Калі Масква не пацьвердзіць сваю гатоўнасьць, то ў дачыненьні да Расеі павінны быць прыняты меры, якія краіны Захаду абмяркоўвалі раней, у прыватнасьці новыя санкцыі.
На мінулым тыдні прэзыдэнт ЗША Дональд Трамп казаў, што прыкладна праз 2 тыдні зможа ацаніць, наколькі бакі гатовыя да мірнага ўрэгуляваньня, і ў адпаведнасьці з гэтым распачне тыя ці іншыя дзеяньні. Ён згадаў аб санкцыях і павышэньні пошлін у дачыненьні да Расеі і яе партнэраў, не выключыўшы і ціску на Ўкраіну.
Непасрэдна пра 1 верасьня як пра крайні тэрмін для Расеі Трамп ці лідэры краін ЭЗ не казалі.
Зяленскі таксама закрануў пытаньне аб гарантыях бясьпекі для Ўкраіны. Па ягоных словах, іх неабходна абмяркоўваць на ўзроўні лідэраў. Таксама Зяленскі выказаў меркаванне, што гарантыі неабходна будзе ратыфікаваць у парлямэнтах краінаў-партнэраў.
На думку Зяленскага, гарантыі павінны ўключаць у сябе тры асноўныя элемэнты — захаваньне колькасьці і ўзбраеньне ўкраінскай арміі, гатоўнасьць замежных партнэраў падтрымаць Украіну ў выпадку новай агрэсіі, а таксама выкарыстаньне замарожаных на Захадзе расейскіх актываў на аднаўленьне Ўкраіны. Зяленскі пры гэтым не згадаў аб разьмяшчэньні войскаў заходніх краін ва Ўкраіне.
Па словах Зяленскага, на гэтым тыдні кіраўнік Офіса прэзыдэнта Ўкраіны Андрэй Ярмак правядзе ў Вашынгтоне перамовы з высокапастаўленымі прадстаўнікамі адміністрацыі Дональда Трампа. Па дадзеных Politico, можа абмяркоўвацца магчымасьць правядзеньня перамоваў паміж Расеяй і Украінай на ніжэйшым узроўні. Раней некалькі раундаў такіх кансультацый у Стамбуле не прынесьлі вынікаў — акрамя дамоўленасьцей аб абменах палоннымі і целамі загінулых.
Раней прадстаўнікі ЗША заявілі аб гатоўнасьці ўдзельнічаць у прадастаўленьні гарантый бясьпекі Ўкраіне, але адзначылі, што «ільвіную долю» павінна забясьпечыць Эўропа.
Прадстаўніца МЗС Расеі Марыя Захарава ў пятніцу нэгатыўна адгукнулася аб абмеркаваньнях гарантый бясьпекі, а прэс-сакратар Крамля Дзьмітрый Пяскоў зноў паўтарыў, што сустрэча Ўладзіміра Пуціна зь Зяленскім пакуль не падрыхтавана.