БРСМ, міліцыя і «Дынама»: як у Менску прайшоў суботнік у часе пандэміі. ФОТА
Нягледзячы на рэкамэндацыі САЗ для беларускіх уладаў адмовіцца ад правядзеньня масавых мерапрыемстваў, у Беларусі адбыўся рэспубліканскі суботнік. Па папярэдніх дадзеных, у ім прынялі ўдзел за 2,3 мільёна беларусаў, сабрана каля 8,7 мільёна рублёў, паведаміў журналістам намесьнік прэм'ер-міністра Беларусі Ўладзімір Кухараў.
Фотарэпартаж Свабоды зь Менску.
Лекар-вірусоляг: «Другая хваля пандэміі непазьбежная»
Вірусоляг унівэрсытэту ў Лянкастары Махамад Мунір папярэджвае пра рызыку заўчаснага зьняцьця абмежаваньняў і кажа, што другі раз увесьці локдаўн будзе нашмат цяжэй.
АПТЭЧКА. 29 новых адказаў пра каранавірус ад Сусьветнай арганізацыі здароўя, мэдычных аўтарытэтаў і з найлепшай практыкі
Пандэмія каранавірусу ахапіла ўсе кантынэнты і ўжо забрала дзясяткі тысячаў жыцьцяў. Як засьцерагчыся ад хваробы, як быць з працай, як захаваць спакой і раўнавагу. Вось адказы на многія пытаньні, што ўзьнікаюць падчас пандэміі. Гэтая інфармацыйная база будзе ўвесь час дапаўняцца.
САЗ: Няма доказаў таго, што на COVID-19 нельга захварэць паўторна
Сусьветная арганізацыя здароўя заявіла ў суботу ў рэгулярным навуковым аглядзе, што ў цяперашні час «няма доказаў» таго, што людзі, якія ачунялі ад каранавірусу, абаронены ад паўторнага заражэньня гэтай інфэкцыяй — нават калі ў іх ёсьць антыцелы супраць яе, паведамляе Reuters.
У сваёй заяве агенцтва здароўя ААН засьцерагае ад выдачы «пашпартоў імунітэту» або «сэртыфікатаў без рызыкі» для інфікаваных людзей. Паводле САЗ, гэта практыка можа фактычна павялічыць рызыку распаўсюджваньня COVID-19, бо такія людзі могуць ігнараваць стандартныя рэкамэндацыі.
САЗ таксама нагадала, што дакладнасьць і надзейнасьць тэстаў на антыцелы да каранавірусу ня ёсьць абсалютна пацьверджанымі.
Як паведамляе Reuters, на мінулым тыдні Чылі заявіла, што пачне раздаваць «пашпарты здароўя» людзям, якія, як лічыцца, акрыялі ад COVID-19. Пасьля праверкі, якая мае вызначыць наяўнасьць у іх антыцелаў да новага каранавірусу, яны могуць вярнуцца да звычайнага ладу жыцьця.
Але, па словах САЗ, «на дадзеным этапе пандэміі недастаткова дадзеных аб эфэктыўнасьці антыцела-апасродкаванага імунітэту, каб гарантаваць дакладнасьць „пашпартоў імунітэту“.
Людзі, якія лічаць, што ў іх ёсьць імунітэт да другой інфэкцыі, таму што яны атрымалі станоўчы вынік тэсту, могуць ігнараваць рэкамэндацыі органаў аховы здароўя. Таму выкарыстаньне такіх сэртыфікатаў можа павялічыць рызыкі далейшай перадачы каранавірусу».
Лукашэнка перанёс штогадовае пасланьне народу з прычыны «каранапсыхозу»
Падчас суботніку ў Гомельскай вобласьці кіраўнік Беларусі патлумачыў перанос штогадовага пасланьня народу і парлямэнту, паведамляе ананімны Telegram-канал «Пул первого», блізкі да прэс-службы Лукашэнкі.
Журналісты дзяржаўных СМІ спыталі ў Лукашэнкі, які 25 красавіка садзіць дрэвы ў аграгарадку Ляскавічы Петрыкаўскага раёна Гомельскай вобласьці, пра пасланьне народу і парлямэнту.
«Ведаеце, тут няма ніякай кансьпіралёгіі. Гэта пасланьне было заплянавана на сярэдзіну красавіка. Канкрэтнай даты не было. Як толькі гатова было б пасланьне, і яно адпавядала духу сёньняшняга дня, яно б прагучала ў сярэдзіне красавіка. Але сытуацыя з каранапсыхозам, інфэкцыямі, ну а потым абвешчанай пандэміяй, пагадзіцеся, ашаламляльна зьмянілі сытуацыю не толькі ў нашай краіне, але і ва ўсім сьвеце. Вось уявіце прэзыдэнта на трыбуне сёньня. І што ён можа сказаць? Я задаваў шмат пытаньняў, вы гэта чулі, што будзе з намі пасьля гэтага псыхозу інфэкцыі? Хто сёньня можа сказаць, што будзе? Ніхто», — цытуе Лукашэнку тэлеграм-канал.
Плюс 817 за дзень. Мінздароўя апублікавала новую статыстыку распаўсюду COVID-19 у Беларусі
Міністэрства аховы здароўя Беларусі 25 красавіка апублікавала ў сваім Telegram-канале статыстыку распаўсюду COVID-19 у Беларусі.
Паводле Мінздароўя, на раніцу 25 красавіка ў Беларусі зафіксавалі:
- агулам 9590 чалавек са станоўчым тэстам на COVID-19;
- 67 памерлых, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (удава аднаго з памерлых кажа, гэта ня так);
- 1573 выпісаных пацыентаў, у якіх была каранавірусная інфэкцыя;
- гэта значыць, за дзень выявілі яшчэ 817 выпадкаў і прызналі яшчэ 4 сьмерці;
- ад пачатку эпідэміі ў краіне зрабілі 139 295 тэстаў;
- колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісаныя дамоў на «амбуляторнае лекаваньне», не паведамляецца.
«Вельмі шмат пытаньняў з гэтым». Міністэрства адукацыі пра атэстацыю школьнікаў, якія засталіся дома
Першы намесьнік міністра адукацыі Ірына Старавойтава падчас «гарачай лініі» патлумачыла, якім чынам будуць атэстоўваць школьнікаў, якія ў сувязі з эпідэміялягічнай сытуацыяй у чацьвёртай чвэрці засталіся навучацца дома. Чытачка Свабоды прадставіла рэдакцыі запіс свайго званка.
Ірына Старавойтава патлумачыла, што для вываду гадавой адзнакі і раней дзейнічала правіла, якое цяпер актуалізавалася ў сувязі з тым, што вялікая колькасьць школьнікаў ня ходзіць у школу і навучаецца дома.
Сутнасьць яго наступная: пры выстаўленьні гадавой адзнакі сумуюцца адзнакі за тыя чвэрці, калі вучань хадзіў у школу, і сума дзяліцца на чатыры. То бок, калі вучаць атрымаў 10-кі ў першых трох чвэрцях, а цягам чацьвёртай навучаўся дома, то яго гадавая адзнака будзе роўная 7,5 (30÷4=7,5).
«Такі парадак вызначэньня дзейнічаў і раней, тут няма нічога новага, — адзначыла Старавойтава. — Але вельмі шмат пытаньняў, зьвязаных з гэтым. Таму будзе дадатковае растлумачэньне. Троху пазьней».
24 красавіка настаўнікі ў школах Беларусі са спасылкай на Міністэрства адукацыі атрымалі інфармацыю, што «у Міністэрстве прынята рашэньне не атэстоўваць у чацьвёртай чвэрці вучняў, якія па рашэньні законных прадстаўнікоў навучаюцца дома».
Настаўнікі просяць Мінадукацыі атэставаць вучняў, якія працягваюць вучыцца дома. Адкрыты ліст
Настаўніца расейскай мовы і літаратуры Ганна Севярынец (на фота) зьвярнулася да Міністэрства адукацыі з просьбай атэставаць вучняў, якія ў чацьвёртай чвэрці навучаюцца дома. Адкрыты ліст падпісалі больш за два дзясяткі настаўнікаў з розных гарадоў Беларусі.
Паводле аўтаркі ліста, 24 красавіка настаўнікі ў школах Беларусі са спасылкай на Міністэрства адукацыі атрымалі інфармацыю, што «у Міністэрстве прынята рашэньне не атэстоўваць у чацьвёртай чвэрці вучняў, якія па рашэньні законных прадстаўнікоў навучаюцца дома пры дапамозе інфармацыйна-камунікатыўных тэхналёгій: адзначаць у журналах іх адсутнасьць, не выстаўляць у класныя журналы адзнакі за дамашнія работы і тым самым зачыніць ім доступ да паўнавартаснага адукацыйнага працэсу».
«Я адчуваў сябе жахлівым крывадушнікам». Як каранавірус зьмяніў вясельлі беларусаў
Як граюць вясельле беларусы ў час, калі Сусьветная арганізацыя здароўя раіць ня ўдзельнічаць у масавых мерапрыемствах і трымаць дыстанцыю 1,5 мэтра?
«Я ўвесь гэты час адчуваў сябе жахлівым крывадушнікам: я вельмі не падтрымліваю адсутнасьць карантыну ў нашай краіне. Але — у нас хутка вясельле, як жа мы будзем рэалізоўваць усё заплянаванае ў карантыне?» — кажа малады.
Кіраўнікі дзяржаўных СМІ скрытыкавалі незалежныя мэдыя за асьвятленьне пандэміі каранавірусу
У чарговай праграме «Клюб рэдактараў» на тэлеканале «Беларусь 1» у пятніцу вечарам кіраўнікі дзяржаўных СМІ абрынуліся на незалежныя мэдыя за асьвятленьне сытуацыі з распаўсюдам каранавірусу ў Беларусі.
Ці не найбольш крытыкі адрасавалася Радыё Свабода — перадусім за публікацыю, у якой мы паказалі, які дзяржаўныя СМІ «не заўважылі» асноўных рэкамэндацый Сусьветнай арганізацыі здароўя, якіх у краіне не выконваюць.
Статыстыка на раніцу 25 красавіка
- На раніцу 25 красавіка ў сьвеце зафіксавалі звыш 2,83 мільёна выпадкаў COVID-19: звыш 925 тысяч у ЗША, 219 тысяч у Гішпаніі, амаль 193 тысячы ў Італіі, 159 тысяч у Францыі, 155 тысяч у Нямеччыне, 143 тысячы ў Вялікай Брытаніі, каля 105 тысяч у Турэччыне, 88 тысяч у Іране, каля 82 тысяч у Кітаі.
- Ад хваробаў, якія выклікаў новы каранавірус, у сьвеце памерлі 197 343 чалавекі. Зь іх 52 217 у ЗША, 25 969 у Італіі, 22 524 у Гішпаніі, 22 245 у Францыі, 19 506 у Вялікай Брытаніі, 6 679 у Бэльгіі, 5 760 у Нямеччыне, 5 574 у Іране, 4 632 у Кітаі.
- Выпісалі звыш 807 тысяч пацыентаў, якіх вылекавалі ад COVID-19. «Актыўных выпадкаў» хваробы застаецца амаль 1,83 млн, зь іх больш за 58 тысяч у цяжкім ці крытычным стане.
- У Беларусі, паводле афіцыйных зьвестак на 24 красавіка, пацьверджаныя 8773 выпадкі COVID-19 (плюс 751 за дзень). Ад каранавірусу ў Беларусі прызналі сьмерць 63 чалавек.
Губэрнатар Нью-Ёрку: каранавірус трапіў у ЗША з Італіі, а не з Кітаю
Губэрнатар Нью-Ёрку Эндру Куома ў пятніцу спаслаўся на дасьледаваньні, якія паказваюць, што штамы новага каранавірусу трапілі ў яго штат з Эўропы, а не з Кітаю, паведамляе агенцтва Reuters.
На думку Куомы, улады ЗША спазьніліся з забаронамі на ўезд і выезд з краіны. Губэрнатар спаслаўся на дасьледаваньне Паўночна-Ўсходняга ўнівэрсытэту, у якім навукоўцы падлічылі, што больш за 10 000 нью-ёркцаў маглі захварэць на каранавірус да таго часу, як у штаце быў зафіксаваны першы пацьверджаны выпадак 1 сакавіка.
Паводле навукоўцаў, Італія найбольш верагодная крыніца.
Паводле губэрнатара, шпіталізацыя па COVID-19 у чацьвер 23 красавіка склала 14 258, зьнізіўшыся дзясяты дзень запар. Куома паведаміў пра 422 новыя выпадкі сьмерці, што зьяўляецца самым нізкім паказьнікам за адзін дзень ад 31 сакавіка.
САЗ і сусьветныя лідэры паабяцалі сабраць сродкі для барацьбы з COVID-19
Прэзыдэнт Францыі Эманюэль Макрон, канцлер Нямеччыны Ангела Мэркель, прэзыдэнт Паўднёвай Афрыкі Сырыл Рамафоса і шэраг іншых палітыкаў і прадстаўнікоў дзяржаў ўдзельнічалі ў пятніцу ў відэаканфэрэнцыі для абмеркаваньня новай міжнароднай ініцыятывы для барацьбы з пандэміяй каранавірусу.
Ініцыятыва павінна прывесьці да паскоранай распрацоўкі бясьпечных і эфэктыўных лекаў, тэстаў і вакцын ад лёгачнай хваробы COVID-19, выкліканай каранавірусам. Удзельнікі канфэрэнцыі хочуць дамагчыся аднолькавага і роўнага доступу багатых і маламаёмных людзей да сродкаў прадухіленьня і лячэньня COVID-19.
«Перад намі агульная пагроза, і мы зможам даць ёй рады толькі аб’яднанымі намаганьнямі», — сказаў кіраўнік Сусьветнай арганізацыі здароўя Тэдрас Гебрэесус. Паводле яго слоў, вопыт паказаў, што нават калі мэдыкамэнты і прэпараты маюцца ў наяўнасьці, яны па-рознаму даступныя розным групам хворых. Мы не павінны гэтага дапускаць, заявіў кіраўнік САЗ.
Старшыня Эўрапейскай камісіі Урсуля фон дэр Ляен заявіла, што мэтай глябальных намаганьняў павінен стаць збор сродкаў у памеры 7,5 мільярдаў эўра, тады можна будзе разгарнуць глябальную працу для распрацоўкі сродкаў абароны, дыягностыкі і лячэньня гэтага новага захворваньня.
Зьявілася новая справаздача аб «фэйкавых навінах» пра каранавірус ў Эўразьвязе
Група для супрацьдзеяньня дэзінфармацыі пры зьнешнепалітычным ведамстве Эўразьвязу прадставіла новую справаздачу аб распаўсюджваньні ў краінах Эўропы дэзінфармацыі пра каранавірусную інфэкцыю.
Як вынікае з справаздачы, у краінах ЭЗ і іх суседзях працягваюцца скаардынаваныя кампаніі распаўсюджваньня «фэйкавых навінаў» і дэзінфармацыі, у якіх нярэдка ўдзельнічаюць пракрамлёўскія СМІ і блогеры.
«Афіцыйныя СМІ або мэдыі, якія падтрымліваюцца дзяржавай, з розных краін, у тым ліку з Расеі і, у меншай ступені, з Кітаю, працягваюць прасоўваць кансьпіралягічныя наратывы і распаўсюджваць дэзінфармацыю як для аўдыторыі ЭЗ, так і ў суседніх краінах», — гаворыцца ў справаздачы.
Гаворка ідзе перш за ўсё пра «тэорыі змовы» ў сувязі з эпідэміяй, сьцьвярджэньні пра тое, што каранавірус ня шкодны для здароўя або, наадварот, быў штучна створаны і распаўсюджаны для нейкіх мэтаў. Таксама распаўсюджваюцца сьцьвярджэньні, што вышкі 5G уплываюць на распаўсюд вірусу і т. д. Распаўсюджваюцца і матэрыялы палітычнага характару, у прыватнасьці з крытыкай ЭЗ і высокімі ацэнкамі дзеяньняў Расеі і Кітаю.
Настаўнікі: «Загадалі, каб пасьля выходных усе дзеці вярнуліся ў школы»
У Беларусі няма дыстанцыйнай формы навучаньня, вучыцца можна толькі ў школе альбо дома па індывідуальным вучэбным пляне, калі на тое ёсьць уважлівая прычына, пацьверджаная дакумэнтам. Заява бацькоў такім дакумэнтам ня лічыцца. Таму 29 красавіка ўсе дзеці павінны быць у школе.
Афіцыйна: Каранавірус пацьвердзілі ў дзяцей з асаблівасьцямі з дому-інтэрнату на Магілёўшчыне
Магілёўскі аблвыканкам прызнаў заражэньне каранавірусам выхаванцаў Вясноўскага дому-інтэрнату для дзяцей-інвалідаў з асаблівасьцямі псыхафізычнага разьвіцьця, але не назваў колькасьць інфікаваных.
Паводле зьвестак дабрачыннага фонду Chernobyl Children International, на COVID-19 захварэлі 13 дзяцей.
«Старыя людзі вераць БТ, што ўсё спакойна», — дачка памерлай з COVID-19 у Стоўпцах
Калі б на БТ ад пачатку тлумачылі, што гэта небясьпечна для людзей сталага веку, а ўлады ўвялі карантын, то ўсяго гэтага магло б і ня быць, кажа ў інтэрвію Свабодзе жыхарка Стоўпцаў Вольга, якая пахавала ў чацьвер маці. У жанчыны пацьвердзілі COVID-19.
Цэрквы, самалёты і стадыёны перарабляюць у шпіталі для пацыентаў з COVID-19
Цэрквы, самалёты і стадыёны перарабляюць у шпіталі для пацыентаў з COVID-19. ФОТАГАЛЕРЭЯ
Ва Ўзбэкістане будуюць шпіталь для інфіцыраваных каранавірусам на 10 тысяч месцаў
«Аб’ект прызначаны як для лячэньня інфіцыраваных вірусам жыхароў, так і для разьмяшчэньня грамадзян Узбэкістану, якія вяртаюцца з-за мяжы і якім патрэбны карантын», — сказаў Шохрух Сатараў, генэральны дырэктар Enter Engineering. Паводле словавў Сатарава, астатняя частка комплексу будзе завершана на працягу месяца пасьля адкрыцьця першага блёку.