Праўладныя партыі Беларусі і Расеі «Белая Русь» і «Адзіная Расея» падпісалі ў Маскве пратакол аб міжпартыйнай супрацы ў 2025-2027 гадах.
Як паведаміў дзяржаўны тэлеканал СТВ, партыі будуць «разам супрацьдзейнічаць нэакаляніялізму і ўмацоўваць палітычны сувэрэнітэт, садзейнічаць расшырэньню памежнага і міжрэгіянальнага супрацоўніцтва».
«Палітыка заходнеэўрапейскіх дзяржаў, іх сатэлітаў па сьціраньні, фальсыфікацыі гістарычнай памяці, выкрыўленьні гісторыі і, у першую чаргу, Вялікай айчыннай вайны, праводзіцца вельмі актыўна. Мы адзначаем гэтыя пагрозьлівыя тэндэнцыі, агрэсіўную палітыку нашых нядобразычліўцаў супраць Расеі і Беларусі», — працытавала выданьне Аляксандра Шпакоўскага, аднаго з прадстаўнікоў партыі «Белая Русь» і прапагандыста.
ГЛЯДЗІЦЕ ТАКСАМА: Міжнародны саюз беларускіх пісьменьнікаў: у першай палове 2025 году русыфікацыйныя працэсы ў Беларусі ўзмацніліся- Пасьля 2020 году ў гістарычнай палітыцы Беларусі адбыўся радыкальны пералом. Так, 2022 год быў абвешчаны ў Беларусі годам гістарычнай памяці. Лукашэнка стварыў пры сваёй адміністрацыі Рэспубліканскую раду па гістарычнай палітыцы. У ВНУ зьявілася новая дысцыпліна «Гісторыя беларускай дзяржаўнасьці». Масавае зьнішчэньне беларусаў нацыстамі і іх памагатымі падчас Другой сусьветнай вайны афіцыйна прызналі «генацыдам беларускага народу», Генпракуратура пачала расьсьледаваньне адпаведнай крымінальнай справы. Новыя тэндэнцыі ў гістарычнай палітыцы заўважныя і ў адносінах да Рэчы Паспалітай: Лукашэнка назваў гэты пэрыяд беларускай гісторыі «акупацыяй беларускай зямлі палякамі» і «этнацыдам беларусаў».
- 1 лютага 2024 году на пасяджэньні праграмнай камісіі «Адзінай Расеі» амбасадар Расеі ў Менску Барыс Грызлоў заявіў, што Расея і Беларусь дамовіліся аб стварэньні адзіных падручнікаў па гісторыі для школ і ВНУ.
- 25 студзеня 2024-га ў Менску падпісалі мэмарандум аб узаемаразуменьні паміж Міжведамаснай камісіяй па гістарычнай асьвеце пры прэзыдэнце Расеі і Рэспубліканскай радай па гістарычнай палітыцы пры адміністрацыі Аляксандра Лукашэнкі. У адпаведнасьці зь ім «ствараецца сумесная расейска-беларуская камісія па гісторыі, закліканая садзейнічаць каардынацыі двухбаковых намаганьняў, зьвязаных з абаронай гістарычнай праўды, захаваньнем памяці аб нашай агульнай гісторыі».