Плюс адзін выпадак — у Іўі
Дзяржаўнае выданьне «Іўеўскі край» паведамляе, што ў Горадзенскай вобласьці быў выяўлены чацьвёрты выпадак COVID-19 — у пацыента івейскай лякарні, які лекаваўся ад пнэўманіі. Калі менавіта быў пастаўлены дыягназ, не ўдакладняецца.
Віцебскі актор у рэанімацыі з COVID-19 і пнэўманіяй
Драматычны тэатар імя Якуба Коласа ў Віцебску скасаваў спэктаклі да 18 красавіка. Дырэктар тэатру паведаміў Tut.by, што адзін з актораў цяпер у рэанімацыі з пнэўманіяй, у яго станоўчы тэст на каранавірус.
Але скасаваньне спэктакляў тлумачаць не карантынам, а «практычна пустой заляй» зь сярэдзіны сакавіка — рэпэтыцыі працягваюцца.
На 30 сакавіка ў 11 супрацоўнікаў тэатру рэсьпіраторныя захворваньні, ёсьць і іншыя людзі з запаленьнем лёгкіх, але COVID-19 выявілі толькі ў аднаго. Калі менавіта пацьвердзілі каранавірус у аднаго з актораў, не ўдакладняецца.
Toyota прыпыніла заводы ў Эўропе і Турэччыне да 19 красавіка, у Расеі да 3 красавіка
Японская карпарацыя Toyota Motor ў сувязі з пандэміяй COVID-19 прыпыніла дзейнасьць сваіх заводаў: у Расеі да 3 красавіка, у Вялікай Брытаніі, Францыі і іншых эўрапейскіх краінах, а таксама Турэччыне да 19 красавіка, паведамляе Kyodo News.
Раней кампанія ўжо прыпыняла працу на заводах у Паўночнай амэрыцы, часткова — у Японіі, Паўднёвай Амэрыцы і некаторых краінах Азіі.
Ды 30 сакавіка заводы канцэрну ў Кітаі аднавілі працу ў звычайным рэжыме.
У Лельчыцах з падазрэньнем на каранавірус забралі дырэктара гаспадаркі і супрацоўнікаў райвыканкаму
Як стала вядома Свабодзе, з падазрэньнем на каранавірус у Гомельскі інфэкцыйны шпіталь трапіў дырэктар аднаго з сельскагаспадарчых прадпрыемстваў Лельчыцкага раёну. Ягоныя кантактныя асобы — блізкія сваякі, а таксама кіраўніцтва ўпраўленьня сельскай гаспадаркі Лельчыцкага райвыканкаму — таксама шпіталізаваныя.
У Лельчыцах праводзіцца эпідэміялягічнае расьсьледаваньне па выяўленьню магчымага выпадку COVID-19. «Пацыент шпіталізаваны ў Гомельскі інфэкцыйны шпіталь, ягоныя кантакты знойдзены і знаходзяцца на мэдыцынскім абсьледаваньні», — паведаміла «Гомельская праўда».
Ва ўпраўленьні сельскай гаспадаркі і харчаваньня Лельчыцкага райвынканкаму з раніцы 30 сакавіка ніхто не адказвае па тэлефонах кіраўніцтва — начальніка ўпраўленьня і ягоных намесьнікаў. Іншыя супрацоўнікі райвынкаму кажуць па тэлефоне, што начальнік упраўленьня і яго намесьнікі — на бальнічным.
Крыніцы Свабоды паведамілі, што агулам з упраўленьня сельскай гаспадаркі і кіраўніцтва калгасу забралі дзесяць чалавек як кантактных асобаў. У гаспадарцы, кіраўніка якой забралі з падазрэннем на каранавірус, з раніцы 30 сакавіка ніхто не здымае слухаўку.
Прэсавая сакратарка Гомельскага аблвыканкаму Вольга Рабікава пацьвердзіла Свабодзе, што шпіталізаваны з каранавірусам — жыхар Лельчыцаў.
У Эманюэля Макрона праз каранавірус вырас рэйтынг
Паводле апытаньня грамадзкай думкі, які апублікавала газэта JDD, рэйтынг прэзыдэнта і прэм’ер-міністра Францыі вырас з пачатку эпідэміі каранавірусу, паведамляе rfi.fr.
Рэйтынг Эманюэля Макрона вырас на 11 пунктаў за адзін месяц, Эдуара Філіпэ — на
6 пунктаў, пабіўшы рэкорд папулярнасьці за год, з красавіка 2018-га. Такія вынікі апытаньня Францускага інстытуту грамадзкай думкі Ifop.
Паводле апошніх лічбаў, 43% французаў «задаволеныя» дзейнасьцю свайго прэзыдэнта ў сакавіку, тады як у лютым іх было толькі 32%. Прэмʼер-міністар набраў 42% станоўчых адказаў, у лютым такіх было 36%. Рост папулярнасьці Макрона адзначаны ва ўсіх узроставых групах, асабліва сярод людзей, старэйшых за 65 гадоў (на 17% больш, чым у лютым).
20 тысячаў брытанскіх лекараў-пэнсінераў вяртаюцца на працу для барацьбы з каранавірусам
Пра гэта ў распаўсюджаным у панядзелак відэароліку заявіў кіраўнік урада, які сам знаходзіцца на самаізаляцыі пасьля таго, як у яго пацьвердзілася хвароба COVID-19, якая выклікаецца новым каранавірусам.
«20 тысяч супрацоўнікаў нацыянальнай сыстэмы аховы здароўя вяртаюцца ў шэраг — лекары і мэдсёстры, і гэта выдатная рэч», — сказаў Джонсан.
Па дадзеных, апублікаваных 28 сакавіка, у Злучаным Каралеўстве было пацьверджана амаль 20 тысяч выпадкаў заражэньня новым каранавірусам, 1 228 чалавек памерлі.
Каранавірус у сям’і актораў Коласаўскага тэатра: жонку выпісалі пасьля пнэўманіі, муж — у рэанімацыі
Мужчына ўжо 6 дзён знаходзіцца ў рэанімацыі на апараце штучнай вэнтыляцыі лёгкіх. Дыягназ актора Свабодзе пацьвердзіла яго жонка, якая таксама 5 дзён праляжала ў чыгуначным шпіталі Віцебску з пнэўманіяй.
20 сакавіка муж і жонка, якія працуюць у Коласаўскім тэатры, адчулі сябе дрэнна, у іх была тэмпэратура. 21 сакавіка іх паклалі ў чыгуначны шпіталь. Там узялі тэсты на каранавірус, у абодвух аналізы былі адмоўныя. Лячылі антыбіётыкамі. Жонка 5 дзён праляжала ў шпіталі, стан яе палепшыўся, жанчыну выпісалі.
Паводле яе, у чыгуначным шпіталі знаходзяцца 6 чалавек з каранавірусам.
Шмат людзей ляжаць з пнэўманіямі, ім зьбівалі тэмпэратуру, лячылі антыбіётыкамі і выпісвалі, ня робячы ніякіх тэстаў на каранавірус. Цалкам чытайце тут >>
NaviBand зграе «кватэрнік» праз Youtube
Лідэры беларускага гурту NaviBand Арцём і Ксенія 30 сакавіка дадуць акустычны хатні канцэрт на Youtube-канале Onliner. Пачатак у 19.30. Сьпевакі прымаюць пытаньні ад слухачоў у камэнтарах да трансьляцыі або да артыкулу на Onliner.by.
Музыкі і арганізатары канцэрту заклікаюць у час пандэміі новага каранавірусу заставацца дома і выконваць рэкамэндацыі лекараў. Такія інтэрнэт-канцэрты ўжо давалі :B:N:, Leibonik, Лявон Вольскі і іншыя музыкі, у інтэрнэт-фармаце прайшло сьвяткаваньне Дня Волі.
Міністар абароны адказаў Лукашэнку: інфікаваных каранавірусам у арміі няма
«У нас ніякай панікі няма. Мы плянава праводзім усе мерапрыемствы, — сказаў Віктар Хрэнін. — На сёньняшні дзень ва Ўзброеных сілах няма ніводнага выпадку заражэньня каранавірусам».
Паводле яго, у гэтыя дні на 10 палігонах Беларусі адпрацоўваюцца розныя мерапрыемствы, у якіх задзейнічаныя 7,5 тысячы вайскоўцаў.
«Яны здаровыя і здольныя выконваць задачы. Аднак мы не расслабляемся. Нашы санітарна-эпідэміялягічныя службы, мэдыкі знаходзяцца ў павышанай гатоўнасьці», — запэўніў міністар абароны.
Каранавірус пры пераліваньні крыві не перадаецца. Вялікая гутарка з дырэктарам РНПЦ трансфузіялёгіі і мэдыцынскіх біятэхналёгій
Пры пераліваньні крыві заразіцца каранавірусам немагчыма: пры пнэўманіі і COVID-19 крыві не пераліваюць. Тэстаў на каранавірус донары не здаюць. У сувязі з пагрозай каранавірусу ў Беларусі донараў менш ня стала. Няма і дэфіцыту крыві і яе кампанэнтаў, сьцьвярджае дырэктар РНПЦ трансфузіялёгіі і мэдыцынскіх біятэхналёгій Фёдар Карпенка.
Беларускіх донараў, якіх у краіне амаль 100 тысяч, сытуацыя з каранавірусам не напалохала. Як і не пужалі сэзонныя пад’ёмы прастудных захворваньняў, а таксама птушыны грып, атыповая пнэўманія, SARS, MERS ды іншыя «заразы».
«Спадзяваліся праскочыць, але не прапусьцілі». Што адбываецца па абодва бакі закрытай расейскай мяжы
Расея закрыла свае межы. Напярэдадні такое даручэньне выдаў прэм’ер-міністар Міхаіл Мішуцін. Пад закрыцьцё трапіў і сухапутны ўчастак беларуска-расейскай мяжы.
Свабода пабывала на адной з самых ажыўленых транзытных трасаў Магілёўшчыны Р-43, якая вядзе зь беларускага Крычава ў расейскі Рослаў, а далей у Маскву.
Мінздароўя тры дні не паведамляла пра распаўсюд каранавірусу. БАЖ апублікаваў адкрыты зварот
Беларуская асацыяцыя журналістаў апублікавала 30 сакавіка зварот да Міністэрства аховы здароўя пад загалоўкам «Найлепшая абарона ад фэйкаў і панікі — праўдзівая своечасовая інфармацыя».
БАЖ спасылаецца на 34-ы артыкул Канстытуцыі і патрабуе:
- арганізаваць працу прэс-службаў Мінздароўя, абласных, гарадзкіх і раённых уладаў так, каб кожны журналіст мог у працоўны час атрымаць дакладную і своечасовую інфармацыю пра COVID-19;
- штодзень даваць грамадзтву апэратыўную і дакладную інфармацыю пра распаўсюд COVID-19, а таксама пра рэкамэндацыі лекараў.
Тым часам у Палаце прадстаўнікоў плянуюць разглядзіць інфармаваньне пра пандэмію, але недзяржаўныя СМІ ня пусьцяць. Мінздароўя тры дні не паведамляла пра распаўсюд вірусу ў Беларусі.
«Цэны на прадукты могуць вырасьці ўжо на гэтым тыдні», — бізнэсовец
Сьцісла
- Паводле экспэртаў, неўзабаве вырастуць цэны на харчы.
- На нехарчовыя тавары цэны не растуць, бо прадпрымальнікі распрадаюць запасы.
- Ня варта чакаць павышэньня цэнаў і на бытавую тэхніку.
- «Камуналка» будзе на ранейшым узроўні, хоць і мусіць апускацца, бо таньнее нафта і газ.
«У нас ніякай панікі няма». Міністар абароны адказаў Лукашэнку: інфікаваных каранавірусам у арміі няма
У беларускім войску няма ніводнага выпадку заражэньня каранавірусам, паведаміў Аляксандру Лукашэнку міністар абароны Беларусі Віктар Хрэнін. Паводле яго, у гэтыя дні на 10 палігонах Беларусі адпрацоўваюцца розныя мерапрыемствы, у якіх задзейнічаныя 7,5 тысячы вайскоўцаў.
«Эўраопт» запусьціў яшчэ адзін сэрвіс дастаўкі прадуктаў
Сетка крамаў «Эўраопт», якая ўжо мае сэрвіс «Е-дастаўка», запусьціла яшчэ адзін сэрвіс: «Хіт-дастаўка». Асартымэнт у гэтага сэрвісу зьменшаны да «самых запатрабаваных» тавараў: мяса, рыба, яйкі, садавіна, гародніна, малочныя прадукты, хлеб, кандытарскія вырабы і бакалея. Сьцьвярджаецца, што цэны там ніжэйшыя за «афлайнавыя» крамы.
Кампанія заяўляе, што зьменшаны асартымэнт дазволіць лягчэй знаходзіць плошчы пад склады і хутчэй вучыць супрацоўнікаў — а значыць, павялічыць колькасьць выкананых замоваў і зьменшыць час чаканьня. Асноўны сэрвіс «Е-дастаўка» перажывае падвышаны попыт у час пандэміі каранавірусу.
Пакуль сэрвіс працуе толькі ў Менску, прапануе дастаўку пераважна на наступны дзень пасьля замовы. Мінімальная сума замовы — 35 рублёў, максымум 5 тавараў аднаго віду, аплата толькі праз інтэрнэт.
Санітарная служба рэкамэндавала рэстаранам рассунуць столікі на 1,5 мэтра
Больш вільготных прыборак, дэзынфэкцыя, антысэптыкі і ніякіх кальянаў — гэта яшчэ ня ўсе рэкамэндацыі месцам грамадзкага харчаваньня ад санітарна-эпідэміялягічнай службы. Суб’ектам гаспадараньня (кавярням, рэстаранам, начным клюбам) разаслалі рэкамэндацыйны ліст, у якім прапісалі захады супраць каранавіруснай інфэкцыі. Сярод іх павелічэньне адлегласьці паміж пасадачнымі месцамі і захаваньне рэсьпіраторнага этыкету. Больш падрабязна чытайце тут>>
Ужо 152. У Беларусі за тры дні выявілі 58 новых выпадкаў COVID-19
Міністэрства аховы здароўя Беларусі 30 сакавіка паведаміла ў сваім Telegram сьвежыя лічбы пра колькасьць выпадкаў COVID-19: 47 пацыенты «выпісаныя або рыхтуюцца да выпіскі», яшчэ 105 «знаходзяцца пад кантролем мэдыкаў і на лячэньні».
Ад пачатку эпідэміі ў Беларусі зрабілі 30 тысячаў тэстаў на новы каранавірус. Для абсьледаваньня і назіраньня працягваюць шпіталізаваць людзей з сымптомамі і тых, хто кантактаваў з інфікаванымі. За мінулы дзень, паводле Мінздароўя, шпіталізавалі для назіраньня 110 чалавек, выпісалі 144.
Беларусь застаецца сярод краінаў Эўропы, дзе выявілі найменш выпадкаў COVID-19 — меней толькі ў Косава (94 выпадкі пры насельніцтве ў 1,81 млн чалавек), Грузіі (98 пры насельніцтве ў 3,72 млн), Чарнагорыі (91 пры 631 тысячы) і шэрагу мікрадзяржаваў з насельніцтвам менш за 40 тысяч чалавек.
Эўразьвяз выдзяляе Беларусі грошы на барацьбу з каранавірусам
У рамках сваіх глябальных дзеяньняў у адказ на ўспышку каранавірусу Эўрапейская камісія гатовая падтрымліваць краіны Усходняга партнэрства і пераразьмеркавала 140 мільёнаў эўра на самыя непасрэдныя патрэбы, у тым ліку і на патрэбы Беларусі, паведамляе Прадстаўніцтва ЭЗ у Беларусі.
Акрамя таго, Эўрапейская камісія перанакіруе сродкі існуючых інструмэнтаў на суму да 700 мільёнаў эўра, каб дапамагчы ў зьмякчэньні сацыяльна-эканамічнага ўплыву каранавіруснага крызісу па ўсім рэгіёне.
У менскім мэтро стала на чвэрць менш пасажыраў
У сакавіку штодзённая плынь пасажыраў мэтро ў Менску зьнізілася на 200 тысячаў чалавек — у лютым было каля 800 тысячаў на дзень, у сакавіку стала каля 600 тысячаў, паведаміў БелТА прэс-сакратар Менскага мэтрапалітэну Андрэй Дроб.
Цягнікі працягваюць хадзіць у штатным рэжыме, але вагоны цяпер апрацоўваюць мыйнымі і дэзынфэкцыйнымі сродкамі. Таксама мыюць і дэзынфікуюць станцыі — парэнчы, дзьвярныя ручкі і іншыя рэчы, якіх датыкаюцца пасажыры.
У Віцебску зацьвердзілі плян супраць каранавірусу: цэрквах, школах, гатэлях, рэстаранах, на прадпрыемствах — усяго 21 пункт
Віцебскі гарвыканкам 27 сакавіка зацьвердзіў план дадатковых мерапрыемстваў па прафіляктыцы і зьніжэньні распаўсюджваньня каранавірусу і іншых рэсьпіраторных інфэкцый:
- работнікаў з прыкметамі вострых рэсьпіраторных інфэкцый ня будуць дапускаць да працы, абмяжуюць выезды супрацоўнікаў у камандзіроўкі; нарады, сэмінары, пасяджэньні патрабуюць праводзіць пераважна празь відэа- і аўдыёканфэрэнцыі;
- бацькам дазволяць не вадзіць дзяцей у дзіцячы садок, за гэтыя дні грошы за садок не налічаць;
- школьнікаў рэкамэндуюць увесь дзень трымаць у адным клясе, у гуртках — ня зьмешваць вучняў з розных клясаў (у тым ліку ў пэрыяд канікул);
- скасаваць у ВНУ, каледжах і ліцэях групавыя заняткі і перавесьці навучэнцаў на дыстанцыйнае навучаньне; іншагароднім студэнтам забараніць выяжджаць дахаты на выходныя;
- забараніць наведваньні інтэрнатаў, дамоў састарэлых і інвалідаў, забараніць праводзіць у іх масавыя мерапрыемствы;
- забясьпечыць у кавярнях, рэстарацыях, месцах грамадзкага харчаваньня адлегласьць паміж сталамі для наведнікаў ня менш як 1,5 мэтра адзін ад аднаго;
- забясьпечыць маскамі і антысэптыкамі сацыяльных работнікаў, работнікаў пошты, банкаў і інш., якія аказваюць паслугі пажылым людзям дома;
- засяленьне людзей у гатэлі, кемпінгі і інш. праводзіць як мага далей адзін ад аднаго (на розных паверхах, у розных баках калідора), апытваць наведнікаў пра стан іх здароўя;
- наведнікаў у цырульнях, тату-салёнах, салёнах прыгажосьці, пэрманэнтнага макіяжу і інш. прымаць толькі па папярэднім запісе, з інтэрвалам паміж кліентамі ня менш за 5 хвілін;
- адмяніць працу дыскатэк, начных клюбаў, кальянных, боўлінгаў, більярдных, кампутарных клюбаў, забаўляльных установаў пасьля 23.00
і інш. (цалкам чытайце тут)