У размове са Свабодай былы вайсковец, адзін з былых лідэраў «Белага легіёну», а цяпер кіраўнік хабу «Робім разам» Сяргей Бульба назваў інцыдэнт «спробай зьнішчыць беларускія нацыянальныя цэнтры».
Праўдападобна, што гэта можа быць працягам гісторыі з канфліктам вакол «Беларускага моладзевага хабу», які выселілі з памяшканьня ў Варшаве на плошчы Канстытуцыі, 6 у 2023 годзе. Тады кіраўнік «Беларускага моладзевага хабу» Аляксандар Лапко назваў гэта «рэйдэрскім захопам». На гэтым месцы пад іншай назвай — «Робім разам» — хаб запрацаваў ужо ў новым фармаце. Андрэй Лапко стварыў новую прастору Belarusian Youth Hub Foundation ў іншым месцы. У лістападзе—снежні 2024 года стало вядома, што дамова «Робім разам» аб арэндзе прасторы на плошчы Канстытуцыі, 6 скончылася.
Сяргей Бульба кажа, што на дзейнасьць хабу «скаргі ўвесь час пісалі, што ў нас цір у падвеле, што дзяцей зброі вучаць. Мы ж ня можам даведацца, хто канкрэтна скаргу падпісваў. Ня ведаем, хто канкрэтна, але паліцэйскі сказаў, што быў дэпутацкі запыт, што ў цэнтры Варшавы тут баевікоў рыхтуюць».
Бульба пацьвердзіў, што летась увосень скончыўся тэрмін арэнды памяшканьня. Паводле яго хаб спрабуе працягнуць арэнду.
— Мы загадзя падалі па-за конкурсам, што як тыя, хто арэнду меў, маем дагэтуль прыярытэт. Нам удвая паднялі кошты арэнды. Мы напісалі скаргу ў канцылярыю прэм’ер-міністра і нам зрабілі Zoom з прадстаўнікамі гарадзкіх уладаў. Гарадзкія ўлады сказалі, што ў іх ёсьць нейкія сакрэтныя матэрыялы па нас, якія яны не могуць паказаць. І відаць усё адбываецца на падставе сталых скаргаў, што ў нас тут зброя. А сёньня быў цэлы налёт — 15 паліцэйскіх, яшчэ 15 ваякаў, машыны разьмініраваньня.
Што будзе далей, ці гэта зьвязана з магчымым высяленьнем хаба? Сяргей Бульба адказвае:
— У панядзелак, аўторак мы будзем зь імі разьбірацца. Яны запрасілі нас на сустрэчу, таму што я адмовіўся што-небудзь падпісваць, таму што мяне нават не запрашалі ў сярэдзіну. Каб яны знайшлі баявую зброю, то ў я б з вамі ўжо не размаўляў. А так яны знайшлі нейкія страйкбольныя рэчы, як бы навучальныя рэчы. Мы гэтым карыстаемся. Гэта абсалютна нармальна. Гэта дазволена. Гэта тое, што можна купіць у любой мілітарнай краме.
- «Беларускі моладзевы хаб» адкрыўся 28 лістапада 2021 года і стаў цэнтрам прыцягненьня дзясяткаў беларускіх ініцыятыў, а дзякуючы свайму разьмяшчэньню стаў адным з самых наведвальных беларускіх месцаў у Варшаве. Маторам гэтай прасторы была група актывістаў на чале з Аляксандрам Лапко і Станіславай Гліньнік.
- Праблемы ў хабе пачаліся публічна раніцай 2 жніўня 2023 года, калі група мужчын на чале з актывістам Сяргеем Бульбам узламала ўваходныя дзьверы і фактычна захапіла памяшканьне. Аказалася, што з 26 ліпеня 2023 года старшынёй праўленьня асацыяцыі «BIAŁORUSKI MŁODZIEŻOWY HUB», якая арандуе памяшканьне ў горада Варшава, зьяўляецца Сяргей Бульба. Раней гэтую пасаду займаў Аляксандр Лапко.
- Лапко і Гліньнік былі вымушаны адкрыць новую пляцоўку пад той жа назвай «Беларускі Моладзевы Хаб» у іншым месцы па адрасе вуліца Dożynkowa 6A і пачынаць усё з нуля. Як указана на сайце, цяпер Хаб зьяўляецца супольным праектам фундацыі «Linking Media» і фонду «Belarusian Youth Hub». Бульба ж пераназваў пляцоўку на Пляцы Канстытуцыі ў «Робім разам».
- У чэрвені 2024 году былы вайсковец, заснавальнік «Белага легіёну» Сяргей Бульба ўзначаліў «Паспалітае рушэньне». «Паспалітае рушэньне» узьнікла ў верасьні 2022 году як спартова-адукацыйная арганізацыя ў замежжы. Адной зь яе мэтаў было адраджэньне беларускіх вайсковых традыцыяў.
- У жніўні 2025 году арганізацыя «Паспалітае рушэньне», створанае ў верасьні 2022 году пад эгідай прадстаўніка Аб’яднанага пераходнага кабінэта ў пытаньнях абароны і нацыянальнай бясьпекі Валера Сахашчыка, паведаміла аб спыненьні сваёй дзейнасьці.