Лічбы на раніцу 30 красавіка
- У сьвеце зафіксавалі 3,22 мільёна выпадкаў COVID-19: звыш 1,064 млн у ЗША, 237 тысяч у Гішпаніі, 203,5 тысячы ў Італіі, каля 166,5 тысячы ў Францыі, звыш 165 тысяч у Вялікай Брытаніі, 161,5 тысячы ў Нямеччыне, 117,5 тысячы ў Турэччыне, звыш 99 тысяч у Расеі, 93,5 тысячы ў Іране, амаль 84 тысячы ў Кітаі.
- Ад хваробаў, якія выклікаў новы каранавірус, у сьвеце памерлі 228 239 чалавекі. Зь іх 61 669 у ЗША, 27 682 у Італіі, 26 097 у Вялікай Брытаніі, 24 275 у Гішпаніі, 24 087 у Францыі, 7501 у Бэльгіі, 6467 у Нямеччыне, 5957 у Іране, 4637 у Кітаі.
- Выпісалі звыш 1,01 мільёна пацыентаў, якія ачунялі ад COVID-19. «Актыўных выпадкаў» хваробы застаецца звыш 1,99 млн, зь іх каля 60 тысяч у цяжкім ці крытычным стане.
- У Беларусі, паводле афіцыйных зьвестак на 29 красавіка, пацьверджаны 13 181 выпадак COVID-19 (плюс 973 за дзень). Ад каранавірусу ў Беларусі прызналі сьмерць 84 чалавек (плюс 5 за дзень), выпісалі здаровымі 2027 пацыентаў. Лекары ананімна заяўляюць, што ня ўсім хворым ставяць адпаведны дыягназ. Міністэрства здароўя не залічвае да памерлых ад COVID-19 тых, у каго вірус «элімінавалі», а яны ўсё роўна памерлі.
Брытанія выйшла на другое месца ў Эўропе па сьмяротнасьці ад каранавірусу пасьля абнаўленьня статыстыкі
Упершыню брытанскія ўлады ўключылі ў лік памерлых ад COVID-19 тых, хто памёр ў Англіі ад 2 сакавіка па-за межамі шпіталёў — у сябе дома або ў дамах для старых людзей. Шатляндыя, Уэльс і Паўночная Ірляндыя зьбіралі такую статыстыку і раней. З улікам новай статыстыкі сутачны прырост сьмерцяў ад выкліканай каранавірусам хваробы сёньня склаў рэкордныя 4419 чалавек.
Літва зьмякчае карантын: многія правілы ўступяць у сілу заўтра
29 красавіка ўрад Літвы ўхваліў яшчэ некалькі крокаў па зьмякчэньні карантыну: грамадзяне змогуць выяжджаць за межы краіны, з 10 траўня мяркуецца аднавіць авіязносіны, адкрыюцца рэчавыя рынкі, прафэсійныя спартоўцы змогуць трэніравацца ў закрытых памяшканьнях. Большая частка новых правілаў уступіць у сілу з 30 красавіка.
«У даведках аб сьмерці часта пішуць «неўдакладненая пнэўманія». Рытуальныя службы расказваюць, як хаваюць нябожчыкаў з каранавірусам
Паводле афіцыйнай інфармацыі Мінздароўя, у Беларусі на 29 красавіка 84 чалавекі памерлі «з шэрагам хранічных захворваньняў» і выяўленай каранавіруснай інфэкцыяй. Але ў апошні месяц шмат людзей зь іншымі прычынамі сьмерці хаваюць у закрытых трунах. Свабода высьвятляла, як цяпер працуюць рытуальныя агенцтвы краіны. Чытайце па спасылцы >
У гомельскім каледжы мастацтваў выявілі каранавірус. Адміністрацыя адмяняе заняткі
Намесьнік дырэктара па вучэбнай рабоце гомельскага каледжа мастацтваў імя Сакалоўскага Анатоль Трафімовіч пацьвердзіў, што ў аднаго з навучэнцаў выявілі COVID-19. Паводле Анатоля Трафімовіча, апошнім часам хлопец быў часткова на дыстанцыйным навучаньні.
Масавыя заняткі — аркестравыя і харавыя — абмежавалі. Індывідуальныя заняткі засталіся, але іх няшмат. Часткова заняткі перавялі на дыстанцыйную форму. Падрабязьней тут.
У Баранавічах адмянілі сьвяткаваньне 1 траўня і Дня Перамогі
У Баранавічах сёлета ня будуць сьвяткаваць Дзень Працы і Дзень Перамогі, піша Intex-press.by са спасылкай на кіраўніцу аддзелу ідэалягічнай працы Баранавіцкага гарвыканкаму Сьвятлану Паўловіч.
9 траўня ў горадзе ня будзе мітынга, шэсьця і культурна-масавых мерапрыемстваў.
У грамадзянскіх спэцыялістаў Вайсковай акадэміі пацьвердзілі Covid-19
У грамадзянскіх спэцыялістаў Вайсковай акадэміі пацьвердзілі каранавірус. На момант выяўленьня хваробы яны знаходзіліся на самаізаляцыі. Пра гэта піша Tut.by са спасылкай на прадстаўніцу Міністэрства абароны Натальлю Гаўрусік.
«Мы рускія, з намі бог», — як сьвятар з Ганцавічаў натхняў вернікаў у час эпідэміі каранавірусу
«Як Cувораў казаў: „Мы рускія — з намі бог!“ — натхняў вернікаў сьвятар Пятро Піліпчук, настаяцель храма Сьвяціцеля Ціхана ў Ганцавічах. — Нікога не баяўся — і ніводнай паразы! Аляксандар Неўскі тое самае, Фёдар Ушакоў — нашыя вядомыя палкаводцы, нашы сучасныя нічога не баяліся, ішлі наперад!»
Адносна эпідэміі COVID-19 Піліпчук заяўляе, што «ў нас хворых не было і няма». Ён расказвае, што хаваў ужо двух людзей у закрытых трунах, «нібы пнэўманія, каранавірус», а пасьля нібыта выявілася, што абодва памерлі ад сардэчнай недастатковасьці. Ён абураецца, навошта тады хлусілі.
«А што баяцца? — пытае ён пра каранавірус. — Што, людзі нашыя кожны дзень не хварэюць? І ад лёгкіх паміраюць, і ад нырак, і ад пячонкі, і ад сэрца, і ад раку, ад самагубстваў. У царкву перасталі хадзіць. Выходзіць, на кірмаш можна, у краму можна, па справах можна, а ў царкву — нельга. Навошта гэта разьдзьмуваць? Калі чалавек ходзіць у царкву, то чаго яму баяцца? Ён пад Богам ходзіць».
Тое, што прычасьце праводзяць з адной лыжкі, ён патлумачыў спрадвечнай традыцыяй — маўляў, «хворых і ў час чумы прычашчалі».
Чытаць далей, пра наркотыкі на Майдане і нашэсьце мусульманаў >>
Ня толькі каранавірус. Колькі эпідэмій перажыў Жыровіцкі манастыр за 500 гадоў сваёй гісторыі
На карантыне адзін з галоўных цэнтраў беларускага хрысьціянства — Сьвята-Ўсьпенскі мужчынскі манастыр і Найвышэйшая духоўная сэмінарыя ў мястэчку Жыровічах на Слонімшчыне. Дзясяткі сьвятароў, манахаў і сэмінарыстаў шпіталізаваныя, доступ наведнікаў за манастырскія муры спынены. Прычына — пандэмія каранавірусу, якая зачапіла манастыр.
Свабода сабрала зьвесткі пра іншыя эпідэміі ў гісторыі Жыровіцкага манастыра, які сёлета адзначае 500-годзьдзе.
Як паўплываў каранавірус на пастаўкі ўкраінскай раньняй гародніны ў Беларусь
Хэрсонскія памідоры і перцы павязуць у Беларусь, нягледзячы на адміністрацыйныя бар’еры, каранавірус і карантын. Улады Ўкраіны хутка адрэагавалі на пратэсты фэрмэраў — харчовыя рынкі, і ня толькі гуртовыя, абяцаюць адкрыць. Але ня ўсе.
Беларускі рынак — прыярытэтны для Ўкраіны. У залежнасьці ад году і сэзону, ён займае першыя месцы пасьля рынку Эўразьвязу.
Канапацкая падала заяву ў Генпракуратуру на міністра аховы здароўя
Былая дэпутатка Палаты прадстаўнікоў Ганна Канапацкая 29 красавіка падала ў Генэральную пракуратуру заяву на міністра аховы здароўя Беларусі Ўладзіміра Караніка. На Facebook яна выклала поўны тэкст заявы.
Прэзыдэнцкія выбары ва ўмовах пандэміі: прапановы беларускіх праваабаронцаў
«Праваабаронцы за свабодныя выбары» прапанавалі дэпутатам Палаты прадстаўнікоў унесьці ў Выбарчы кодэкс зьмены ў артыкулы, якія б замацоўвалі парадак дачы згоды выбарнікам аб вылучэньні асобы кандыдатам у прэзыдэнты шляхам дыстанцыйнага выказваньня згоды:
- праз пошту
- праз электронную пошту
- праз службу кароткіх паведамленьняў апэратараў мабільнай сувязі
- праз электронную перадачу выявы запоўненага падпіснога ліста.
Яны любіць ня ўмеюць нават мёртвых. Чаму беларускія ўлады прыніжаюць мэдыкаў. Разважае Валянцін Жданко
Яны штодня рызыкуюць жыцьцём і часта гінуць, ратуючы іншых. А ў адказ замест удзячнасьці і пашаны нярэдка атрымліваюць зьдзеклівыя папрокі і прыніжэньні ад улады. Чаму?
У розных краінах сьвету падчас пандэміі заразіліся і памерлі тысячы мэдыкаў — дактароў, мэдсясьцёр, санітараў. І адбылося гэта зусім не таму, што яны легкадумна грэбавалі захадамі бясьпекі. Любы мэдык ведае: ніякія рэсьпіратары, акуляры і адмысловыя касьцюмы ня здольныя гарантаваць поўную засьцярогу, калі ты 24 гадзіны на суткі вымушаны знаходзіцца ў памяшканьнях з высокай канцэнтрацыяй вірусу. Можна выпадкова заразіцца, здымаючы ці надзяваючы спэцадзеньне, папраўляючы рэсьпіратар ці калі раптам спаўзе пальчатка ці маска...
Расея падоўжыла забарону на ўезд замежнікаў, у тым ліку беларусаў
Прэм’ер Расеі Міхаіл Мішусьцін падоўжыў абмежаваньні на ўезд замежнікаў у Расею да стабілізацыі сытуацыі з каранавірусам, пры гэтым замежныя спэцыялісты для абслугоўваньня імпартнага абсталяваньня прыяжджаць у краіну змогуць, паведамляе Інтэрфакс.
Кіраўнік ураду Расеі падкрэсьліў, што пакуль нельга назваць дакладнай даты адмены абмежаваньняў, уведзеных праз пандэмію, у тым ліку па перасячэньні мяжы РФ.
«Хуткая», лекары ў «скафандрах» і закрытыя службы. Што адбываецца ў жаночым манастыры ў Горадні. ФОТА
Сьвецкіх людзей не пускаюць на богаслужбы ў манастыр Нараджэньня Багародзіцы ў Горадні. Лекары «хуткай» у ахоўным рыштунку прыяжджалі ў манастыр 29 красавіка. Свабода спрабавала разабрацца, што адбываецца ў праваслаўных манашак. Чытайце рэпартаж з манастыру па спасылцы >>
У Кіеве адбыліся сутыкненьні паміж паліцыяй і прадпрымальнікамі, якія патрабуюць зьняць карантын
У Кіеве каля будынку ўраду, дзе з раніцы пратэстуюць прадпрымальнікі з патрабаваньнем завяршыць карантын з 1 траўня, паміж паліцыяй і мітынгоўцамі адбыліся сутыкненьні. Як паведамляе УНІАН, прадпрымальнікі выступілі супраць «выбарачнага» карантыну.
«Нам няма на што жыць!» — выкрыквалі прадпрымальнікі. Амаль усе яны прыехалі да будынку ўраду на машынах і заблякавалі вуліцу Грушэўскага. Сутыкненьні паміж пратэстоўцамі і паліцыяй пачаліся, калі прыбылі эвакуатары, каб разблякаваць праезд. Пасьля частку вуліцы прадпрымальнікі ўсё ж вызвалілі. Як заявіла «Грамадзкае тэлебачаньне», паліцыянты зьбілі журналіста тэлеканалу, які вёў наўпроставы эфір з месца падзей.
Лячыцца дома — толькі маладзейшым за 55 гадоў. Міністэрства здароўя выдала памятку пра COVID-19
На сайце Міністэрства аховы здароўя Беларусі апублікавалі памятку (PDF) для тых, хто мае лячыцца ад COVID-19 дома. Паводле статыстыкі на 24 красавіка, на «амбуляторным лячэньні» было каля трох тысяч чалавек — пасьля іх колькасьць не паведамлялі. Рашэньне аб лячэньні дома можа прымаць толькі доктар, але ня сам пацыент.
У памятцы адзначаецца, што лячыцца дома могуць толькі пацыенты зь бессымптомным або лёгкім цячэньнем хваробы, маладзейшыя за 55 гадоў, якія ня маюць хранічных захворваньняў кшталту дыябэту, сардэчнай недастатковасьці або бранхіяльнай астмы. Цалкам чытайце тут.
Прадстаўніца Эўракамісіі: Уплыў каранавірусу на Беларусь будзе вельмі вялікім
Прадказальна, што ўплыў каранавірусу на Беларусь будзе вельмі вялікім, заявіла 29 красавіка намесьніца гендырэктара дэпартамэнту Эўрапейскай камісіі ў эўрапейскай палітыцы суседзтва і перамоваў аб пашырэньні Катарына Матэрнава падчас онлайн-брыфінгу.
«Беларусь не прымала такіх мераў для прадухіленьня распаўсюджваньня COVID-19, як, напрыклад, Грузія, якая адрэагавала вельмі хутка, — сказала Матэрнава. — Экспанэнцыйны рост колькасьці выпадкаў у Беларусі сьведчыць пра тое, што ўплыў на Беларусь будзе вельмі вялікі».
У Баранавічах ад пнэўманіі памерла доктарка
Лекарка Баранавіцкай гарадзкой паліклінікі № 3 Алена Пашко памерла ад двухбаковай пнэўманіі. У яе ўзялі аналіз на каранавірус, але вынік пакуль невядомы. Жанчыне было 54 гады, яна тыдзень лекавалася дома, але хвароба не праходзіла, апошнія тры дні яна правяла ў лякарні, дзе і памерла. Цалкам чытайце тут>>