Блог Юрыя Дракахруста. Фокус статыстыкі пра пандэмію: ці шкодзяць брандспойты тушэньню пажараў?
Сьцісла:
- Міністэрства аховы здароўя раней дык нават касьцямі клалася, каб ня даць недзяржаўным журналістам самую агульную лічбу захварэлых, маўляў, а навошта вам яна?
- Падчас пажараў, пры тушэньні якіх выкарыстоўваюць брандспойты, разбурэньні істотна большыя, чым падчас тых, дзе тушаць бязь іх. Напрошваецца выснова – атрымліваецца, ад брандспойтаў толькі шкода. Між тым, выснова няверная
- У Беларусі распаўсюд COVID-19 на мільён насельніцтва істотна большы, чым ва ўсіх суседзяў. Ну а больш хварэюць – дык больш і выздараўліваюць
- Беларусь павольна прыйшла да даволі нізкага паказьніку ачунялых сярод усіх інфікаваных.
- Адрозьненьне Літвы, Латвіі і Польшчы ад Беларусі, Украіны і Расеі паводле гэтага паказьніку – ня толькі арытмэтычнае. Яно зьвязанае з тым, што першыя тры краіны знаходзяцца ў іншай фазе пандэміі, яны ўжо перавалілі яе пік
Уладзімер Япрынцаў пасьля лякарні пойдзе на парад. Хварэюць яго жонка, дачка і цешча
Бізнэсовец і сябра выканкаму Міжнароднай фэдэрацыі самба Ўладзімер Япрынцаў, якога два дні таму выпісалі зь лякарні «лечкамісіі», сказаў, што абавязкова пойдзе на парад 9 траўня.
«Нават калі б не было параду, то я ўзяў бы кветкі і пайшоў на плошчу Перамогі. Ухутаў бы сваю фізіяномію, каб нікому не нашкодзіць, і хоць паўзком дайшоў бы да плошчы Перамогі і паклаў бы кветкі».
На Магілёўшчыне ўспышка каранавірусу ў Чэрыкаўскім раёне. Жыхароў заклікаюць не выходзіць на вуліцу, закрылі школы
У райцэнтры Чэрыкаве на карантын зачынілі ўсе школы. COVID-19 выявілі ў пэдагогаў, мясцовыя ўлады кажуць пра «сур’ёзную сытуацыю», але не называюць лічбаў.
COVID-19 у беларускім войску: адзін афіцэр на ШВЛ
Як стала вядома Свабодзе, родныя аднаго з афіцэраў беларускай арміі шукаюць донара плязмы крыві, які перахварэў на COVID-19. Яны ня сталі камэнтаваць сытуацыю журналістам.
У Мінабароны паведамляюць, што абсалютная большасьць вайскоўцаў, якія захварэлі, — у здавальняючым стане. Патрэбу ў штучнай вэнтыляцыі лёгкіх на дадзены момант мае адзін афіцэр. Цалкам чытайце па спасылцы.
Памерла манахіня Сьвята-Елісавецінскага манастыра. У яе быў станоўчы тэст на каранавіруc
Манахіня Марыя памерла 4 траўня ў шпіталі. Гэта Свабодзе пацьвердзілі ў канцылярыі Сьвята-Елісавецінскага манастыра. Прычыну сьмерці манахіні ў канцылярыі не назвалі, але не адмаўлялі, што праведзены ў шпіталі тэст на каранавірус даў станоўчы вынік.
Паводле прэсавага сакратара БПЦ Сергія Лепіна, у манастыры гэта адзіная сьмерць сярод манахінь і інакаў, якія трапілі ў шпіталь, і тых, хто апынуўся на карантыне як «кантакт». Службы ў Сьвята-Еліcавецінскім манастыры працягваюцца, але ў закрытым рэжыме — для манахінь і клірыкаў. Цалкам чытайце па спасылцы.
Забарону зьнялі. У Менску зноў можна запісацца на плянавы прыём да стаматоляга
Паводле ліста Менгарвыканкаму ад 4 траўня, кіраўнікам стаматалягічных паліклінік і іншых установаў аховы здароўя прапанавалі аднавіць аказаньне плянавай стаматалягічнай дапамогі, паведамляе Tut.by. Пры гэтым ва ўстанове павінен выконвацца санітарна-эпідэміялягічны рэжым — у тым ліку сацыяльнае дыстанцыяваньне пацыентаў, павінен быць павялічаны часавы інтэрвал паміж прыёмамі.
З 10 красавіка дзяржаўныя стаматалягічныя паліклінікі пачалі паведамляць пацыентам, што змогуць абслугоўваць іх толькі ў выпадку вострага болю.
Лідэры ЭЗ праводзяць саміт па зборы сродкаў на барацьбу з COVID-19
4 траўня кіраўнікі дзяржаў Эўразьвязу і іншых краін праводзяць віртуальны саміт з мэтай сабраць сем з паловай мільярдаў эўра на барацьбу з каранавірусам. Кіраўнік Эўракамісіі Урсула фон дэр Ляен раней назвала гэтую падзею «сапраўдным маратонам». Па папярэдніх дадзеных, чатыры мільярды эўра будуць накіраваныя на дасьледаваньні вакцыны, два мільярды — на лячэньне пацыентаў і паўтара мільярда — на тэставаньне. Падрабязьней тут.
У Наваполацку — 83 выпадкі каранавірусу, 6 чалавек памерлі
Па горадзе Наваполацку выяўлена 83 выпадкі пацьверджанай каранавіруснай інфэкцыі, паведамляе «Новополоцк Сегодня». Цяпер 55 пацыентаў праходзяць лячэньне ў стацыянары гарадзкой бальніцы — гэта жыхары Наваполацка, Полацка і Полацкага раёну. На амбуляторным назіраньні — 29 чалавек з бессымптомнай формай каранавірусу. Выздаравелі 17 пацыентаў, а 6 чалавек з COVID-19 памерлі.
Таксама, паводле дадзеных на раніцу 4 траўня ў наваполацкай бальніцы знаходзілася 84 дарослых і 7 дзяцей з дыягназам «пнэўманія», у рэанімацыі былі 4 чалавекі, зь якіх — на апараце штучнай вэнтыляцыі лёгкіх.
Палескі драмтэатар адмяніў паказ усіх спэктакляў у сувязі з каранавірусам
Каранавірус прыйшоў у Пінск у красавіку і ўстановы культуры горада перайшлі на асаблівы рэжым працы, піша «Медыя-Палессе». Палескі драмтэатар адмяніў паказ усіх спэктакляў і сышоў у online, расказаў дырэктар і мастацкі кіраўнік Палескага драмтэатру Аляксандар Лукашэнка. У траўні спэктакляў на сцэне ня будзе. Да 8 траўня трупа працягне рэпэтыцыі пастановак да новага тэатральнага сэзона, а пасьля — сыдзе ў чарговы адпачынак да чэрвеня.
«Трактар ня лечыць, пасадзіў печань». Радыёвядоўца прасьпяваў аб процівірусных «рэцэптах» Лукашэнкі
Вядоўца менскага «Новага радыё» Вася Чэхаў выпусьціў парадыйны кліп, у якім ад імя трактарыста расказвае пра тое, як «працуе дыстанцыйна» і выконвае парады супраць каранавірусу, агучаныя Аляксандрам Лукашэнкам.
Песьня ў кліпе — кавэр на «Плачу на техно» расейскага гурту «Хлеб». Тэкст «беларускай вэрсіі» напісаў сам Вася Чэхаў, кліп зьняў вядоўца дзяржаўнага тэлеканалу «Беларусь-2» Герман Малышчыцкі.
Ні сам Аляксандар Лукашэнка, ні каранавірус у кліпе ня згадваюцца, але згадваецца прапанаванае Лукашэнкам «лячэньне» COVID-19 трактарам, алькаголем, маслам і лазьняй.
Студэнты беларускай Акадэміі музыкі сьпелі «дыстанцыйным хорам»
Такім чынам, як пішуць на Facebook-старонцы хору, студэнты выражаюць падтрымку ўсім, хто аказаўся ў «няпростай сытуацыі» і хто «дзень за днём стаіць на перадавой, ахвяруе часам і нават сваім жыцьцём». Асона згадваецца харавая капэля імя Шырмы, дзе ў паловы артыстаў выявілі COVID-19.
«Гэта ня толькі невуцтва, але і злачынства». Шушкевіч, Грыб і Чыгір выступілі супраць параду на 9 траўня
Як ставяцца да правядзеньня параду 9 траўня ў час эпідэміі каранавірусу былыя кіраўнікі парлямэнту і ўраду Беларусі?
Першы сьпікер Вярхоўнага Савету ў часы незалежнасьці Беларусі Станіслаў Шушкевіч ня проста супраць, а вельмі абураны рашэньнем Аляксандра Лукашэнкі праводзіць парад. А таксама тым, што ягонае бліжэйшае атачэньне гэтаму не супярэчыць, а наадварот, падтаквае.
Мечыслаў Грыб узначальваў Вярхоўны Савет Рэспублікі Беларусь у 1994 годзе, калі была прынятая першая Канстытуцыя Беларусі. Ён выступае супраць правядзеньня параду 9 траўня: «Калі б на той парад пайшлі толькі прыхільнікі Аляксандра Лукашэнкі, дык гэта была б толькі іх праблема».
Экс-прэм’ер і былы кандыдат на прэзыдэнта на альтэрнатыўных выбарах у 1999 годзе Міхаіл Чыгір таксама супраць правядзеньня параду 9 траўня: «У ЗША дык увогуле жывуць без вайсковых парадаў, і што, дрэнна жывуць?»
У Трасьцянцы правялі масавую акцыю да Дня Перамогі насуперак рэкамэндацыям WHO
Telegram-канал Nexta апублікаваў плян акцыі «Ў славу агульнай Перамогі» — 4 траўня ў мэмарыяле «Малы Трасьцянец», што на месцы нацысцкага канцлягера пад Менскам, трэба было «забясьпечыць удзел» 1000 чалавек.
Паводле назіраньняў Свабоды, у час акцыі ў мэмарыяльным комплексе было каля 70 чалавек. Сярод іх — шэраг чыноўнікаў, у тым ліку галоўны ідэоляг Менгарвыканкаму Сяргей Шэндзік і намесьнік старшыні Менгарвыканкаму Арцём Цуран. У масках былі далёка ня ўсе.
У Расонскім раёне — першы выпадак каранавірусу
У Расонскім раёне Віцебскай вобласьці зарэгістраваны першы выпадак заражэньня COVID-19, паведамляе «Голас Расоншчыны».
Паводле галоўнага санітарнага ўрач раёну Алесі Шчаўкун, захварэў малады чалавек, які на мінулым тыдні вярнуўся зь Віцебска. Цяпер ён ізаляваны, інфэкцыя ў яго працякае бессымптомна. У тых, хто быў у кантакце з хворым, узялі аналіз на каранавірус, яны знаходзяцца на ізаляцыі і пад мэдыцынскім наглядам.
Лідэры ЭЗ праводзяць саміт па зборы сродкаў на барацьбу з COVID-19
4 траўня кіраўнікі дзяржаў Эўразьвязу і іншых краін праводзяць віртуальны саміт з мэтай сабраць сем з паловай мільярдаў эўра на барацьбу з каранавірусам. Кіраўнік Эўракамісіі Урсула фон дэр Ляен раней назвала гэтую падзею «сапраўдным маратонам».
Па папярэдніх дадзеных, чатыры мільярды эўра будуць накіраваныя на дасьледаваньні вакцыны, два мільярды — на лячэньне пацыентаў і паўтара мільярда — на тэставаньне. Кіраўнікі эўрапейскіх краін перад самітам заявілі, што сабраныя сродкі будуць накіраваныя агульнапрызнаным сусьветным арганізацыям аховы здароўя. Ніякіх новых структур ствараць не плянуецца.
Да саміту павінны далучыцца лідэры з Аўстраліі, Канады, Ізраіля, Японіі, Іярданіі, Паўднёвай Афрыкі і Турцыі, а таксама пасол Кітая ў ЭЗ. Брусэль заклікаў да ўдзелу ў віртуальнай сустрэчы Вашынгтон, аднак пра рашэньне ЗША пакуль не паведамляецца.
«Галоўны „каранавірус“ у Беларусі ўжо 26 гадоў». Паразмаўлялі зь беларусам Аляксеем Церахавым, які зьняў кліп Noize MC пра Чарнобыль
Аляксей Церахаў здымаў кліпы «Ляпіса Трубяцкога», а цяпер займаецца дакумэнтальным кіно. У размове са Свабодай ён расказвае, як чарнобыльская катастрофа пераклікаецца з каранавірусным крызісам. Чытайце інтэрвію па спасылцы >>
З 11 траўня ва Ўкраіне часткова зьмякчаць карантын: адкрыюць паркі, музэі і тэрасы рэстаранаў
Карантын, які быў уведзены ва Ўкраіне ў сувязі з эпідэміяй каранавірусу, падоўжаць да 22 траўня, але з 11 траўня будуць дзейнічаць пэўныя зьмякчэньні:
- адкрыюць паркі, сквэры, зоны адпачынку,
- адкрыюць салёны прыгажосьці, цырульні,
- будуць адкрытыя летнія пляцоўкі асобных кавярняў і рэстаранаў,
- будзе дазволены гандаль гуртам і ўраздроб нехарчовымі таварамі, акрамя зонаў забаваў, фуд-кортаў, кінатэатраў і дзіцячых зонаў у гандлёва-забаўляльных цэнтрах,
- адновяць работу музэі, бібліятэкі.
У Віцебску ад каранавірусу памёр дыякан пратэстанцкай царквы
Анатолю Сакалову было 59 гадоў, паведамляе «Наша ніва», якая давелася пра сьмерць дыякана ад брата памерлага, пастара пяцідзясятніцкай царквы «Адраджэньне» ў Віцебску Міхаіла Сакалова.
Паводле Міхаіла Сакалова, брату стала кепска больш за 3 тыдні таму, паднялася тэмпэратура. Участковая сказала, што гэта ангіна. Толькі калі мужчыне стала зусім кепска, выклікалі хуткую, дактары хуткай паставілі дыягназ пнэўманія і забралі яго ў лякарню. 3 траўня Анатоль Сакалоў памёр.
Паводле брата, тэст на каранавірус у яго бралі 22 красавіка, праз 2 дні быў станоўчы вынік. Сваякам рэкамэндавалі не здымаць залю для разьвітаньня, труна будзе закрытай. У лякарні знаходзілася і жонка дыякана, але яна ўжо паправілася. Тэст на каранавірус у яе быў адмоўным.
У радзільні Лукашэнкі непадалёк ад яго рэзыдэнцыі выявілі каранавірус?
Каранавірус нібыта выявілі ў пэрсаналу Копыскай участковай лякарні, у якой у 1954 годзе нарадзіўся Аляксандар Лукашэнка. Аб праблемах установы Свабодзе расказалі жыхары мястэчка Копысь Аршанскага раёну Віцебскай вобласьці. Галоўнага доктара лякарні шпіталізавалі з пнэўманіяй.
Ад гэтага гарадзкога пасёлку да рэзыдэнцыі Лукашэнкі ў ягонай роднай вёсцы Аляксандрыі-2 меней за 6 кілямэтраў. Свабода наведала Копысь і пабачыла, як каранавірус зьмяніў жыцьцё местачкоўцаў. Рэпартаж чытайце па спасылцы >>
Чацьвёрты дзень запар у Расеі рэкордная колькасьць новых выпадкаў COVID-19
Другі дзень запар паказьнік новых выпадкаў захворваньня на каранавірус у Расеі за суткі перавышае 10 тысяч, і чацьвёрты дзень запар фіксуюцца рэкорды колькасьці новых выпадкаў COVID-19.
За апошнія суткі пацьверджаны 10 581 новы выпадак каранавірусу ў 82 рэгіёнах Расеі. 3 траўня было зафіксавана 10 633 выпадкі, 2 траўня дзённы прырост упершыню перавысіў адзнаку ў 9 тысяч, 1 траўня ён склаў 7 933 выпадкі, а 30-га красавіка прырост упершыню перасягнуў 7 тысяч. Усяго на сёньняшні дзень у Расеі зарэгістравана 145 268 выпадкаў каранавірусу ў 85 рэгіёнах.