COVID-19: У некалькіх краінах Эўразьвязу за суткі зьнізіліся паказьнікі
У чатырох эўрапейскіх краінах з найбольш высокімі паказчыкамі сьмерцяў ад каранавірусу SARS-CoV-2 зафіксаванае значнае зьніжэньне колькасьці сьмяротных зыходаў.
- У Францыі за апошнія суткі ад COVID-19 памерлі 242 чалавекі, зь іх 152 у бальніцах і 90 у дамах састарэлых, паведаміла ў нядзелю, 26 красавіка, міністэрства аховы здароўя. Днём раней гэты паказьнік складаў 369 чалавек.
- У Італіі за суткі зарэгістравана 260 сьмяротных зыходаў праз каранавірус. Гэта самая нізкая сьмяротнасьць у краіне з 14 сакавіка. Усяго ў краіне ад эпідэміі памерлі 26.644 чалавек. Колькасьць новых пацыентаў, якія трапілі за мінулыя суткі ў бальніцы, складае 2324 чалавека, гэта самая нізкая лічба з 20 сакавіка, калі эпідэмія ў Італіі была на піку, паведамляе RFI.
- Дэпартамэнт аховы здароўя Вялікабрытаніі зарэгістраваў самы нізкі паказьнік сьмяротнасьці ад COVID-19 з 31 сакавіка. За мінулыя суткі ў брытанскіх шпіталях памерлі 413 чалавек. Агульная колькасьць ахвяр эпідэміі 20 732. Аднак, як адзначае «Нямецкая хваля», рэальны паказьнік сьмяротных выпадкаў ад каранавіруск ў Злучаным Каралеўстве можа быць вышэйшым — цяперашняя афіцыйная статыстыка ня ўлічвае колькасьць памерлых у сваіх дамах і кватэрах, а таксама ў дамах састарэлых.
- У Гішпаніі за апошнія суткі ад наступстваў заражэньня каранавірусам памерлі 288 чалавек — гэта менш, чым за любы дзень ад 20 сакавіка. Напярэдадні, у суботу 25 красавіка, колькасьць сьмяротных зыходаў склала ў Гішпаніі 378. Агульная колькасьць ахвяр эпідэміі 23 190.
Лічбы на раніцу 27 красавіка
- У сьвеце зафіксавалі звыш 2,995 мільёна выпадкаў COVID-19: звыш 987 тысяч у ЗША, звыш 227,5 тысячы ў Гішпаніі, звыш 197,5 тысячы ў Італіі, 162 тысячы ў Францыі, звыш 157,5 тысячы ў Нямеччыне, вмаль 153 тысячы ў Вялікай Брытаніі, 110 тысяч у Турэччыне, каля 90,5 тысячы ў Іране, амаль 84 тысячы ў Кітаі.
- Ад хваробаў, якія выклікаў новы каранавірус, у сьвеце памерлі 207 008 чалавек. Зь іх 55 415 у ЗША, 26 644 у Італіі, 23 190 у Гішпаніі, 22 856 у Францыі, 20 732 у Вялікай Брытаніі, 7094 у Бэльгіі, 5976 у Нямеччыне, 5710 у Іране, 4637 у Кітаі.
- Выпісалі звыш 881,5 тысячы пацыентаў, якіх вылекавалі ад COVID-19. «Актыўных выпадкаў» хваробы застаецца звыш 1,9 млн, зь іх больш за 57,5 тысячы ў цяжкім ці крытычным стане.
- У Беларусі, паводле афіцыйных зьвестак на 26 красавіка, пацьверджаныя 10 463 выпадкі COVID-19 (плюс 873 за дзень). Ад каранавірусу ў Беларусі прызналі сьмерць 72 чалавек.Лекары ананімна заяўляюць, што ня ўсім хворым ставяць адпаведны дыягназ. Міністэрства здароўя не залічвае да памерлых ад COVID-19 тых, у каго вірус «элімінавалі», а яны ўсё роўна памерлі.
Прадстаўніца афіцыйных прафсаюзаў распавяла, колькі заплацяць хворым на COVID-19 мэдыкам
Мэдыкі будуць атрымліваць з адмысловага прафсаюзнага фонду страхаваньня ад 600 да 5 000 рублёў. Пра гэта ў эфіры СТВ паведаміла намесьніца старшыні Фэдэрацыі прафсаюзаў Беларусі Алена Манкевіч, паведамляе БЕЛТА. Паводле яе, гэта будзе тычыцца і лекараў, якія непасрэдна працуюць з хворымі на каранавірус, сярэдняга мэдпэрсаналу, кіроўцаў хуткай дапамогі і іншых.
«Хто сыходзіць на бальнічны ліст праз тое, што заразіўся каранавірусам, выконваючы свае прафэсійныя абавязкі, будзе атрымліваць 600 рублёў з гэтага фонду», — прывяла прыклад Алена Манкевіч. Паводле яе, дапамогу мэдыкам будуць аказваць і непасрэдна прафсаюзныя арганізацыі аховы здароўя. 200 рублёў атрымаюць мэдыкі, якія будуць знаходзіцца на бальнічным да 21 дня і тым, хто перанясе каранавірус у больш лёгкай форме.
Навіны зь Беларусі і сьвету, датычныя каранавірусу, за 26 красавіка
- Усяго ў сьвеце зарэгістравана 2,8 мільёна выпадкаў захворваньня. Больш за 200 тысяч чалавек памерлі
- Рэкордны прырост за дзень — 873. Колькасьць выпадкаў каранавірусу ў Беларусі перавысіла 10 тысяч
- Аляксандар Лукашэнка паўтарыў, што неабходнасьці ў карантыне ў Беларусі няма
- Інтэрнат № 17 БНТУ вызвалілі для разьмяшчэньня студэнтаў хворых на COVID-19
- У Беларусі могуць пасунуцца тэрміны ўступнай кампаніі ў ВНУ
- Ва Ўкраіне каранавірус пацьвердзілі ў 1 676 мэдыкаў
- Ва Ўхані, адкуль пачалася эпідэмія каранавірусу, зь лякарняў выпісалі ўсіх пацыентаў з COVID-19
- У Таджыкістане вырашылі з прычыны пандэміі прыпыніць футбольны чэмпіянат. У Беларусі працягваюць.
Адзін з апошніх вязьняў Асьвенціма памёр праз каранавірус
У Бэльгіі ахвярай Covid-19 стаў адзін з апошніх ацалелых сьведак Галакосту. 94-гадовы Анры Кічка памёр у суботу ў брусэльскім доме для састарэлых. Анры Кічка ў гады Другой сусьветнай вайны быў сярод выжылых вязьняў нацысцкага канцлягеру Асьвенцім, які знаходзіўся на поўдні акупаванай гітлераўцамі Польшчы.
У студзені 2020 году ён распавядаў ВВС пра свой жыцьцёвы досьвед, у прыватнасьці, назваўшы Асьвенцім увасабленьнем сьмерці. Яго сын Майкл Кічка напісаў у Фэйсбуку: «Мікраскапічны каранавірус дамогся таго, чаго не дамаглася цэлая нацысцкая армія. Мой бацька выжыў падчас „маршу сьмерці “, але сёньня завяршыўся ягоны марш жыцьця».
У Гішпаніі — паслабленьні для дзяцей, у Нью-Ёрку — тэсты ў аптэках. Як у сьвеце змагаюцца з каранавірусам
- У Гішпаніі ўлады зь нядзелі дазволілі дзецям выходзіць на вуліцу — упершыню за шэсьць тыдняў. У гэты пэрыяд толькі дарослыя маглі пакідаць свае дамы для неадкладных пакупак, але зараз іх могуць суправаджаць дзеці. Такія прагулкі могуць доўжыцца ня больш за гадзіну, прычым дзецям забаронена кантактаваць з іншымі дзецьмі.
- Жыхары штату Нью-Ёрк неўзабаве змогуць прайсьці тэст на каранавірус у мясцовай аптэцы, заявіў у суботу губэрнатар Эндру Куома. Паводле яго, тэсты змогуць праводзіць 5 тысяч аптэкаў, і мэта — рабіць каля 40 тысяч тэстаў штодня.
- Акрамя таго, лекары чатырох нью-ёрскіх шпіталяў, якія працуюць з пацыентамі з COVID-19, пройдуць тэсты на антыцелы да вірусу, паведаміў губэрнатар.
- Усяго, па дадзеных Унівэрсытэту Джонса Хопкінса, у сьвеце зарэгістравана 2,8 мільёна выпадкаў захворваньня. Больш за 200 тысяч чалавек памерлі.
- Чакаецца, што прэм’ер-міністар Вялікабрытаніі Борыс Джонсан, у якога раней быў дыягнаставаны COVID-19, вернецца да працы ў панядзелак.
- Індыя, дзе ўводзіўся адзін з самых жорсткіх карантынаў у сьвеце, дазволіла некаторым мясцовых крамам аднавіць працу, але не ў найбольш пацярпелых гарадах.
- Паўднёвая Карэя паведаміла, што колькасьць новых інфікаваных дзявяты дзень запар не перавышае 20.
- Іран, які найбольш пацярпеў ад пандэміі зь блізкаўсходніх краінаў, у суботу папярэдзіў пра «новую ўспышку» на пачатку мусульманскага сьвятога месяца Рамадан. Раней Іран пачаў аднаўляць працу бізнэсу, які быў закрыты 11 красавіка праз вірус.
У Кіева-Пячорскай лаўры ўсе сьвятары заразіліся каранавірусам
Таксама захварэлі манахі, выкладчыкі і студэнты Кіеўскай духоўнай акадэміі, якая месьціцца на тэрыторыі лаўры, - усяго каля 150-200 чалавек.
Паводле мітрапаліта Клімента, цяпер ужо большасьць клірыкаў ідуць на папраўку. Памерлі ад каранавірусу трое чалавек, дадаў ён.
Інтэрнат №17 БНТУ вызвалілі для разьмяшчэньня студэнтаў хворых на COVID-19
Сярод студэнтаў, якія пражываюць у інтэрнаце № 6 БНТУ (Менск, вул. Я. Коласа, 26) былі зарэгістраваныя выпадкі інфэкцыі COVID-19. Пасьля рэгістрацыі першага выпадку, кіраўніцтва унівэрсытэту прыняло рашэньне аб пераводзе студэнтаў, якія пражываюць у гэтым інтэрнаце, на дыстанцыйную форму навучаньня. Уведзена забарона на іх наведваньне.
Дзеля таго, што ў інтэрнаце № 6 забясьпечыць поўную самаізаляцыю было немагчыма, кіраўніцтва ўнівэрсытэту разам з прадстаўнікамі санэпідслужбы, прыняло рашэньне перавесьці студэнтаў, у якіх пацьверджана інфэкцыя COVID-19 і захворваньне працякае ў бессымптомнай лёгкай форме, у інтэрнат № 17
Міністар адукацыі дапусьціў магчымасьць пасунуць тэрміны ўступнай кампаніі
Абмяркоўваецца пытаньне адкладу тэрмінаў уступнай кампаніі. Пра гэта ў інтэрвію тэлеканалу «Беларусь 1» паведаміў міністар адукацыі Ігар Карпенка, паведамляе БЕЛТА.
«У тым ліку абмяркоўваем пытаньне магчымага адкладу тэрмінаў правядзеньня уступнай кампаніі ў разе неабходнасьці. Але, ва ўсякім разе, пакуль будзем назіраць за той сытуацыяй, якая разгортваецца», — сказаў міністар.
Ва Ўкраіне каранавірус пацьвердзілі ў 1 676 мэдыкаў
Ва Ўкраіне па стане на раніцу 26 красавіка каранавірусную інфэкцыю пацьвердзілі ў 1676 мэдыцынскіх работнікаў. На працягу дня іх колькасьць павялічылася на 101. Пра гэта на брыфінгу паведаміў міністар аховы здароўя Ўкраіны Максім Сьцяпанаў.
Ва Ўкраіне па стане на 26 красавіка было пацьверджана 8 617 выпадкаў COVID-19. 209 чалавек (108 мужчын і 101 жанчына) памерлі ад COVID-19, 840 акрыялі.
У Таджыкістане вырашылі прыпыніць футбольны чэмпіянат
Усе футбольныя спаборніцтвы Таджыкістану прыпыненыя да 10 траўня з прычыны каранавіруснай інфэкцыі, хоць у краіне яшчэ ня выяўлена ніводнага выпадку заражэньня.
Усе футбольныя спаборніцтвы Таджыкістану прыпыненыя да 10 траўня з прычыны пандэміі каранавірусу. Да гэтага першынство краіны не прыпынялася — нароўні з нацыянальнымі турнірамі ў Беларусі, Нікарагуа, Тайвані і Туркмэністане.
«Ахвяраваньне Сьвятланы Алексіевіч пойдзе на дапамогу адзінокім пажылым інвалідам» — прадстаўніца Чырвонага Крыжу
«Мы вельмі ўдзячныя Сьвятлане Аляксандраўне за падтрымку тых, хто мае найбольшую патрэбу ў дапамозе», — кажа Марына Харытонава, спэцыялістка ў пытаньнях партнэрства Беларускага Чырвонага Крыжа, каардынатарка праекту па COVID-19 з дабрачыннай плятформай «ІМЁНЫ».
Нобэлеўская ляўрэатка Сьвятлана Алексіевіч вырашыла падтрымаць найбольш уразьлівую групу — пажылых самотных інвалідаў. І зрабіла гэта празь Беларускі Чырвоны Крыж, які шмат гадоў сыстэмна дапамагае пажылым людзям і мае значны досьвед i інфармацыю пра людзей, якім патрэбны сталы спэцыялізаваны догляд.
Спэцыялістка Чырвонага Крыжа па партнэрстве Марына Харытонава спадзяецца, што ініцыятыву нобэлеўскай ляўрэаткі падтрымаюць і іншыя людзі і арганізацыі.
— Мы ўжо атрымалі ахвяраваньне ад нобэлеўскай ляўрэаткі. Сьвятлана Аляксандраўна прасіла, каб гэтыя сродкі пайшлі на тое, што неабходна старым людзям. Нашым падапечным патрэбныя падгузьнікі, сродкі дагляду, напрыклад для апрацоўкі пролежняў. Мы дамовіліся, што яе грошы пойдуць на гэта.
Марына Харытонава расказвае Свабодзе, як у Чырвоным Крыжы дапамагаюць пажылым людзям падчас пандэміі каранавіруснай інфэкцыі.
У Расеі банкі падрыхтаваліся перавесьці частку супрацоўнікаў на пастаяннае пражываньне ў офісах падчас каранавірусу
Расейскія банкі прадугледзелі магчымасьць пераводу часткі супрацоўнікаў на рэжым пастаяннага пражываньня ў офісах ва ўмовах эпідэміі каранавірусу, піша РБК.
Так, у «Совкомбанке» на працу з пражываньнем ужо перавялі каля 10 супрацоўнікаў, якія адказваюць за штодзённыя разьлікі: яны «цалкам ізаляваныя, сьпяць, ядуць, мыюцца ў банку, не кантактуюць са сваякамі, пакуль пандэмія ня скончыцца», распавялі ў банку. Рашэньне жыць у банку супрацоўнікі прымалі добраахвотна, для іх прадугледзелі павышаныя выплаты.
Беларусы Польшчы і іншых краінах Эўразьвязу перадалі гуманітарную дапамогу Беларусі
Беларуская дыяспара ў Польшчы і іншых краінах Эўразьвязу закупілі для Беларусі мэдыцынскія тавары, паведамляе амбасада Беларусі ў Польшчы.
«Пасольства Беларусі ў Варшаве пры садзейнічаньні беларускага Генэральнага консульства ў Беластоку перадало Рэспубліканскаму цэнтру арганізацыі мэдыцынскага рэагаваньня гуманітарную дапамогу ад беларускай дыяспары, якая пражывае ў Польшчы і іншых краінах Эўразьвязу», – гаворыцца ў паведамленьні. Там адзначаецца, што 93 электронныя бескантактавыя тэрмомэтры і 280 пульсаксімэтраў закупілі ў рамках валянтэрскага руху # ByCovid19.
85 беларусаў, якія захрасьлі ў Індыі ў сувязі з каранавірусам, вярнуліся дадому
26 красавіка завяршыўся эвакуацыйны рэйс «Белавія» з Гоа (Індыя). Самалёт вывез з Індыі 180 чалавек: 85 грамадзян Беларусі і 95 грамадзян іншых краін: Аўстрыі, Армэніі, Грузіі, Літвы, Латвіі, Румыніі, Расеі і Ўкраіны, паведаміла амбасада Беларусі ў Індыі.
Рэйс «Белавія» арганізаваны ў адпаведнасьці з указам Лукашэнкі аб вывазе грамадзян Беларусі з краін з напружаным эвакуацыйным становішчам. Згодна зь ім, беларусы павінны пакрыць выдаткі на арганізацыю рэйсу да 31 сьнежня 2020 году.
Рэкордны прырост за дзень. Колькасьць выпадкаў каранавірусу ў Беларусі перавысіла 10 тысяч
- У Беларусі зарэгістраваныя 10 463 чалавекі са станоўчым тэстам на COVID-19, паведаміла Міністэрства аховы здароўя Беларусі 26 красавіка.
- За ўвесь пэрыяд распаўсюджваньня інфэкцыі на тэрыторыі краіны памерлі 72 пацыенты «з шэрагам хранічных захворваньняў з выяўленай каранавіруснай інфэкцыяй».
- Праведзена 147 525 тэстаў, каранавірус пацьвердзілі ў 7.1 працэнта ад усіх пратэставаных.
- Выздаравелі і выпісаныя са шпіталёў 1 695 чалавек.
- За апошнія суткі пацьверджаныя 873 новыя выпадкі заражэньня (на раніцу 25 красавіка было 9590 хворых на COVID-19) і 5 сьмерцяў ад каранавірусу.
Ва Ўхані, адкуль пачалася эпідэмія каранавірусу, з бальніц выпісалі ўсіх пацыентаў з COVID-19
У кітайскім горадзе Ухань, які быў эпіцэнтрам распаўсюджваньня каранавірусу, з бальніц выпісалі ўсіх пацыентаў з каранавірусам, паведамляе кітайскае агенцтва «Сіньхуа».
Нядаўна ўлады горада Ўхань перагледзелі колькасьць ахвяраў каранавірусу і дадакова пацьвердзілі 1290 сьмерцяў ад COVID-19. Агульная колькасьць ахвяраў узрасла да 3869 чалавек, а колькасць тых, хто заразіўся, да больш чым 50 тысяч.
Ва Ўкраіне амаль 1,7 тысячы мэдыкаў захварэлі на COVID-19
Ва Ўкраіне зарэгістравана 1676 выпадкаў захворваньня мэдыкаў на COVID-19. Як паведамляе UNIAN, найбольш хворых — у Чарнавецкай, Цярнопальскай і Ровенскай абласьцях.
Міністар аховы здароўя Ўкраіны Максім Сьцяпанаў зазначыў, што найбольш выпадкаў COVID-19 зарэгістравана ў Чарнавецкай вобласьці. Рэгіён быў першым, куды прыйшоў каранавірус.
За апошнія суткі ва Ўкраіне зарэгістраваны амаль 500 новых выпадкаў каранавірусу. Па стане на 26 красавіка лябараторна пацьверджаны 8617 выпадкаў інфэкцыі. 209 чалавек памерлі, 840 — выздаравелі.
330 тысяч рэсьпіратараў набыў Wargaming для беларускіх лекараў
У ноч на 26 красавіка ў Менск з Кітаю прыляцеў самалёт з 50 тонамі гуманітарнага грузу. Паводле Міністэрства аховы здароўя, груз сабралі беларускія і кітайскія прадпрыемствы і арганізацыі. На грузавым самалёце даставілі 330 тысяч рэсьпіратараў, якія набыла для беларускіх мэдыкаў кампанія Wargaming. Рэсьпіратары KN95 атрымаюць мэдыкі з усіх рэгіёнаў.
Таксама грузавым бортам прыбылі лекі — ўпакоўкі супрацьвіруснага сродку Фавіпіравір (для лячэньня ад COVID-19). Гэты груз, а таксама 200 тысяч рэсьпіратараў і рэагенты для тэстаў перадала Міністэрству аховы здароўя кампанія «Энэрга-Оіл» бізнэсоўцы Аляксея Алексіна.
Прадпрыемства «Белмэдтэхніка» прывезла гэтым грузам 300 тысяч рэсьпіратараў.
20 красавіка кампаніі EPAM і Wargaming ужо перадалі Міністэрству аховы здароўя 700 тысяч рэсьпіратараў FFP2 ад вядучага сусьветнага вытворцы 3M.
Колькасьць памерлых ад каранавірусу па ўсім сьвеце перавысіла 200 тысяч чалавек
Агульная колькасьць сьмерцяў ад каранавірусу ў сьвеце на раніцу 26 красавіка перавысіла 203 тысячы чалавек. Сумарная колькасьць выпадкаў захворваньня ва ўсіх краінах — больш за 2,9 мільёна чалавек.
25 красавіка больш за ўсё выпадкаў каранавірусу пацьвердзілі ў ЗША, Бразыліі і Расеі: 35,4 тысяч, 6,2 тысячы, 5,9 тысяч адпаведна. За апошнія суткі ад каранавірусу памерлі 6069 чалавек, траціна сьмяротных выпадкаў за гэты час прыпадае на ЗША — 2065 чалавек. Падрабязьней тут.