У тыгрыцы з заапарку ў ЗША дыягнаставалі каранавірус
У 4-гадовай тыгрыцы па імі Надзя (Nadia), якая знаходзіцца ў заапарку Бронксу, дыягнаставаны каранавірус SARS-CoV-2, які выклікае хваробу COVID-19, паведаміла ў нядзелю адміністрацыя заапарку.
У паведамленьні адзначаецца, што ў Надзі, яе сястры па імі Азуль, двух амурскіх тыграў і трох афрыканскіх львоў назіраецца сухі кашаль. Чакаецца, што ўсе згаданыя жывёлы паправяцца.
Вынікі праведзенага тэсту пацьвердзіла Нацыянальная лябараторыя вэтэрынарнай службы, якая базуецца ў Эймсе, штат Аёва.
Раней каранавірус выяўлялі таксама ў прыблізна 15% хатніх катоў у кітайскім Ухані.
Чвэрць заражэньняў каранавірусам — у ЗША
На раніцу 6 красавіка ў сьвеце зафіксавалі больш за 1,274 мільёна выпадкаў COVID-19, і амаль 337 тысяч зь іх — у ЗША.
У Злучаных Штатах найбольш пацярпеў ад новага каранавірусу штат Нью-Ёрк, дзе заразіліся 123 тысячы чалавек і памерлі 4159. Але ў нядзелю ў штаце паведамілі пра зьніжэньне колькасьці шпіталізацыяў і скарачэньне колькасьці пацыентаў на штучнай вэнтыляцыі лёгкіх. Губэрнатар штату дапускае, што штат падыходзіць да піку, за якім пасьледуе «плято» — этап, на якім колькасьць выпадкаў не расьце.
Прэзыдэнт ЗША Дональд Трамп у суботу папярэдзіў амэрыканцаў, што неўзабаве ім давядзецца перажыць два самыя цяжкія тыдні эпідэміі, а краіну чакае яшчэ мноства сьмерцяў.
Гішпанія, якая выйшла на другое пасьля ЗША месца паводле колькасьці інфікаваных і другое пасьля Італіі паводле колькасьці сьмерцяў, працягнула агульнанацыянальны карантын яшчэ на 15 дзён, да 26 красавіка. Прэм’ер краіны адзначыў, што за мінулы тыдзень тэмпы распаўсюду вірусу зьнізіліся, сьмяротнасьць спадае — маўляў, «бачнае сьвятло ў канцы тунэлю.
Таксама колькасьць новых выпадкаў і новых сьмерцяў на дзень зьніжаецца ў Італіі, якая застаецца на першым месцы паводле агульнай колькасьці памерлых.
Заблякаваныя ў Індыі беларусы нарэшце дабраліся на радзіму
Спэцыяльны рэйс авіякампаніі «Белавія» з эвакуяванымі з Індыі грамадзянамі Беларусі прызямліўся 6 красавіка ў Нацыянальным аэрапорце «Менск».
Акрамя беларусаў, на борце таксама былі грамадзяне Расеі, Украіны і Таджыкістану.
У Індыі падчас карантыну аказаліся заблякаванымі больш за паўсотні грамадзянаў Беларусі. 22 сакавіка група турыстаў спрабавала вылецець у Расею, каб пасьля дабрацца дадому. Аднак, нягледзячы на распараджэньне расейскага ўраду, на борт самалёту іх не пусьцілі.
Праблемы ў беларусаў пачаліся 18 сакавіка, калі Расея закрыла свае межы. Спачатку з Індыі праз Маскву не змаглі вылецець 23 беларусы, на наступны дзень — яшчэ 13, затым — 15.
Агулам 51 беларускі турыст ня мог тады патрапіць на рэйс, хоць усе яны мелі на руках квіткі. Індыйская ізаляцыя ва ўмовах карантыну і камэнданцкай гадзіны расьцягнулася больш як на два тыдні.
Улады Беларусі паабяцалі дадатковую падтрымку мэдработнікам, якія працуюць з інфікаванымі COVID-19
У Беларусі выпрацуюць дадатковыя захады для стымуляваньня мэдыцынскіх работнікаў, якія працуюць з хворымі на каранавірусную інфэкцыю, заявіў 5 красавіка ў эфіры дзяржаўнага тэлеканалу «Беларусь-1» намесьнік прэм'ер-міністра Ігар Петрышэнка.
«Адпаведная сыстэма стымуляваньня ёсьць, яна прынятая. І тыя дадатковыя даручэньні, якія былі дадзены ўраду кіраўніком дзяржавы, яны ўжо цяпер у стадыі рэалізацыі. І мы, я думаю, выпрацуем яшчэ дадатковыя меры, зьвязаныя са стымуляваньнем тых лекараў, якія стаяць на перадавой у барацьбе з каранавірусам», — казаў Петрышэнка.
Паводле яго, гэтыя меры закрануць ня толькі лекараў, але «і мэдсясьцёр, і іншы пэрсанал, задзейнічаны ў гэтым працэсе».
Петрышэнка таксама адзначыў, што ў краіне значна ўзрос попыт на маскі: сёньня іх выпускаюць 450-500 тысяч штук на суткі, але ў канцы наступнага тыдня плянуецца выйсьці на 1 мільён, а яшчэ праз паўтара — на 2 мільёны кожныя суткі.
Для лекараў робяць спэцыяльныя касьцюмы, акуляры і маскі.
«Усе тыя патрэбы, якія ёсьць у нашым грамадзтве, яны будуць у поўнай ступені задаволеныя», — падкрэсьліў віцэ-прэм'ер.
Ён таксама паведаміў, што за суткі ў краіне робіцца 2,5 тысячы тэстаў на каранавірус, на наступным тыдні гэтая колькасьць узрасьце да 3,5 тысяч.
«За дзень мы робім каля 700 тэстаў. Значыць, у нас неабходныя запасы тэстаў ёсьць, і яны актыўна выкарыстоўваюцца для таго, каб своечасова выявіць хворых асобаў», — сказаў Петрышэнка.
Менскае мора ў нядзелю альбо самаізаляцыя па-беларуску. Фотарэпартаж
Негледзячы на эпідэмію і заклікі лекараў заставацца дома, шмат менчукоў (і ня толькі) скарысталіся сонечным надвор’ем і выходным днём каб наведаць Менскае мора. Тое, што мы пабачылі, у фотарэпартажы Свабоды.
Менскае мора ў нядзелю альбо самаізаляцыя па-беларуску. Фотарэпартаж
Беларусь і Расея спынілі чыгуначныя зносіны ў сувязі з пандэміяй каранавірусу
Расейская чыгунка адмяніла апошнія цягнікі міжнародных зносінаў — у Беларусь.
Ад пачатку распаўсюду каранавірусу Расея спыніла курсіраваньне цягнікоў у два дзясяткі краін і непрызнаных тэрыторый — Абхазію, Аўстрыю, Азэрбайджан, Італію, Казахстан, Кітай, КНДР, Кіргізію, Латвію, Літву, Малдову, Манголію, Нямеччыну, Польшчу, Таджыкістан, Узбэкістан, Украіну, Францыю, Фінляндыю, Чэхію, Эстонію. Цяпер у гэты пералік дадалася і Беларусь.
Акрамя таго, спыненыя зносіны з расейскім эксклявам — Калінінградам, гаворка пра транзытныя празь Беларусь і Літву цягнікі Калінінград — Масква, а таксама Калінінград — Санкт-Пецярбург.
Раней Беларуская чыгунка паведаміла, што з 5 красавіка адмяняецца курсіраваньне цягнікоў Менск — Масква, а з 6 красавіка на няпэўны час прыпыняюцца чыгуначныя зносіны паміж Берасьцем і Санкт-Пецярбургам.
Прэм’ер-міністар Ірляндыі будзе працаваць лекарам
Леа Варадкар зарэгістраваўся лекарам. Раз у тыдзень ён будзе дапамагаць мэдычным работнікам змагацца з пандэміяй каранавірусу, паведамляе The Irish Times.
«Доктар Варадкар вярнуўся ў сьпіс лекараў у мінулым месяцы, — сказаў службы аховы здароўя. — Многія чальцы яго сям’і і сябры працуюць у сфэры аховы здароўя. Ён хацеў дапамагчы нават у невялікай ступені», — дадаў ён.
41-гадовы прэмʼер-міністар Ірляндыі працаваў лекарам у Дубліне. У 2010 годзе ён атрымаў кваліфікацыю сямейнага лекара, перш чым кінуў мэдыцыну, каб стаць палітыкам, а затым стаў кіраўніком урада. Згодна з The Irish Times, прэмʼер-міністар, верагодна, будзе аказваць тэлефонную падтрымку людзям, якія паведамляюць пра сымптомы каранавіруснай інфэкцыі.
Бацька Варадкара, Ашок, індыйскі імігрант, быў сямейным лекарам, а яго маці, Мірыям, была мэдсястрой. Яго партнэр Мэцью Барэт — кардыёляг.
У мінулым месяцы службы аховы здароўя Ірляндыі зьвярнуліся да ўсіх работнікаў, якія яшчэ не зарэгістраваныя. Адказалі тысячы мэдсясьцёр, лекараў, студэнтаў-мэдыкаў. Некаторыя зь іх выйшлі з пэнсіі, іншыя вярнуліся з-за мяжы.
«Як Лукашэнка сваімі заявамі зноў абнуліў імідж Беларусі». Піша Віталь Цыганкоў
У 2015 годзе ў Беларусі былі вызваленыя апошнія палітвязьні і паступова пачаўся працэс «нармалізацыі» стасункаў з Захадам. Акрамя відавочнага геапалітычнага аспэкту (штуршок нармалізацыі быў дадзены пасьля анэксіі Расеяй Крыму і вайны ў Данбасе), немалаважным выглядаў і інфармацыйны бок.
Некалькі гадоў афіцыйны Менск настойліва пераконваў замежнапалітычных партнэраў, што зь Беларусьсю можна мець справу, што тут сучасная краіна зь вялікім ІТ-сэктарам, стабільным кіраўніцтвам, якое папраўдзе зусім не цураецца пэўных прагрэсіўных думак і гатовае ўліцца ў міжнародную супольнасьць. Беларускія дыпляматы імкнуліся прадставіць краіну як надзейнага і стабільнага партнэра, які паважае міжнародныя нормы, дзейнічае без усялякіх выбрыкаў і непрыемных сюрпрызаў.
А тут — каранавірус. І выявілася, што зноў увесь сьвет ідзе «не ў нагу», і толькі адзін аматар лазьні, хакею і козачак — «у нагу».
У Нямеччыне чацьвёрты дзень запар падае колькасьць новых інфэкцыяў
За апошнія 24 гадзіны колькасьць інфікаваных каранавірусам SARS-CoV-2 у Нямеччыне павялічылася на 3677 чалавек. Агульная колькасьць заражаных у краіне павялічылася да 95 391 паводле дадзеных Інстытута Робэрта Коха.
Нядзеля стала чацьвёртым днём запар, калі колькасьць новых выяўленых інфэкцый у Нямеччыне падае, адзначае Reuters.
Напярэдадні там было выяўлена 5936 каранавірусных інфэкцый.
Колькасьць ахвяр Covid-19 у Нямеччыне павялічылася на працягу дня на 92, да 1434. Па колькасьці выяўленых каранавірусных інфэкцый Нямеччына займае трэцяе месца ў Эўропе — пасьля Гішпаніі і Італіі. У сваю чаргу, па колькасьці ахвяр Covid-19 краіна зьяўляецца шостай у Эўропе.
«Жахлівая ўспышка гвалту ў сем’ях» адбылася на фоне карантынаў, — генэральны сакратар ААН
Генэральны сакратар Арганізацыі аб’яднаных нацыяў Антонію Гутэрыш выступіў 5 красавіка з заклікам абараніць жанчын, якія трапілі ў пастку ва ўласных хатах — сам-насам з гвалтаўніком.
Разам з колькасьцю выпадкаў хваробы COVID-19 расьце і колькасьць выпадкаў хатняга гвалту, адзначыў Гутэрыш, і яна расьце настолькі хутка, што ён быў вымушаны выступіць з асобным зваротам пра гэта.
Яшчэ нядаўна Гутэрыш выступаў з заклікам да краінаў, якія ваююць, каб тыя склалі зброю і змагаліся з агульным ворагам — каранавірусам.
«Але гвалт не абмяжоўваецца полем бою, — адзначыў Генэральны сакратар ААН. — Многіх жанчын і дзяўчат небясьпека чакае там, дзе яны павінны адчуваць сябе ў поўнай бясьпецы: ва ўласным доме».
Мастак надзеў маскі на дрэвы ў цэнтры Менску
Індыя ператварае цягнікі ў шпіталі. Упершыню за 167 гадоў чыгунка закрытая
Упершыню за 167 гадоў у Індыі прыпыненая чыгунка. Да 14 красавіка 20 тысяч старых складаў ператвораныя ў аддзелы для людзей, інфікаваных каранавірусам.
У першыя два тыдні будзе падрыхтавана 5000 філіялаў. Кожны вагон зможа разьмясьціць 16 пацыентаў, мэдсясьцёр і абсталяваньне.
Індыйская чыгуначная сетка зьяўляецца чацьвёртай па велічыні ў сьвеце. Гэта найбуйнейшы працадаўца ў краіне. Нягледзячы на тое, што ў Індыі было зарэгістравана толькі 4288 выпадкаў каранавіруса і 117 выпадкаў сьмерці, мабільныя палаты могуць падтрымаць сыстэму аховы здароўя ў выпадку рэзкага павелічэньня захворваньняў.
Карыкатура паводле рэальных «рэкамэндацыяў» Лукашэнкі
Лукашэнка параіў есьці тлустае «супраць каранавірусу». Мэдыкі раяць адваротнае
У Беларусі пацьвердзілі 700 выпадкаў каранавірусу
Міністэрства аховы здароўя Беларусі апублікавала ў сваім Telegram-канале статыстыку выпадкаў COVID-19 у Беларусі на 6 красавіка. Як раней тлумачыла міністэрства, гэтыя лічбы актуальныя на 8 гадзін раніцы.
Паводле міністэрства, цяпер:
- 634 чалавекі з каранавіруснай інфэкцыяй «на стацыянарным лячэньні»;
- асноўная частка зь іх — «кантакты першага ўзроўню», якія на момант выяўленьня вірусу ўжо былі ў стацыянарах;
- у большасьці хвароба працякае ў лёгкай або сярэдняй форме;
- 53 чалавекі выпісаныя здаровымі;
- 13 чалавек памерлі, яны мелі «шматлікія хранічныя захворваньні, абцяжараныя каранвіруснай інфэкцыяй»;
- міністэрства не публікуе агульнай колькасьці зафіксаваных выпадкаў COVID-19, але калі скласьці 634 на лячэньні + 53 выпісаныя + 13 памерлых, выходзіць роўна 700 выпадкаў — 138 новых за дзень;
- «звыш 40 тысяч» тэстаў на каранавірусную інфэкцыю правялі ад пачатку эпідэміі;
- агулам за апошнія два дні выпісалі 355 пацыентаў, якія былі на розных формах кантролю і лячэньня ў сувязі ў каранавірусам.
Днём раней Мінздароўя паведамляла пра 562 выпадкі: 502 чалавекі пад назіраньнем мэдыкаў, 52 выпісаныя пасьля лячэньня, 8 памерлі. Два дні таму было 440 выпадкаў і 5 сьмерцяў, тры дні таму — 351 выпадак і 4 сьмерці.
Тэмпы выяўленьня выпадкаў COVID-19 у Беларусі істотна адрозьніваюцца ад эўрапейскіх краінаў з насельніцтвам каля 10 мільёнаў чалавек
Міністэрства аховы здароўя Польшчы за свой кошт застрахуе лекараў ад каранавірусу. І гэта ня ўсё
Урад Польшчы рыхтуе новыя правілы для лекараў і іншых службаў, якія павінны дапамагчы ў барацьбе з каранавірусам, паведамляе Польскае радыё.
У Міністэрстве аховы здароўя паведамілі, што ўсіх лекараў пачнуць масава страхаваць на выпадак, калі яны ці чальцы іх сем’яў заразяцца каранавірусам. Выдаткі на дадатковае страхаваньне мэдыкаў пакрые Міністэрства аховы здароўя.
У ведамстве таксама нагадалі, што, згодна з палажэньнямі пакета ўрадавай дапамогі «Антыкрызісны шчыт», лекары, якія захварэюць падчас эпідэміі, атрымаюць дапамогу ў памеры 100% іх зарплаты. Раней у Нацыянальным фондзе аховы здароўя паведамілі аб гарантаваным бясплатным доступе мэдпэрсаналу да тэставаньня на каранавірус.
На сёньняшні дзень у Польшчы выяўлена 4021 выпадкі заражэньня каранавіруснай інфэкцыяй, 98
Украіна зрабіла больш жорсткімі абмежаваньні ў рамках барацьбы з СOVID-19
6 красавіка ва Ўкраіне пачалі дзейнічаць новыя абмежаваньні ў рамках барацьбы з каранавірусам COVID-19. Цяпер у грамадзкіх месцах нельга зьяўляцца без маскі або рэсьпіратара.
Таксама забаронена хадзіць групамі больш за дзьве асобы, за выключэньнем суправаджэньня дзяцей. Дзецям да 14 гадоў забаронена зьяўляцца ў грамадзкіх месцах, уключаючы дзіцячыя пляцоўкі. Акрамя таго, цяпер нельга наведваць паркі, сквэры і іншыя зоны адпачынку.
Людзі старэйшыя за 60 гадоў павінны самаізалявацца. Гэтая забарона не распаўсюджваецца на мэдыкаў і работнікаў прадпрыемстваў крытычнай інфраструктуры. Акрамя таго, пажылыя людзі могуць выйсьці ў краму за прадуктамі або выгуляць хатнюю жывёлу на адлегласьці ня больш за два кілямэтры ад месца самаізаляцыі. Забарона на працу мэтро застаецца ў сіле.
У Горадзенскім мэдычным унівэрсытэце павялічылі час самастойнай працы студэнтаў
Рэктар Горадзенскага дзяржаўнага мэдычнага ўнівэрсытэту Віктар Сьняжыцкі расказаў, які захады робяць у вучэльні, каб абараніць студэнтаў і выкладчыкаў ад каранавірусу.
Па ягоных словах, на дыстанцыйнае навучаньне ўнівэрсытэт ня можа перайсьці без узгадненьня зь Міністэрствам адукацыі. Пакуль такога рашэньня няма.
Адначасна ўнівэрсытэт зрабіў тыя захады, якія можа рабіць самастойна:
- разьмежаваў патокі студэнтаў, каб яны менш сустракаліся адны з аднымі;
- зьмяніў лягістыку перасоўваньня студэнтаў (яны менш езьдзяць);
- павялічыў колькасьць кантраляванай самастойнай працы: студэнты праз электронны адукацыйны партал атрымліваюць мэтадычныя комплексы і заданьні, якія потым правяраюць выкладчыкі.
Сьняжыцкі паведаміў, што адну іх студэнтку, якая прыехала зь Віцебску ў Горадню, шпіталізавалі з падазрэньнем на каранавірус. У кантакце зь іншымі студэнтамі яна не была. Вядома, што пазытыўнага выніку ейнага тэста на каранавірус няма.
Гэтая публікацыя падрыхтаваная з выкарыстаньнем інфармацыі БелаПАН.
«Мы не камэнтуем». Працягвае працу санаторый «Пралеска», пасьля лячэньня ў якім памёр чалавек з каранавірусам
6 красавіка стала вядома пра сьмерць мужчыны, які з 5 па 21 сакавіка адпачываў у санаторыі «Пралеска» пад Менскам, расказала дачка памерлага.
Паводле яе, бацьку стала дрэнна ў канцы знаходжаньня ў санаторыі. У яго павысілася тэмпэратура, родныя забралі захварэлага дадому. 26 сакавіка мужчыну шпіталізавалі ў 3-ю лякарню Менску. Па словах дачкі памерлага, там яму зрабілі аналіз на каранавірус, які даў станоўчы вынік. Паводле інфармацыі tut.by, некалькі супрацоўнікаў санаторыя «Пралеска» знаходзяцца на карантыне.
«Мы нічога не камэнтуем, — паведамілі ў санаторыі Свабодзе. — Уся інфармацыя знаходзіцца на сайце Міністэрства аховы здароўя, мы не даём ніякіх камэнтароў».