Улады Таджыкістану вырашылі спыніць заняткі ў школах і чэмпіянат краіны ў футболе з абгрунтаваньнем «у сувязі з пагрозай эпідэміі», нягледзячы на тое, што афіцыйна пакуль не абвешчана пра выпадкі каранавірусу ў краіне.
Вымушаныя канікулы ў сувязі абвясьцілі ўва ўсіх дашкольных і агульнаадукацыйных установах з 27 красавіка па 10 траўня. Заняткі ў школах аднавілі 1 красавіка, тады ўлады запэўнівалі, што гэта бясьпечна.
На двухтыднёвыя вакацыі, паводле міністэрства адукацыі, адправяцца больш за 2 мільёны 245 тысяч дзяцей і падлеткаў і 143 тысячы настаўнікаў і пэдагогаў. Заняткі ў ВНУ працягнуць як звычайна.
Пандэмія каранавірусу ў Беларусі і ў сьвеце. Як разьвіваюцца падзеі
На пасяджэньні Рэспубліканскага штабу прафіляктыкі каранавірусу COVID-19 таксама было вырашана забараніць ува ўсёй краіне арганізацыю і правядзеньне ўсіх відаў масавых імпрэзаў. Двухтыднёвая паўза наступіла ў чэмпіянаце краіны ў футболе.
Пакуль улады Таджыкістану адмаўляюць факты інфікаваньня каранавірусам, хоць з пачатку лютага ў карантын з падазрэньнем на COVID-19 былі зьмешчаныя больш за 8 тысяч чалавек.
ГЛЯДЗІЦЕ ТАКСАМА: «Безадказныя» крамы дазволілі закрываць на 90 дзён. Такіх «ня больш за 10%», — віцэ-прэм’ер