Афіцыйна 440 інфікаваных у Беларусі, падоўжылі вакацыі, больш за 1000 ахвяраў COVID-19 у Францыі. Вынікі 4 красавіка
- На вечар 4 красавіка ў сьвеце зафіксавалі больш за 1,182 мільёна выпадкаў COVID-19. Ад хваробаў, якія выклікаў каранавірус, памерлі звыш 63 925 чалавек. Выпісалі больш за 244 тысячы пацыентаў.
- У Беларусі, паводле афіцыйных зьвестак, выяўлены 440 выпадкаў COVID-19, памерла 5 чалавек.
- Як паведаміла Міністэрства адукацыі Рэспублікі Беларусь, тэрміны вясновых канікул працягваецца на 6 дзён з 6 па 11 красавіка ўключна.
- Міністэрства спорту рэкамэндавала спыніць спартовыя мерапрыемствы з удзелам дзяцей і падлеткаў.
- Віцебскія ўлады перайшлі на дыстанцыйны прыём грамадзянаў. Цяпер людзям замест асабістага прыёму прапануюць запісвацца на тэлефонны прыём.
- На Магілёўшчыне прызнаныя 4 выпадкі захворваньня на каранавірус.
- У Францыі праз эпідэмію каранавірусу з турмаў вызвалілі больш як 6 тысяч чалавек. За суткі праз COVID-19 там памерлі 1053 чалавекі.
«Шмат хто хайпуе на гэтай тэме». Мылавар пра падзеньне продажаў і лепшае мыла ў час пандэміі
Мянчанка Ганна Дундукова 7 гадоў вырабляе мыла «хэнд-мэйд». Яна расказвае, чым найлепш мыць рукі падчас пандэміі каранавірусу, як на тэме хайпяць мылавары і чаму яна сама ўпершыню сутыкнулася з адсутнасьцю замоваў тады, калі мыла нібыта трэба ўсім. Чытайце тут >>
Улады вызначылі, як аплочваць працу тых, хто праз каранавірус затрымаўся за мяжой ці сядзіць у самаізаляцыі
Паводле пастановы Савету Міністраў № 194, калі работнік ня можа вярнуцца ў Беларусь са службовай камандзіроўкі ў краіну, дзе рэгіструюцца выпадкі заражэньня каранавірусам, тэрмін яго службовай камандзіроўкі падаўжаецца да дня прыбыцьця ў Беларусь (уключна). За імі мусяць захавацца месца працы і пасада, а таксама пакрываюцца выдаткі ў камандзіроўцы ў адпаведнасьці з заканадаўствам.
А што з самаізаляцыяй?
З дня падаўжэньня службовай камандзіроўкі да прыбыцьця ў Беларусь, а таксама пры немагчымасьці выконваць працу па працоўнай дамове падчас самаізаляцыі па прыезьдзе ў Беларусь работнікам павінны выплачваць заробак (грашовае забесьпячэньне) у памеры не ніжэй за дзьве траціны ўстаноўленай ім тарыфнай стаўкі (ці тарыфнага акладу, акладу, калі іншае ня вызначана калектыўнай дамовай, пагадненьнем і іншым лякальным прававым актам арганізацыі).
Парушальнікаў самаізаляцыі могуць прымусова шпіталізаваць
Калі той, хто мусіў самаізалявацца, адсутнічае па месцы рэгістрацыі або знаходжаньня, ці парушае правілы самаізаляцыі, цэнтры гігіены і эпідэміялёгіі разам з МУС будуць шукаць чалавека, а таксама на працягу дня мусяць разгледзець пытаньне аб прымяненьні спэцыяльных мер, якія прадугледжаныя законам аб папярэджаньні распаўсюджваньня захворваньняў, якія ўяўляюць небясьпеку для здароўя насельніцтва. У прыватнасьці, артыкулам 14 дадзенага закону прадугледжаная прымусовая шпіталізацыя і лекаваньне. Падрабязнасьці чытайце тут >>
«Бацька памёр, мы з маці пагадзіліся на экспэрымэнтальнае лячэньне». Чарговая ахвяра каранавірусу ў Менску — мужчына 69 гадоў
4 красавіка а 20.00 у менскай інфэкцыйнай бальніцы памёр 69-гадовы былы супрацоўнік Нацыянальнага банку Юры Осіпаў. У яго была пнэўманія, выкліканая вірусам COVID-19.
У гэтай жа ўстанове ляжаць з аналягічным дыягназам дачка і жонка мужчыны. Свабода пагаварыла з дачкой Юрыя Ганнай.
«Мы з маці ляжым у адной двухмеснай палаце, бацька — у іншай. Учора пазванілі зь міліцыі, сказалі, што бацькі больш няма. Як хаваць — не ўяўляю, мы з мамай у цяжкім стане, станоўчай дынамікі няма, пагадзіліся на экспэрымэнтальнае лячэньне прэпаратамі, якімі лечаць малярыю. Добра, што ў бацькі шмат сяброў, пахаваньнем яны будуць займацца», — апавядае Ганна. Гісторыю цалкам чытайце тут >>
У Маскве за суткі каранавірус выявілі ў 536 чалавек, агулам у Расеі ўжо 5389 хворых
У Маскве за апошнія суткі пацьвердзіўся ў 536 чалавек, піша «Інтэрфакс» са спасылкай на сталічны Расспажыўнагляд. За ўвесь час ад пачатку пандэміі захварэлі 3893 масквічоў.
Па стане на 5 красавіка агулам па Расеі пацьверджана 658 новых выпадкаў каранавіруснай інфэкцыі, агульная колькасьць хворых ад пачатку распаўсюду каранавірусу — 5389 чалавек, паведаміў апэратыўны штаб па барацьбе з каранавірусам. Памерлі за ўвесь час 45 чалавек, выздаравелі 355 чалавек.
За апошнія суткі ў Віцебскай вобласьці зарэгістравалі 5 новых выпадкаў каранавірусу
За мінулыя суткі ў Віцебскай вобласьці зарэгістравалі 5 новых выпадкаў каранавірусу, паведаміў старшыня Віцебскага аблвыканкаму Мікалай Шарсьнёў на пасяджэньне абласнога штабу па барацьбе з распаўсюджваньнем COVID-19, піша гарадзкі сайт «Віцьбічы». Паводле Шарсьнёва, за мінулыя суткі памерлых ад COVID-19 няма.
Беларуская чыгунка адмяніла цягнікі на Маскву і Санкт-Пецярбург з 5 красавіка
Курсіраваньне цягнікоў № 2 /1 Менск-Масква і № 52 /51 Берасьце — Менск — Санкт-Пецярбург адмяняецца з 5 красавіка, паведамілі БелТА ў Беларускай чыгунцы.
Нявыкарыстаныя квіткі на адмененыя цягнікі можна будзе вярнуць у білетных касах без дадатковых плат і збораў, тэрміны вяртаньня не абмежаваныя. 5 красавіка цягнік № 52 пройдзе па маршруце Берасьце-Віцебск, удакладнілі ў БЧ.
З 23 сакавіка БЧ часова адмяніла ўсе цягнікі на Маскву і Санкт-Пецярбург за выключэньнем двух.
Сотні студэнтаў мэдунівэрсытэту зачынілі ў інтэрнаце — там пацьвердзілі выпадак каранавірусу
Студэнты застануцца на карантыне ў інтэрнаце прынамсі на 14 дзён. Ежу ім перадаюць сваякі. Заняткі будуць праходзіць праз skype і zoom. Выйсьці з інтэрнату цяпер немагчыма, нават у краму. Ежу студэнтам могуць перадаць сваякі і знаёмыя. Падрабязнасьці тут>>
У Беларусі пацьвердзілі 562 выпадкі каранавірусу і 8 сьмерцяў
Міністэрства аховы здароўя Беларусі 5 красавіка апублікавала сьвежую статыстыку пацьверджаных выпадкаў заражэньня каранавірусам у краіне.
У Беларусі па стане на 5 красавіка:
- на стацыянарным лячэньні з каранавіруснай інфэкцыяй знаходзяцца 502 чалавекі,
- пасьля праходжаньня лячэньня ачунялі 52 чалавекі,
- зарэгістравана 8 выпадкаў сьмерці пацыентаў.
Такім чынам, агулам у Беларусі па стане на 5 красавіка пацьверджаныя 562 выпадкі каранавірусу.
«Белпошта» спыняе паслугі прымеркі і частковага выкупу адпраўленьня
«Белпошта» часова спыняе паслугі прымеркі і атрыманьня часткі адпраўленьняў (частковы выкуп) у хаце, у офісе і ў аб’ектах паштовай сувязі, дзе ўсталяваныя кабінкі для прымеркі. Гэтыя сэрвісы існуюць у межах пакетаў паслуг E-commerce і E-commerce MAX.
Такія захады прымаюцца, каб мінімізаваць час кантакту атрымальнікаў паштовых адпраўленьняў з супрацоўнікамі «Белпошты».
У сьвеце ўжо больш за 1,2 мільёну выпадкаў заражэньня каранавірусам, але тэмп распаўсюду зьменшыўся
Колькасьць выяўленых выпадкаў заражэньня каранавірусам у сьвеце да сярэдзіны дня 5 красавіка перавысіла 1 мільён 200 тысяч, колькасьць памерлых з прычыны каранавіруснай інфэкцыі – 65 тысяч. Ачунялі больш за 250 тысяч чалавек.
За мінулыя суткі было зафіксавана больш за 80 тысяч новых выпадкаў інфікаваньня, гэта менш, чым 3 красавіка, калі іх было больш за 100 тысяч. Памерлі за 4 красавіка больш як 5800 чалавек.
«Баімся, але ідзем». Горадня адзначае Вербніцу падчас пандэміі. ФОТА
Вернікі ўдзельнічаюць у богаслужэньні праз інтэрнэт, а гандляры ўпрыгожаных галінак губляюць заробак, на які працавалі цэлы год.
Як Горадня адзначае Вербную нядзелю ва ўмовах пандэміі — у рэпартажы Свабоды.
Папа Францішак: падумайце не пра тое, чаго вам не хапае, але пра дабро, якое можаце зрабіць іншым
Папа Францішак, які піша агенцтва Reuters, адзначаў сюррэалістычную Вербную нядзелю ў пустой базыліцы Сьвятога Пятра ў Рыме. Гэтак незвычайна ў католікаў пачаўся Вялікі тыдзень. Падчас казаньня Папа заклікаў людзей ва ўмовах пандэміі каранавірусу падумаць пра тое, як можна дапамагчы аблегчыць пакуты іншых.
Ва ўкраінскім Дняпры выкапалі магілы для магчымых ахвяр каранавірусу. ВІДЭА
Гэтак улады хочуць паказаць жыхарам, як важна выконваць карантын. У горадзе ўжо шэсьць выпадкаў заражэньня COVID-19, але насельніцтва пакуль не ўспрымае пагрозу ўсур’ёз: ня носіць масак і не сядзіць дома.
У Расеі вырашылі падлічыць жыхароў краіны, якія маюць імунітэт да каранавірусу
«Расспажыўнагляд» мае намер правесьці дасьледаваньне на колькасьць грамадзян краіны, якія ўжо атрымалі імунітэт да каранавірусу. Пра гэтую заяву кіраўніцы ведамства Ганны Паповай інфармуе Інтэрфакс.
У Нью-Ёрку першы раз адбылося падзеньне сьмяротнасьці ад каранавірусу ў параўнаньні з папярэднім днём
У штаце Нью-Ёрк у нядзелю, 5 красавіка, зафіксавана першае падзеньне сьмяротнасьці ад каранавірусу, заявіў губэрнатар штату Эндру Куома, выступаючы перад журналістамі.
Кіеў: мітрапаліт, які заклікаў людзей не баяцца інфэкцыі і хадзіць у храмы, захварэў на каранавірус
Лекары дыягнаставалі COVID-19 у намесьніка Кіева-Пячэрскай лаўры мітрапаліта Паўла (Лебедзя). Пра гэта 5 красавіка паведаміў царкоўны партал «Рэлігійная праўда» са спасылкай на свае крыніцы ў асяродзьдзі мітрапаліта.
Праблемныя тэсты і схаваныя пераносчыкі. Статыстыка каранавірусу ў кантэксьце
Ад пачатку пандэміі каранавірусу, які выклікае хваробу COVID-19, розныя дзяржавы вядуць статыстыку заражэньня. Паводле дадзеных інстытуту Джонса Гопкінса ў ЗША, ва ўсім сьвеце пацьвердзілі больш за 1,2 млн дыягназаў.
Але эпідэміёлягі лічаць, што гэтыя лічбы могуць не адлюстроўваць рэальнасьці, у першую чаргу праз досыць нізкі ўзровень тэставаньня. Яшчэ адна прычына – некаторыя ўрады наўмысна скажаюць статыстыку і недаацэньваюць сур'ёзнасьць праблемы ў сваіх краінах.
Лічбы на раніцу 6 красавіка
- У сьвеце зафіксавалі больш за 1,274 мільёна выпадкаў COVID-19: амаль 337 тысяч у ЗША, звыш 131 тысячы ў Гішпаніі, 129 тысяч у Італіі, 100 тысяч у Нямеччыне, 93 тысячы ў Францыі, звыш 82 тысяч у Кітаі, 58 тысяч у Іране, амаль 48 тысяч у Вялікай Брытаніі, 27 тысяч у Турэччыне, 21 тысячу ў Швайцарыі.
- Ад хваробаў, якія выклікаў новы каранавірус, у сьвеце памёр 69 471 чалавек. Зь іх 15 887 у Італіі, 12 641 у Гішпаніі, 9618 у ЗША, 8078 у Францыі, 4934 у Вялікай Брытаніі, 3603 у Іране, 3335 у Кітаі.
- Выпісалі амаль 265 тысяч пацыентаў, якія паправіліся ад COVID-19. «Актыўных выпадкаў» хваробы застаецца 939 тысяч, зь іх каля 46 тысяч чалавек у цяжкім стане.
- У Беларусі, паводле афіцыйных зьвестак на раніцу 5 красавіка, выявілі 562 выпадкі COVID-19, памерлі 8 чалавек. Лекары ананімна заяўляюць, што ня ўсім хворым ставяць адпаведны дыягназ.
Шпіталізавалі хворага на COVID-19 прэм’ера Брытаніі
Джонсан шпіталізаваны для плянавых тэстаў і мае застацца ў лякарні Сэнт-Томас у Лёндане толькі на адну ноч.
55-гадовы Борыс Джонсан паведаміў, што заразіўся COVID-19, у відэазвароце 27 сакавіка. У мінулую пятніцу, 3 красавіка, ён расказваў, што сымптомы ў яго засталіся празь 10 дзён па выяўленьні вірусу, але ён працягвае працу ў самаізаляцыі — у «прэм’ерскім» будынку ў Лёндане, на Даўнінг-стрыт, 10.
Нявеста Джонсана Кэры Саймандз расказвала 4 красавіка, што застаецца дома, бо мае сымптомы каранавірусу, але пакуль ня бачыць патрэбы праходзіць тэст. Яна сама адзначала, што яе турбуе тое, што яна хварэе падчас цяжарнасьці.
Тым часам каралева Вялікай Брытаніі Лізавета ІІ чацьвёрты раз за час на пасадзе зачытала экстраны зварот да нацыі. 5 красавіка яна заклікала брытанцаў да самадысцыпліны і рашучасьці ў час пандэміі, а таксама паабяцала, што «лепшыя дні вернуцца».
Вялікая Брытанія цяпер на 8-м месцы ў сьвеце ў колькасьці выпадкаў COVID-19 (47,8 тысячы) і на 5-м у колькасьці сьмерцяў (4934), распаўсюд вірусу працягвае паскарацца. Але колькасьць выпадкаў на душу насельніцтва там цяпер утрая меншая за Італію і на траціну меншая за ЗША.