Каля 140 мільёнаў жыхароў Індыі страцілі працу з прычыны ўведзеных урадам абмежаваньняў для барацьбы з распаўсюджваньнем каранавіруснай інфэкцыі. Пра гэта піша газэта The Financial Times са спасылкай на ацэнку няўрадавага Цэнтру маніторынгу індыйскай эканомікі.
Каранавірус у Беларусі і ў сьвеце. Як разьвіваюцца падзеі >>
Гэта параўнальна з усім насельніцтвам такой краіны як Расея.
Звальненьні павысяць узровень беспрацоўя ў Індыі з 8 да 26 адсоткаў.
У краіне з насельніцтвам больш за 1 мільярд 300 мільёнаў чалавек ужо 35 дзён дзейнічаюць жорсткія карантынныя захады, пацьверджаныя 33 тысячы выпадкаў інфікаваньня каранавірусам, 1074 чалавека памерлі.
Рост пацьверджаных выпадкаў хваробы ў краіне працягваецца зь нязначным запавольваньнем, адзначае агенцтва Bloomberg. У найбліжэйшы час у краіне чакаецца зьмякчэньне карантыну, і мэдычныя экспэрты асьцерагаюцца, што гэта можа прывесьці да рэзкага росту колькасьці хворых.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ