У законе «рашызм» вызначаецца як «новая разнавіднасьць таталітарнай ідэалёгіі» і практык, якія ляжаць у аснове рэжыму ў Расеі. Гэтая ідэалёгія грунтуецца на спалучэньні традыцый расейскага шавінізму і імпэрыялізму, а таксама практык камуністычнага рэжыму СССР і нацыянал-сацыялізму.
Паводле дакумэнту, адна з мэтаў расейскай агрэсіі, якая пачалася ў 2014 годзе, — пазбавіць украінцаў іх гістарычнай памяці шляхам маніпуляваньня інтэрпрэтацыямі гістарычных падзей.
Закон вызначае, што дзяржаўнай палітыкай Украіны ёсьць
- прызнаньне злачыннасьці таталітарных рэжымаў, расейскай імпэрскай палітыкі і рашызму;
- недапушчэньне апраўданьня генацыду, злачынстваў супраць чалавечнасьці, агрэсіі, ваенных злачынстваў, парушэньняў правоў чалавека.
З публічных месцаў прыбяруць усе сымбалі расейскай і савецкай імпэрскай палітыкі.
ГЛЯДЗІЦЕ ТАКСАМА: Вярхоўная Рада Ўкраіны прызнала «рашызм» дзяржаўнай ідэалёгіяй РасеіТэрмін «рашызм» у тым значэньні, якое замацавана ў законе, пачаў выкарыстоўвацца пасьля ўварваньня расейскіх войскаў у Грузію ў жніўні 2008 году, нагадвае «Настоящее время».
Пазьней, пасьля анексіі Крыму ў 2014 годзе, ён стаў шырока ўжывацца ва Ўкраіне, а з пачаткам поўнамаштабнага ўварваньня ў лютым 2022 году атрымаў сусьветнае распаўсюджаньне.
У траўні 2023 году Вярхоўная Рада Ўкраіны прыняла заяву, якая назвала «рашызм» афіцыйнай ідэалёгіяй Расеі. Пасьля гэтага парлямэнтары краінаў NATO таксама выкарысталі гэты тэрмін у сваёй рэзалюцыі, прызнаўшы расейскі рэжым тэрарыстычным.
ГЛЯДЗІЦЕ ТАКСАМА: Украінцы павіншавалі беларускіх памежнікаў з 9 траўня плякатамі пра перамогу над «рашызмам» і гімнам Украіны