Колькі людзей было ў Петрапаўлаўскім саборы, калі яго сьвятар паміраў ад каранавірусу. ФОТА
У ноч на 29 красавіка памёр айцец Генадзь Буцько — сьвятар менскага Петрапаўлаўскага сабору, які хварэў на COVID-19 і з 14 красавіка быў у штучнай коме, на апараце штучнай вэнтыляцыі лёгкіх. Яшчэ 26 красавіка Беларуская праваслаўная царква пісала на сваім сайце, што для Буцько шукаюць донара плязмы, які перахварэў на COVID-19. Набажэнствы ў саборы ішлі і 26 красавіка і ў наступныя, і заплянаваныя надалей. Колькі людзей было на службах, глядзіце па спасылцы.
Найбуйнейшую аграрную выставу Беларусі перанесьлі на восень у сувязі з каранавірусам
Міжнародныя спэцыялізаваныя выставы «Белагра- 2020», «Белфэрма», «Белпрадукт», «Харчовая індустрыя» пераносяцца на 1-5 верасьня, паведамляюць арганізатары і адзначаюць, што «здароўе нашых кліентаў і партнэраў зьяўляецца найважнейшым прыярытэтам».
У Берасьці ў школьнага настаўніка выявілі каранавірус, пачатковыя клясы перавялі на хатняе навучаньне
Пачатковыя клясы школы № 33 у Берасьці перавялі на аддаленае навучаньне, кантакты першага ўзроўню цяпер на самаізаляцыі, паведаміла «Брестская газета». У адміністрацыі школы пацьвердзілі гэтую інфармацыю. Падрабязьней тут.
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
Сотні беларускіх мэдыкаў заразіліся COVID-19, многім дыягнаставалі пнэўманію. Сярод іх ёсьць і памерлыя. Свабода сабрала гісторыі пра лекараў, фэльчараў і мэдсясьцёр, якія сёлета страцілі жыцьцё, ратуючы беларусаў ад новай для чалавецтва хваробы. Дапоўніць сьпіс можна тут. Артыкул цалкам па спасылцы.
Плюс 973 інфікаваныя і 5 сьмерцяў. У Беларусі выявілі 13 181 выпадак COVID-19
Паводле міністэрства, на раніцу 29 красавіка ў Беларусі зафіксавалі:
- агулам 13 181 чалавек са станоўчым тэстам на COVID-19 (у іх лік уваходзяць ачунялыя і памерлыя);
- 84 памерлі, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (удава аднаго з памерлых кажа, што гэта ня так);
- 2027 «паправіліся і выпісаныя»;
- гэта значыць, за дзень выявілі яшчэ 973 выпадкі і прызналі яшчэ 5 сьмерцяў, выпісалі 253 пацыенты;
- ад пачатку эпідэміі ў краіне зрабілі 168 986 тэстаў, плюс 7958 за дзень;
- колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляецца.
Беларусь выйшла на трэцяе месца ў Эўропе па прыросьце COVID-19 на душу насельніцтва
Калі падлічыць адносную колькасьць новых выпадкаў каранавірусу, то Беларусь аказваецца на трэцім месцы ў Эўропе — рост новых выпадкаў на 97 чалавек на мільён насельніцтва. Больш, чым у Беларусі, новых захварэлых на мільён насельніцтва было толькі ў мікрадзяржавах Ватыкане і Сан-Марына.
Па дадзеных сайту worldometers.info, 28 красавіка ў Беларусі былі выяўленыя 911 новых выпадкаў інфікаваньня каранавірусам. Паводле гэтага паказьніку – абсалютнага прыросту – яна была на 16-м месцы ва ўсім сьвеце, і на 5-м – у Эўропе, пасьля Гішпаніі, Францыі, Італіі і Нямеччыны.
Аднак розныя краіны маюць розную колькасьць насельніцтва: рост захворваньня ў Беларусі ў 911 выпадкаў прыпаў на 9.4 мільёна насельніцтва, а рост захворваньня, напрыклад, у Нямеччыне ў 1154 чалавек – на 83 мільёна насельніцтва.
І калі падлічыць колькасьць новых выпадкаў захворваньня на мільён насельніцтва, то Беларусь ужо на трэцім месцы ў Эўропе паводле гэтага паказьніку. У Беларусі ён учора склаў 97 новых хворых на мільён насельніцтва. Больш, чым у Беларусі, новых захварэлых на мільён насельніцтва было ў Эўропе ўчора толькі ў мікрадзяржавах Ватыкане і Сан-Марына.
«Трэба тэрміновая апэрацыя, а мяне выпісваюць». Пацыентка анкалягічнага дыспансэру кажа, што яго перапрафілююць «пад каранавірус»
Пацыенты Менскага гарадзкога клінічнага анкалягічнага дыспансэра і іхныя сваякі 29 красавіка зьвярнуліся на Радыё Свабода і паведамілі, што іх тэрмінова выпісваюць. Нават тых, каму на сёньня былі прызначаныя апэрацыі.
«Мы на шпіталізацыі ў анкалёгіі ў 1-й лякарні. Тут паступіла распараджэньне зь Міністэрства аховы здароўя, каб нас усіх выпісалі. Мне няма калі чакаць, апэрацыя трэба тэрмінова, рак жа, а нас выпісваюць, бо аддаюць корпус пад каранавірус», — са сьлязьмі расказвае адна з пацыентак.
Жанчына зусім нядаўна даведалася пра свой анкалягічны дыягназ. Гэтая апэрацыя мусіць выратаваць яе жыцьцё.
«Я маладая, апэрацыя ў мяне складаная, усё хутка распаўсюджваецца, я нічога ня ведала пра гэта, а цяпер такая няпэўнасьць», — плача жанчына.
Паводле пацыентаў, ім дадуць накіраваньне ў Бараўлянскі РНПЦ анкалёгіі.
«Але ж вы разумееце, якія там чэргі, а пры анкалёгіі час мае такое значэньне, — тлумачыць жанчына. — Дактары тут вельмі добрыя, вельмі клапоцяцца пра нас, але яны ж паднявольныя людзі».
Атрымаць камэнтары ў дыспансэры і Мінздароўя не ўдалося.
Як Швэцыя змагаецца з каранавірусам бяз локдаўну
Чаму ў Швэцыі было магчыма выбраць выразна іншую стратэгію змаганьня з каранавірусам, чым у большасьці эўрапейскіх краінаў?
На гэтае пытаньне паспрабавалі знайсьці адказ журналісты The New York Times, прадстаўляючы ў сваім рэпартажы ў цэлым нармальную карціну жыцьця ў Стакгольме, без сур’ёзных абмежаваньняў і карантынных захадаў.
Паводле аўтараў амэрыканскага выданьня, у швэдаў вельмі высокі ўзровень даверу да ўраду, дзяржаўных установаў і суграмадзян. Калі швэдзкі ўрад адмовіўся ад локдаўну як асноўнага мэтаду змаганьня з распаўсюдам COVID-19, ён менавіта разьлічваў на тое, што грамадзяне прыслухаюцца да ягоных рэкамэндацый, як паводзіць сябе ў часе эпідэміі, і прымусовыя захады не спатрэбяцца. І гэтае спадзяваньне апраўдалася.
Ультраправыя ў ЗША, артадоксы ў Ізраілі, прэзыдэнты Бразыліі і Беларусі. Хто і чаму пратэстуе супраць карантыну ў сьвеце
За апошні дзень колькасьць хворых на COVID-19 ва ўсім сьвеце павялічылася прыблізна на 70 000. Гэта азначае, што хуткасьць распаўсюджваньня вірусу зьніжаецца некалькі дзён запар. У той жа час каля 4,5 мільярда чалавек (больш за палову насельніцтва Зямлі) знаходзяцца на карантыне. І ў многіх краінах адбываюцца пратэсты супраць жорсткіх абмежаваньняў. Пры гэтым, паводле апытаньняў, большасьць насельніцтва краін, дзе ўведзены карантын, падтрымліваюць яго.
У большасьці краінаў удзельнікі акцый патрабуюць фінансавай дапамогі дзяржавы, скарачэньня карантыну і магчымасьці працаваць. Акрамя таго, актывісты сьцьвярджаюць, што жорсткія абмежаваньні парушаюць канстытуцыю і парушаюць правы чалавека. Чытайце агляд пратэстаў у Нямеччыне, ЗША, Бразыліі і Ізраілі.
Колькі разоў за 2 месяцы Міністэрства аховы здароўя давала поўную і праўдзівую інфармацыю пра эпідэмію ў Беларусі. Падлічвае Аляксандар Арсёнаў
Мінула два месяцы з моманту першага пацьверджаньня COVID-19 у Беларусі. Тым, хто сочыць за пашырэньнем каранавірусу ў Беларусі, можа ўжо здавацца, што міністэрства ні разу не давала поўнай і аб’ектыўнай інфармацыі — у памяці засталіся «рэбусы» або «абракадабра» ад ведамства, як гэта называлі ў прэсе і сацсетках.
Папраўдзе, у першыя дні Міністэрства аховы здароўя давала даволі поўную інфармацыю пра COVID-19. Пасьля нешта здарылася.
- 11 дзён з 62 — поўная інфармацыя;
- 10 дзён з 62 — ніякай інфармацыі;
- 24 (ці 62?) дзён з 62 — сумнеўная інфармацыя;
- 0 дзён з 62 — статыстыка па раёнах краіны.
Памёр сьвятар менскага Петрапаўлаўскага сабору Генадзь Буцько. У яго быў каранавірус
Прэс-сакратар Беларускай праваслаўнай царквы Сяргей Лепін паведаміў 29 красавіка на Facebook аб сьмерці ярэя Генадзя Буцько. Падрабязнасьцяў ён не расказаў.
Тэоляг і праваабаронца Натальля Васілевіч раней расказвала, што Генадзь Буцько з 14 красавіка быў у штучнай коме на апараце штучнай вэнтыляцыі лёгкіх у менскай 6-й лякарні, яму шукалі донара плязмы, які перахварэў на COVID-19.
Паведамленьне пра пошукі плязмы і пра тое, што Буцько інфікаваны COVID-19, было і на афіцыйным сайце БПЦ, цяпер яно выдаленае (захавалася ў кэшы Google). У паведамленьні пра сьмерць Буцько на сайце БПЦ цяпер пішуць толькі, што ён «памёр пасьля цяжкай хваробы», але якой — не называецца.
Генадзю Буцько было 56 гадоў, зь якіх ён больш за 20 аддаў Сьвята-Петра-Паўлаўскаму сабору, 17 зь іх у сьвятарскім сане. Адпраўляў службы і па-беларуску. У яго засталося два сыны і дзьве дачкі.
Адпяваньне зладзіць клірык Петра-Паўлаўскага сабору, час не паведамляецца. Яшчэ 28 красавіка ў саборы ладзіліся службы, былі шматлікія прыхаджане. У раскладзе на бліжэйшыя дні набажэнствы не скасаваныя.
Праз пандэмію амэрыканская кінаакадэмія зьмяніла правілы намінацыі на «Оскар»
Амэрыканская кінаакадэмія ўпершыню дазволіла намінаваць на «Оскар» фільмы, якія з прычыны пандэміі паказалі толькі онлайн. Зьмены закрануць толькі намінантаў 93-й цырымоніі «Оскар», якая заплянавана на канец лютага 2021 году.
Да гэтага часу фільм, які прэтэндуе на «Оскар», трэба было паказваць у адным з камэрцыйных кінатэатраў Лос-Анджэлеса тры разы на дзень на працягу тыдня да канца года, які папярэднічае прэміі. Аднак праз пандэмію каранавірусу з 16 сакавіка ўсе кінатэатры Лос-Анджэлеса былі зачыненыя. З гэтай прычыны выхад многіх карцін скасавалі: у тым ліку, гэта закранула фільм пра Джэймса Бонда «Ці ня час паміраць», а таксама карціны «Місія невыканальная» 7 і 8.
Цяпер узнагароду за найлепшую карціну, а таксама прэміі ў асноўных і спэцыяльных намінацыях змогуць атрымаць фільмы, якія спачатку зьявіліся на камэрцыйных стрымінгавых рэсурсах ці VOD-плятформе (відэа на запыт).
Ці праўда, што вакцыны супраць пнэўманіі абараняюць ад новага каранавірусу?
Захворваньне на новы каранавірус COVID-19 часта суправаджаецца пнэўманіяй. Абедзьве хваробы паражаюць лёгкія.
Amnesty International заклапочаная рэпрэсіямі пад прыкрыцьцём змаганьня з каранавірусам
Праваабарончая арганізацыя Amnesty International выказала занепакоенасьць абмежавальнымі мерамі ў краінах Усходняй Эўропы і Цэнтральнай Азіі, якія выкарыстоўвацца для рэпрэсій.
«Урады краін Усходняй Эўропы і Цэнтральнай Азіі рэагуюць на пандэмію COVID-19 рэпрэсіўнымі і гвалтоўнымі захадамі, якія ніяк не адпавядаюць іх абавязаньням у галіне правоў чалавека», — гаворыцца ў дакладзе, дзе згадваюцца Казахстан, Расея, Узбэкістан, Азэрбайджан, Беларусь, Украіна, Грузія, Таджыкістан, Туркмэністан, Кіргізстан ды іншыя.
«Патрэбны неадкладныя дадатковыя захады». WHO апублікавала вынікі місіі ў Беларусі
Сусьветная арганізацыя здароўя (WHO) апублікавала рэзюмэ аб місіі ў Беларусі 8–11 красавіка. Раней місія давала сумесную зь Міністэрствам здароўя прэс-канфэрэнцыю 11 красавіка, затым 21 красавіка публікавала кароткі сьпіс рэкамэндацыяў.
Ключавыя рэкамэндацыі WHO для Беларусі ў сувязі з эпідэміяй COVID-19 засталіся амаль такімі ж, як раней, некаторыя былі дапоўненыя. Напрыклад, раней не было рэкамэндацыі пераносу палітычных масавых мерапрыемстваў.
«Успышка COVID-19 у Беларусі перайшла ў фазу кантактнай перадачы на ўзроўні супольнасьці, — піша місія WHO ў выснове. — Гэта паваротны момант для Беларусі ў ейных дзеяньнях у адказ, і таму патрабуецца неадкладнае ажыцьцяўленьне дадатковых захадаў, у прыватнасьці захадаў фізычнага дыстанцыяванья».
Сьмяротнасьць ад каранавірусу ў ЗША перавысіла страты падчас вайны ў Віетнаме
Колькасьць выпадкаў COVID-19 у ЗША за апошнія 18 дзён падвоілася і склала адзін мільён, а колькасьць загінулых у краіне перавысіла колькасьць амэрыканцаў, якія палеглі ў вайне ў Віетнаме.
Паводле зьвестак Цэнтру сыстэматычных дасьледаваньняў унівэрсытэту Джона Гопкінса, за шэсьць тыдняў сьмерць ад каранавірусу ў ЗША склала 58 355, што перавышае лічбы 58 220 сьмерцяў за больш як дзесяцігодзьдзе ўзброенага канфлікту ў Віетнаме.
«Сядзі, пакуль ня пойдзеш». Як гурт Naviband самаізаляваўся на хутары Вайцюшкевіча
Удзельнікі «Эўравізіі-2017» Арцём Лук’яненка і Ксенія Жук разам з сынам Мацеем жывуць у ізаляцыі амаль месяц. Яны паехалі да свайго сябра, сьпевака Зьміцера Вайцюшкевіча, у госьці на некалькі дзён і засталіся дагэтуль. Музыкі ўпершыню так доўга затрымаліся на адным месцы.
«Як казала мая маці: „Сядзі, пакуль ня пойдзеш“», — пераказвае Арцём словы Вайцюшкевіча, калі яны сабраліся вяртацца ў Менск.
Хутар Вайцюшкі месьціцца ў лесе на беразе Нёмана. Да найбліжэйшай вёскі — 2 кілямэтры, да невялікага гарадка Бярозаўка — 10. Хутар вядомы сваімі музычнымі фэстывалямі, літаратурнымі чытаньнямі і канцэнтрацыяй творчых людзей. Зьміцер Вайцюшкевіч жыве тут разам зь сям’ёй.
У 35 год памёр беларускі ІТ-бізнэсовец, у яго былі пашкоджаныя лёгкія
Вячаслаў Шакель — адзін з заснавальнікаў мэсэнджара E-Chat, інтэграванага з кашальком крыптавалютаў. Офіс знаходзіцца ў Ганконгу. Таксама быў намесьнікам дырэктара ў кампаніі BitActive, рэзыдэнце Парку высокіх тэхналёгій.
Сябры кажуць, што гэта быў моцны малады чалавек пад 2 мэтры ростам, займаўся адзінаборствамі. Жонка і сын чакалі яго ў Тайляндзе, адкуль разам меліся выправіцца ў ЗША. Але межы закрыліся, Вячаслаў не пасьпеў вылецець зь Беларусі.
У Менску жыве ягоны бацька Валянцін Шакель, былы пракурор Партызанскага раёну Менска. Ён паведаміў «Нашай Ніве», што ў суботу ня здолеў зьвязацца з сынам і трапіць да яго ў кватэру, вырашыў ламаць дзверы. За імі знайшоў нежывое цела.
Бацька пакуль не бярэцца казаць, ці мог мець месца каранавірус або яго наступствы.
«Згодна з даведкай, дыягназ ня вызначаны, — сказаў Валянцін Шакель. — Ці гэта пнэўманія? Так, ёсьць пашкоджаньні лёгкіх, лекары падазраюць [пнэўманію], празь месяц будзе афіцыйная гісталёгія. Чаму ён не зьвярнуўся да лекара, мне незразумела».
Дзяржаўныя тэлеканалы паказалі, як каранавірус зьмяніў жыцьцё ў ЗША, а ў Беларусі — не
У вечаровых выпусках навін БТ і АНТ ні слова не прагучала пра апублікаваныя рэкамэндацыі САЗ у сувязі з каранавірусам і заклік каардынатаркі ААН у Беларусі іх выконваць.
Рэкорд інфікаваных COVID-19 у Беларусі дзяржаўныя тэлеканалы агучылі: плюс 919 інфікаваных і 4 сьмерці за суткі. Але больш не прагучала ні слова ні аб прычынах усплёску, ні пра зварот пастаяннай каардынатаркі ААН у Беларусі Яанны Казана-Вісьнявецкай , што ў Беларусі назіраецца «эвалюцыя ўспышкі інфэкцыі COVID-19», і што рэкамэндацыі САЗ ня выконваюцца.
На шостай хвіліне выніковага выпуску навінаў АНТ, на восьмай — БТ агучылі чарговую статыстыку аб каранавірусу ў Беларусі. Але аб прычынах успышкі, пра ўсплёск пнэўманій у рэгіёнах і пра нават аптымістычныя гісторыі ачуньваньня — ні слова.
Праўда, на АНТ было два рэпартажы: з новай лябараторыі ў Ратамцы і аб правядзеньні дэзынфэкцыі шпіталяў вайскоўцамі.
Лічбы на раніцу 29 красавіка
- У сьвеце зафіксавалі каля 3,139 мільёна выпадкаў COVID-19: звыш 1,03 млн у ЗША, 232 тысячы ў Гішпаніі, 201,5 тысячы ў Італіі, 166 тысяч у Францыі, 161 тысяча ў Вялікай Брытаніі, 160 тысяч у Нямеччыне, 114,5 тысячы ў Турэччыне, 93,5 тысячы ў Расеі, 92,5 тысячы ў Іране, амаль 84 тысячы ў Кітаі.
- Ад хваробаў, якія выклікаў новы каранавірус, у сьвеце памерлі 218 010 чалавек. Зь іх 59 266 у ЗША, 27 359 у Італіі, 23 822 у Гішпаніі, 23 660 у Францыі, 21 678 у Вялікай Брытаніі, 7331 у Бэльгіі, 6314 у Нямеччыне, 5877 у Іране, 4637 у Кітаі.
- Выпісалі звыш 956 тысяч пацыентаў, якіх вылекавалі ад COVID-19. «Актыўных выпадкаў» хваробы застаецца звыш 1,95 млн, зь іх каля 57 тысяч у цяжкім ці крытычным стане.
- У Беларусі, паводле афіцыйных зьвестак на 28 красавіка, пацьверджаныя 12 208 выпадкаў COVID-19 (плюс 919 за дзень). Ад каранавірусу ў Беларусі прызналі сьмерць 79 чалавек (плюс 4 за дзень), выпісалі здаровымі 1993 пацыентаў. Лекары ананімна заяўляюць, што ня ўсім хворым ставяць адпаведны дыягназ. Міністэрства здароўя не залічвае да памерлых ад COVID-19 тых, у каго вірус «элімінавалі», а яны ўсё роўна памерлі.