У Гішпаніі 113-гадовая жанчына ачуняла ад каранавірусу
113-гадовая жанчына, якая лічыцца самай старой у Гішпаніі, пераадолела каранавірусную інфэкцыю COVID-19, паведамляе AFP са спасылкай на дом састарэлых, дзе жанчына жыве. Марыя Браняс, якая нарадзілася ў ЗША, захварэла ў красавіку ва ўсходнім гішпанскім горадзе Алот, дзе жыла апошнія 20 гадоў.
Цяпер жанчына адчувае сябе добра, паўторны тэст на каранавірус быў адмоўным. Марыя Браняс лячылася ў сваім пакоі пад наглядам супрацоўніка дома састарэлых, у яе былі ўмераныя сымптомы. На пытаньне, як ёй удалося паправіцца, жанчына адказала, што ёй пашанцавала з «добрым здароўем».
У ЗША адмовіліся ад выкарыстаньня расейскіх апаратаў ШВЛ
Улады амэрыканскіх штатаў вяртаюць апараты штучнай вэнтыляцыі лёгкіх «Авента-М», прывезеныя з Расеі. Апараты не выкарыстоўваліся ў бальніцах, а захоўваліся на складах, паведамілі ў Фэдэральным агенцтве ЗША па ўрэгуляваньні надзвычайных сытуацый (FEMA).
За апошнія дні ў Расеі двойчы адбываліся пажары ў шпіталях Масквы і Санкт-Пецярбурга, у выніку якіх загінулі шэсьць пацыентаў з COVID-19. Па папярэдніх дадзеных, прычынай пажараў стала кароткае замыканьне ў апаратах «Авента-М».
Мяркуючы па заяўках на дзяржаўныя закупкі, у Беларусі цяпер выкарыстоўваюцца самыя розныя мадэлі апаратаў штучнай вэнтыляцыі лёгкіх — вытворчасьці і Беларусі, і Расеі, і іншых краінаў. У тым ліку цяпер выкарыстоўваюцца і апараты «Авента-М» — прынамсі для менскай лякарні хуткай дапамогі ў сакавіку закупалі дэталі для такіх. Ці пераважае нейкая краіна ў пастаўках апаратаў ШВЛ у Беларусь, з заявак на абслугоўваньне апаратаў ня бачна.
Лукашэнка заявіў, што пасьля параду ў Менску «зьніжэньне пнэўманіяў удвая». Ці так гэта?
Лукашэнка згадаў «нэгатыўныя прагнозы наконт параду» (такія давалі беларускія і расейскія палітыкі, праваабаронцы, мэдыкі, у тым ліку афіцыйны прадстаўнік Сусьветнай арганізацыі здароўя ў Беларусі). Але заявіў, што горш ня стала:
«Абсалютна быў перакананы, што людзі знаходзяцца на паветры, гэта ня горш, чым яны там недзе будуць зачыненыя, — сказаў Лукашэнка. — Гэта вайсковыя людзі людзі былі вельмі шмат, перахварэлыя і гэтак далей. Але ўсё-ткі ў душы, у сэрцы неяк насьцярожанасьць была. Ну і што мы атрымалі? У Менску значнае — учора ў два разы — зьніжэньне пнэўманіяў. У два разы! І я ўчора перахрысьціўся: дай Бог, каб мы і далей так па пнэўманіям прайшлі».
Адзін зь лекараў выказаў Свабодзе такую здагадку: Лукашэнку маглі даць няпоўную статыстыку па асобных днях па адным зь відаў пнэўманіяў — напрыклад, выключыць са статыстыкі вірусную пнэўманію. Зьніжэньне захворвальнасьці па ўсіх пнэўманіях ён лічыць сумнеўным.
Ілан Маск адкрыў завод Tesla ў Каліфорніі, парушыўшы карантын мясцовых уладаў
Генэральны дырэктар кампаніі Tesla Ілона Маск ігнаруе распараджэньня ўладаў Каліфорніі, закліканыя спыніць пашырэньне каранавірусу, заручыўшыся падтрымкай прэзыдэнта Дональда Трампа.
Каліфарнійскі завод Tesla адкрыўся ў панядзелак, нягледзячы на тое, што ўлады штату могуць арыштаваць Маска за непадпарадкаваньне ўказу аб спыненьні дзейнасьці ў сувязі з пагрозай распаўсюду каранавірусу.
«Выпісваюць з пнэўманіяй пасьля двух адмоўных тэстаў на каранавірус» — унікальны дзёньнік пра 33 дні змаганьня з COVID-19
33-гадовы мянчук Ільля Вайстраценка 33 дні хварэў на каранавірусную інфэкцыю — больш за тыдзень дома, 25 дзён у шпіталях. Некалькі дзён таму яго выпісалі — з адмоўным тэстам на каранавірус, але ўсё яшчэ з двухбаковым запаленьнем лёгкіх.
Ільля вёў дзёньнік і дэталёва дакумэнтаваў усе, што зь ім адбывалася падчас хваробы з 5 красавіка да 8 траўня — дома, у 2 і 3 шпіталях Менску, у Рэспубліканскім шпіталі мэдычнай рэабілітацыі ў Аксакаўшчыне. Са Свабодай ён падзяліўся сваім досьведам змаганьня з каранавірусам. Ільля заклікае COVID-дысыдэнтаў ставіцца да гэтай пагрозы сурʼёзна і дзякуе дактарам за гераічную працу на «каранавірусным канвэеры».
Лічбы на раніцу 12 траўня
- У сьвеце зафіксавалі звыш 4,34 мільёна выпадкаў COVID-19: амаль 1,41 млн у ЗША, 269,5 тысячы ў Гішпаніі, 232 тысячы ў Расеі, 226 тысяч у Вялікай Брытаніі, амаль 221 тысяча ў Італіі, 178 тысяч у Францыі, 178 тысяч у Бразыліі, 173 тысячы ў Нямеччыне, 141,5 тысячы ў Турэччыне, звыш 110,5 тысячы ў Іране.
- Ад хваробаў, якія выклікаў новы каранавірус, у сьвеце прызналі сьмерці 292 893 чалавек. Зь іх 83 425 у ЗША, 32 692 у Вялікай Брытаніі, 30 911 у Італіі, 26 991 у Францыі, 26 920 у Гішпаніі.
- Выпісалі 1,6 мільёна пацыентаў, якія паправіліся ад COVID-19. «Актыўных выпадкаў» хваробы застаецца 2,44 млн, зь іх 46,3 тысячы ў цяжкім ці крытычным стане.
«Сказалі піць ангрымакс і адправілі дахаты». Жыхар Гомля памёр ад каранавірусу
11 траўня ў рэанімацыі першага гарадзкога шпіталя Гомля памёр 56-гадовы Анатоль. Ён адчуваў сябе кепска ад 21 красавіка. «З паліклінікі адправілі дахаты, сказалі піць ангрымакс. Выклікалі хуткую — тыя абураліся», — кажа яго грамадзянская жонка Алена.
Усебеларускі Кангрэс за незалежнасьць зноў перанесьлі з прычыны каранавірусу
Прадстаўнікі дэмакратычных партыяў, рухаў і грамадзянскіх ініцыятываў, якія арганізуюць Усебеларускі кангрэс за незалежнасьць, 12 траўня заявілі пра перанос мерапрыемства «на больш позьні тэрмін». Кангрэс пераносіцца ўжо другі раз, новая дата пакуль не называецца. Першапачаткова кангрэс плянавалі правесьці 15 сакавіка, але 13 сакавіка збор перанесьлі на 19 траўня.
У блогера Кабанава выявілі каранавірус, яго калега Пятрухін з ізалятара таксама трапіў у шпіталь
Блогеры Аляксандар Кабанаў і Сяргей Пятрухін цяпер знаходзяцца ў Берасьцейскай цэнтральнай гарадзкой бальніцы.
Аляксандар Кабанаў трапіў туды 9 траўня пасьля таго, як сам выклікаў хуткую дапамогу, бо дрэнна сябе адчуваў. Сяргей Пятрухін трапіў пасьля суда 11 траўня ў Берасьці, па выніках якога судзьдзя Дзьмітры Куроўскі прысудзіў Пятрухіну 15 сутак арышту, паведамляе БАЖ.
Авіярэйсы пасьля пандэміі: чатыры гадзіны ў аэрапорце, онлайн-рэгістрацыя, дэзынфэкцыя, пасьведчаньне аб імунітэце?
Наколькі могуць зьмяніцца правілы пасажырскіх пералётаў, калі пандэмія каранавірусу пойдзе на спад і аэрапорты зноў адкрыюцца для камэрцыйнага авіяруху? Выданьне Forbes паспрабавала спрагназаваць асноўныя зьмены, якія чакаюць пасажыраў авіяліній у «посткаранавірусны» час.
Паводле экспэртнай ацэнкі, увесь працэс рэгістрацыі пасажыраў на лётнішчы можа заняць да чатырох гадзін, з увагі на захады сацыяльнага дыстанцыяваньня, дэзынфэкцыі пасажыраў і багажу, даўжэйшыя і павальнейшыя чэргі ды даўжэйшае чаканьне пасадкі.
Паводле Forbes, новыя стандарты і правілы бясьпекі пасажырскіх авіяпералётаў могуць уключаць у сябе забарону забіраць ручны багаж на борт самалёта, абавязак насіць маскі і пальчаткі падчас палёту, самастойную рэгістрацыю на рэйс для ўсіх пасажыраў, пасьведчаньне аб імунізацыі ад каранавірусу (пасьведчаньне аб вакцынацыі — пасьля таго як будзе створана вакцына), тэставаньне крыві на лётнішчы і дэзынфэкцыйныя тунэлі для багажу. Цалкам чытайце тут.
Кіраўнік Сусьветнай арганізацыі здароўя патэлефанаваў Лукашэнку
Генэральны дырэктар Сусьветнай арганізацыі здароўя (WHO) Тэдрас Аданом Гебрэесус 12 траўня паразмаўляў па тэлефоне з Аляксандрам Лукашэнкам. Кіраўнік WHO прасіў расказаць аб абстаноўцы ў Беларусі і пацікавіўся, якая падтрымка патрэбная краіне ад яго арганізацыі. Падрабязнасьці чытайце па спасылцы.
Лёндан да кастрычніка будзе плаціць па 2,5 тысячы фунтаў адпраўленым у адпачынкі праз COVID-19
Вялікабрытанія падоўжыць да кастрычніка меры падтрымкі людзей, вымушана адпраўленых у водпуску ў сувязі з эпідэміяй COVID-19, паведаміў у аўторак канцлер брытанскага казначэйства Рышы Сунак.
Паводле яго слоў, людзі, вымушана адпраўленыя ў адпачынкі, працягнуць атрымліваць 80% заработнай платы да 2,5 тыс. фунтаў стэрлінгаў.
У той жа час Сунак адзначыў, што ўрад зьвернецца да кампаніям з заклікам падзяліць выдаткі на рэалізацыю гэтых мер са жніўня.
Па дадзеных BBC, цяпер ад гэтых мер залежыць дабрабыт прыкладна 7,5 млн чалавек, а іх рэалізацыя абыходзіцца брытанскім уладам у 14 млрд фунтаў стэрлінгаў штомесяц.
«2 месяцы былі ў самаізаляцыі». Бабруйскіх гімназістаў прымушаюць прыйсьці на заняткі па дапрызыўнай падрыхтоўцы
У рэдакцыю Свабоды зьвярнуліся вучні бабруйскай гімназіі № 3. Паводле іх, яны ўжо два месяцы навучаюцца дыстанцыйна, няшмат дзяцей вучацца офлайн. Але з 11 траўня вучняў прымусілі пайсьці ў школу на заняткі па мэдычнай і дапрызыўнай падрыхтоўцы — пад пагрозай неатэстацыі за год па ўсіх прадметах.
«І гэта чамусьці ніяк нельга зрабіць дыстанцыйна, абавязкова павінны ўсе быць», — кажуць вучні. У іхнай гімназіі на заняткі па мэдычнай і дапрызыўнай падрыхтоўцы выдзяляецца адзін тыдзень. Вучні дадаюць, што «не для гэтага сядзелі 2 месяцы на самаізаляцыі, каб потым прыйсьці ў клясу, дзе будзе шмат людзей». Цалкам чытайце па спасылцы>>
У красавіку на Віцебшчыне 5 тысяч чалавек перанесьлі вірусныя пнэўманіі
5 тысяч чалавек у красавіку перанесьлі вірусныя пнэўманіі, паведаміў газэце «Віцьбічы» начальнік галоўнага ўпраўленьня па ахове здароўя аблвыканкаму Міхаіл Вішнявецкі. Цяпер для іх арганізуюць 10-12-дзённую рэабілітацыю ў санаторыі «Чыгуначнік» (для тых, хто захоча, але ў санаторыі 219 ложкаў). Санаторый «Летцы», які ў пік эпідэміі задзейнічалі пад гэтыя мэты, цяпер вызвалілі ад далечваньня пнэўманій.
Паводле Вішнявецкага, 20% мэдработнікаў, якія былі інфікаваныя каранавірусам, выздаравелі, у тым ліку і ад пнэўманіі, і прыступілі да працы.
У сувязі з каранавірусам колькасьць вакансій у Беларусі з пачатку 2020 году скарацілася на 14%
У Беларусі на фоне распаўсюджваньня каранавірусу скарачаецца колькасьць вакансій, паведаміла міністарка працы і сацыяльнай абароны Ірына Касьцевіч падчас нарады з Лукашэнкам. Паводле яе, цяпер на рынку працы «назіраюцца асобныя нэгатыўныя моманты», у тым ліку скарачаецца колькасьць вакансій. Стаў скарачацца попыт з боку працадаўцаў, а колькасьць людзей, якія сталі зьвяртацца ў службу занятасьці з просьбай дапамагчы знайсьці працу, павялічылася. Цалкам чытайце па спасылцы.
Мінздароўя Беларусі паведаміла пра 7 памерлых ад каранавірусу за суткі. Гэта рэкорд
Міністэрства аховы здароўя Беларусі апублікавала 12 траўня ў сваім Telegram-канале новую афіцыйную статыстыку распаўсюду COVID-19.
Паводле міністэрства, на 12 траўня:
- агулам 24873 чалавекі са станоўчым тэстам на COVID-19 (у іх лік уваходзяць ачунялыя і памерлыя);
- 142 памерлыя, зь якіх усе, як піша міністэрства, былі «з шэрагам хранічных захворваньняў» і каранавіруснай інфэкцыяй (родзічы некаторых памерлых кажуць, гэта ня так — паміралі і без хранічных хваробаў);
- 6974 пацыенты паправіліся і выпісаныя пасьля COVID-19;
- Гэта значыць, за дзень выявілі яшчэ 967 выпадкаў і прызналі яшчэ 7 сьмерцяў, выпісалі 443 чалавекі;
- ад пачатку эпідэміі ў краіне зрабілі 284 445 тэстаў (плюс 10 385 за дзень), цяпер тэсты праводзяць у 38 лябараторыях, таксама ва ўсіх рэгіёнах наладзілі правядзеньне экспрэс-тэстаў на антыцелы да SARS-CoV-2 для выяўленьня тых, хто ўжо перахварэў.
З прычыны пандэміі ў заходніх краінах зьніжаецца злачыннасьць. А што ў Беларусі?
У Нью-Ёрку злачыннасьць зьнізілася на 12% у сакавіку ў параўнаньні зь лютым, у Лос-Анджэлесе — на траціну.
Свабода паглядзела, што адбываецца са злачыннасьцю ў Беларусі на фоне пандэміі і ці вырасла ў нас колькасьць выпадкаў хатняга гвалту, як у іншых краінах сьвету пасьля ўвядзеньня карантыну. Чытайце па спасылцы>>
Ва Ўхані правядуць масавыя тэсты на каранавірус
У Кітаі ўлады гораду Ўхань, адкуль у канцы мінулага году пачаў пашырацца новы каранавірус, які выклікае COVID-19, правядуць масавае тэставаньне ўсіх жыхароў, піша Reuters са спасылкай на дакумэнт гарадзкіх уладаў і свае крыніцы. Аналізы з выкарыстаньнем нуклеінавых кіслот будуць рабіць на працягу 10 дзён. Падрабязнасьці тут.
«Усе адказваюць галавой». Лукашэнка сабраў урад і «ўзяў на кантроль» сытуацыю з каранавірусам
Аляксандар Лукашэнка падчас нарады 12 траўня заявіў, што ў цяперашніх эпідэміялягічных умовах галоўнае не статыстыка колькасьці хворых, а ўратаваньне жыцьця людзей.
«Хачу катэгарычна папярэдзіць: галавой усе адказваюць за сьмяротнасьць насельніцтва. Усе гэтыя паказьнікі — ковідныя і нават пнэўманійныя — пройдуць, усё забудуць. А вось людзі, якія загінулі, якіх мы ня выратавалі, — гэта застанецца. Жалезна трэба патрабаваць ад Міністэрства аховы здароўя і лекараў захаваньня жыцьця людзей. Я пра гэта ў храме нядаўна казаў, і я гэта бяру на сур’ёзны кантроль», — заявіў Лукашэнка. Усе заявы з нарады чытайце па спасылцы >>
У Расеі працягваецца вялікі прырост заражэньняў каранавірусам
Па стане на раніцу 12 траўня ў Расеі зарэгістравалі 232 243 выпадкі хваробы, у тым ліку 10 899 выпадкаў за мінулыя суткі. Ад пачатку эпідэміі COVID-19 у Расеі памерлі 2116 чалавек, у тым ліку 107 чалавек за мінулыя суткі. Большы прырост інфікаваных за дзень быў толькі ў ЗША і Гішпаніі.