабістых ведаў», — сказаў Касьпяровіч.
Пуцін падоўжыў абмежавальныя меры ў Расеі
Пэрыяд непрацоўных дзён у Расеі захаваецца да 11 траўня. Краіне ўдалося стабілізаваць сытуацыю з разьвіцьцём каранавірусу, але самы небясьпечны момант яшчэ ня пройдзены. Чым больш строга грамадзяне будуць выконваць абмежаваньне, тым хутчэй краіна вернецца да нармальнага жыцьця, заявіў прэзыдэнт РФ.
Гэтую заяву Уладзімер Пуцін зрабіў падчас нарады з урадам і кіраўнікамі рэгіёнаў па сытуацыі з распаўсюдам каранавірусу.
Разам з тым Пуцін заявіў, што ўрад да 5 траўня падрыхтуе плян паэтапнага выхаду з рэжыму самаізаляцыі.
У Францыі абвясьцілі плян выхаду з карантыну
Прэм’ер-міністар Францыі Эдуар Філіп паведаміў, што накіруе ў парлямэнт законапраект, які працягвае надзвычайнае становішча ў краіне да 23 ліпеня. Гэты закон, калі яго прыме парлямэнт, дазволіць ураду да гэтага тэрміну ўказамі абмяжоўваць свабоду сходаў і перамяшчэньня грамадзян, а таксама працу прадпрыемстваў.
Улады, тым ня менш, плянуюць паступовае паслабленьне карантыну.
Прэмʼер-міністар прадставіў плян паступовага выхаду краіны з локдаўну, пачынаючы з 11 траўня. Гэты плян будзе ажыцьцяўляцца ў розных рэгіёнах Францыі, аднак у найбольш пацярпелых ад эпідэміі месцах жорсткія меры карантыну будуць па-ранейшаму выконвацца.
- Плян прадугледжвае адкрыцьцё крамаў і рынкаў. Рэстараны і бары па-ранейшаму будуць зачыненыя.
- У грамадзкім транспарце нашэньне масак будзе абавязковым.
- Спартовыя чэмпіянаты краіны, у тым ліку футбольны, ня будуць адноўленыя да верасьня.
Каранавірус выклікае інсульты ў маладых людзей — The Washington Post
Амэрыканскае выданьне піша, што лекары б’юць трывогу з прычыны прыкметнай колькасьці інсультаў сярод заражаных каранавірусам маладых людзей, хвароба якіх працякала ў лёгкай форме. Узрост такіх пацыентаў ад 30 да 40 гадоў, многія зь іх нават ня ведалі, што заражаныя каранавірусам, а цяпер некаторыя зь іх паралізаваныя, а іншыя загінулі ад інсультаў. І гэта пры тым, што сярэдні ўзрост пацыентаў з інсультамі ў ЗША — 74 гады. Цалкам чытайце па спасылцы.
Чарговая краіна Эўразьвязу скасоўвае карантын
Абмежавальныя меры, уведзеныя ў Партугаліі ў сакавіку, будуць адменены з 3 траўня, але аднаўленьне эканомікі будзе павольным і паступовым працэсам, заявіў прэзыдэнт Марсэла Рэбэл дэ Суса 28 красавіка. Абмежаваньні ў краіне ўвялі 18 сакавіка.
Радаўніца ў Магілёве ва ўмовах пандэміі: на могілкі ў масках. ФОТА
Сёлета Радаўніца, дзень памінаньня памерлых, адзначаецца ва ўмовах пандэміі каранавірусу. Каб пазьбегнуць пашырэньня хваробы, сьвятары і мэдыкі заклікалі беларусаў ня ехаць на могілкі. У Магілёве ўшанаваць памяць продкаў на найвялікшыя Паўднёва-ўсходнія могілкі прыйшло значна меней людзей, чым у мінулыя гады. Шмат хто з гараджанаў адведаў магілы блізкіх напярэдадні.
«Вядома ж людзі баяцца каранавірусу, таму пазьбягаюць штурханіны, як тое было раней, — кажа адна з наведніц могілак. — Раней ні ў аўтобус, ні ў тралейбус ня ўціснуцца было, а сёньня пустыя ідуць. Загадзя прыбралі людзі магілкі». Далей чытайце па спасылцы.
Памёр навуковец з прадпрыемства «Пеленг», які быў на апараце ШВЛ
У менскім шпіталі памёр Анатоль Тарэеў, начальнік аддзелу аптычных сыстэм прадпрыемства «Пеленг», якое падпарадкоўваецца Дзяржаўнаму вайскова-прамысловаму камітэту Беларус, піша «НН» са спасылкай на сваякоў Тарэева.
Ён правёў у больніцы з пнэўманіяй каля 3 тыдняў, у апошнія дні мужчыну падключылі да апарата ШВЛ, але выратаваць не змаглі. Сваякі кажуць, што Тарэеву рабілі тэст на каранавірус і ён быў станоўчым; ніякіх сур’ёзных хранічных захворваньняў Тарэеў ня меў.
На 24 красавіка Covid-19 пацьвердзілі ў 13 супрацоўнікаў «Пеленгу». Завод увёў 2-тыднёвыя канікулы да 10 траўня з адпрацоўкай у суботы чэрвеня і кастрычніка.
Кампанія #ByCovid19 расказала, колькі мае валянтэраў і чаму з ахвяраваньняў бяруць камісію
Адзін з ініцыятараў грамадзянскай кампаніі #ByCovid19 Андрэй Стрыжак адказаў на «топ-5 вострых пытаньняў» да валянтэраў. Сьцісла:
- У базе валянтэраў кампаніі звыш тысячы чалавек розных палітычных поглядаў, кампанія ўзаемадзейнічае ў тым ліку зь міністэрствамі аховы здароўя і замежных спраў.
- Мэта кампаніі — дапамога беларускім мэдыкам, палітычных мэтаў яна ня мае.
- Тое, што перадаецца (не прадаецца) у мэдычныя ўстановы, афармляецца афіцыйна праз акты перадачы і ставіцца на балянс лякарняў. У #ByCovid19 нельга купіць рэсьпіратар, тэрмомэтар ці апарат штучнай вэнтыляцыі лёгкіх.
- Кампанія не бярэ сабе нейкі адсотак з сабраных грошай, але з ахвяраваньняў спаганяецца камісія, калі яны паступаюць на сэрвіс Molamola. Сумарна банкі і пляцоўка бяруць за сваю працу 6% ад сумаў.
- Сама кампанія працуе задарма, жыве за кошт уласных запасаў, з харчаваньнем дапамагае бізнэс.
Цалкам чытайце па спасылцы.
Як пандэмія вярнула да жыцьця аўтакіно і спарадзіла аўтаканцэрт
У Чэхіі, у сувязі з абмежаваньнямі грамадзкага і культурнага жыцьця на час пандэміі каранавірусу, узнавілі працу даўно забытыя аўтакінатэатры, якія дазваляюць глядзець фільмы з аўтамабіляў, прыпаркаваных перад вялізным экранам пад адкрытым небам.
Тым часам у Літве на лётнішчы Палукніс 24 красавіка адбыўся першы ў краіне канцэрт для аўдыторыі ў машынах. Як і ў кінатэатрах drive-іn, гук лавіўся праз радыёпрымачы ў аўтамабілях.
«У ганаровай варце хворых на каранавірус няма, пра іншых высьвятляем». Чаму 27 красавіка адмянілі рэпэтыцыю параду?
Увечары 27 красавіка ў Менску не адбылося рэпэтыцыі вайсковага параду, які плянуецца на 9 траўня. Паводле прэс-сакратаркі МУС Вольгі Чамаданавай, рэпэтыцыі вайсковага параду «яшчэ адбудуцца». У падразьдзяленьні ганаровай варты, якая бярэ ўдзел у рэпэтыцыі параду, «хворых на каранавірус няма», запэўніла Вольга Чамаданава, пра выпадкі заражэньня іншых падразьдзяленьнях, задзейнічаных у рэпэтыцыях, яна ня ведае.
Дзяжурны брыгады спэцыяльнага прызначэньня ў Мар’інай Горцы абверг зьвесткі, што ў кагосьці з вайскоўцаў брыгады выявілі каранавірус. «У брыгадзе каранавірусу няма, без камэнтароў», — сказаў дзяжурны і паклаў слухаўку. Цалкам чытайце тут.
У БПЦ пацьвердзілі, што ў манастыры, які наведваў Лукашэнка на Вялікдзень, каранавірус
Мужчынскі праваслаўны манастыр у вёсцы Малыя Ляды Смалявіцкага раёну знаходзіцца на карантыне, наведваць яго нельга, паведамілі Свабодзе ў манастыры.
Старшыня Сынадальнага інфармацыйнага аддзелу БПЦ пратаярэй Сяргей Лепін пацьвердзіў карэспандэнту Свабоды, што Лядзенскі манастыр знаходзіцца на карантыне і там ёсьць людзі з пацьверджаным каранавірусам.«Але колькі, я ня ведаю. Па дадатковую інфармацыю вам трэба зьвяртацца ў Лядзенскі манастыр», — сказаў ён.
Прэс-сакратар Барысаўскай япархіі а. Ігар Васько сказаў, што хворых у манастыры няма. Падрабязьней тут>>
«Час неадкладных і маштабных захадаў», — каардынатарка ААН заклікала беларусаў заставацца дома
Пастаянная каардынатарка Арганізацыі аб’яднаных нацыяў у Беларусі Яанна Казана-Вісьнявецка 28 красавіка выступіла са зваротам да беларусаў і беларускіх уладаў.
Яна падкрэсьліла, што нягледзячы на актыўныя намаганьні ўраду і міжнародных партнэраў, цяпер у Беларусі «назіраецца эвалюцыя ўспышкі інфэкцыі COVID-19», і адзначыла, што «цяпер прыйшоў час для неадкладных і маштабных захадаў ва ўзмацненьні жорсткасьці фізычнага дыстанцыяваньня».
Яна нагадала рэкамэндацыі Сусьветнай арганізацыі здароўя:
- перанос масавых падзей;
- магчымасьць дыстанцыйнай працы і навучаньня ва ўстановах адукацыі;
- прыпыненьне прадпрыемстваў, якія не аказваюць «асноўных паслуг» — кавярняў, рэстарацыяў, гандлёвых цэнтраў;
- скарачэньне «неістотных перасоўваньняў» — паездак за горад, у вёскі і на лецішчы, асабліва сярод людзей у групах рызыкі.
і заклікала беларусаў заставацца дома, каб прадухіліць шматлікія заражэньні, запаволіць распаўсюд вірусу і даць мэдыкам час падрыхтаваць рэсурсы і работнікаў.
«У кожнага пятага пацьвярджалася пнэўманія». Каранавірус у сям’і рок-музыкі Андрэя Казлоўскага
У аднаго з пачынальнікаў беларускага гард-року, заснавальніка культавага гурту «Сузор’е» Андрэя Казлоўскага пацьвердзіўся станоўчы вынік тэсту на каранавірус. Заразілася і ягоная жонка Тамара Юркевіч. У размове са Свабодай музыка выказаў здагадку, дзе і калі мог падхапіць інфэкцыю.
Крыху больш за месяц таму разам з жонкай ён адвозіў 92-гадовую цешчу ў лякарню хуткай дапамогі. Там 6 гадзінаў яны вымушана правялі ў прыёмным пакоі сярод людзей, якія чхалі і кашлялі. На пачатку красавіка пажылой жанчыне зноў стала кепска. Яе транспартавалі ў 5-ю лякарню, дзе карціна паўтарылася — дзясяткі рэальна і патэнцыйна хворых у адным памяшканьні.
«Можа, паўсотні чалавек у чаканьні прыёму, — гаворыць ён. — Нашу бабулю хоць і прапускалі без чаргі, бо ў асноўным усе маладзейшыя, але 4,5 гадзіны гэта заняло. Дык вось: дзесьці ў кожнага пятага пацьвярджалася пнэўманія. Ну а ўсіх астатніх выпраўлялі дадому — бяз тэстаў, безь нічога». ГісторыюАндрэя Казлоўскага цалкам чытайце па спасылцы >>
Беларусы гуляюць у футбол падчас пандэміі, але атрымаюць дапамогу ад UEFA, як і тыя, хто на карантыне
55 футбольных асацыяцый Эўропы, уключна зь Беларускай фэдэрацыяй футболу, атрымаюць ад UEFA па 4,3 мільёна эўра на барацьбу з наступствамі каранавірусу. Агулам 236,5 млн эўра выдзеленыя праграмай дапамогі HatTrick. Падрабязьней тут.
Плюс 919 інфікаваных і 4 сьмерці. У Беларусі зафіксавалі 12 208 выпадкаў COVID-19
Паводле Мінздароўя, на раніцу 28 красавіка ў Беларусі зафіксавалі:
- агулам 12 208 чалавек са станоўчым тэстам на COVID-19 (у іх лік уваходзяць вылекаваныя і памерлыя);
- 79 памерлых, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (удава аднаго з памерлых кажа, гэта ня так);
- 1993 выпісаных пацыентаў, у якіх была каранавірусная інфэкцыя;
- гэта значыць, за дзень выявілі яшчэ 919 выпадкаў і прызналі яшчэ 4 сьмерці, выпісалі 253 пацыентаў;
- ад пачатку эпідэміі ў краіне зрабілі 161 028 тэстаў, плюс 7183 за дзень;
- колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісаныя дамоў на «амбуляторнае лекаваньне», не паведамляецца.
У Беларусі адны вайскоўцы дэзынфікуюць лякарні, іншыя рыхтуюцца да параду
Зводны батальён войскаў радыяцыйнай, хімічнай і біялягічнай абароны апрацаваў памяшканьні і прылеглую тэрыторыі цэнтральнай раённай лякарні і паліклінікі № 1 у Менску.
Як паведамілі ў Міністэрстве абароны, 170 спэцыялістаў-хімікаў і 60 адзінак тэхнікі прыбылі ў Менск для дэзынфэкцыі устаноў аховы здароўя. Мэта — мінімізацыя распаўсюду інфэкцыі COVID-19.
Вайскоўцы маюць у сваім арсэнале камплекты спэцыяльнай апрацоўкі.
У той жа час іншыя падразьдзяленьні абароннага ведамства Беларусі рыхтуюцца да вайсковага параду 9 траўня. Так, чакаецца, што 29 красавіка ў Менску пройдзе чарговая трэніроўка на маршруце мэханізаванай калёны. У сувязі з гэтым увечары будзе абмежаваны рух усіх відаў транспарту ад праспэкту Пераможцаў да вуліцы Куйбышава і зьменяцца трасы шэрагу аўтобусных маршрутаў.
Для пасажырскага транспарту ў месцах перакрыцьця дарог прадугледжаны часовы прыпынак на час праходжаньня калёны.