У сеціве зьбіраюць подпісы з патрабаваньнем ад Міністэрства аховы здароўя даваць праўдзівую інфармацыю пра сытуацыю з каранавірусам у Беларусі, а ад уладаў — не забараняць лекарам гаварыць пра тое, што адбываецца ў лякарнях, і дазволіць мэдустановам прымаць спонсарскую дапамогу без абмежаваньняў і перасьледу з боку пракуратуры.
«Поўнае і своечасовае абнаўленьне інфармацыі дазволіць людзям прымаць узважаныя рашэньні, як паклапаціцца пра сваю бясьпеку і сваіх блізкіх», гаворыцца ў пэтыцыі, ініцыятарам якой выступіў сустаршыня кампаніі «Гавары праўду» Андрэй Дзьмітрыеў. Ён лічыць, што недастатковасьць інфармацыі сее паніку сярод людзей, якія пачынаюць паводзіць сябе, зыходзячы са здагадак, а не аб’ектыўнага становішча.
Ад Міністэрства аховы здароўя ў пэтыцыі патрабуюць штодня даваць інфармацыю пра:
- колькасьць хворых з дыягназам COVID-19 па Беларусі, з разьбіўкай па рэгіёнах і гарадах, з указаньнем узроставых груп;
- колькасьць хворых на пнэўманію агулам, у рэгіёнах і гарадах, ва ўзроставых групах;
- колькі хворых з дыягназамі «каранавірус» і «пнэўманія» знаходзяцца ў шпіталях, а колькі лечацца дома,
- колькі зроблена тэстаў на каранавірус у рэгіёнах і гарадах, наяўнасьць тэстаў у рэгіёнах,
- колькі чалавек памерлі ад каранавірусу і колькі — ад пнэўманіі (агулам, у рэгіёнах і гарадах з указаньнем узроставых груп).
Таксама ў пэтыцыі, якую, акрамя Мінздароўя, накіруюць у Савет Міністраў і Генпракуратуру Беларусі, патрабуюць:
- Зьняць зь лекараў абмежаваньні на даваньне інфармацыі СМІ і грамадзтву пра заражаных у іхных установах, стан спраў у лякарнях і патрэбы ў сродках засьцярогі.
- Міністэрству аховы здароўя дазволіць лякарням прымаць спонсарскую дапамогу ў спрошчаным парадку (з моманту зьяўленьня першых хворых на COVID-19 у Беларусі), а Генпракуратары, у выпадку ўзьнікненьня пытаньняў — зьвяртацца да чыноўнікаў міністэрства і не адцягваць лекараў ад працы.
Пэтыцыю можна папісаць тут.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ