Як напісаў у «Тэлеграме» кіраўнік Чачні Рамзан Кадыраў, у спаборніцтвах узялі ўдзел каля 400 сілавікоў з Расеі, Беларусі і Кувэйта. Удзельнікі выконвалі задачы, набліжаныя да ўмоў рэальнага бою, у тым ліку стральбу, аказаньне мэдычнай дапамогі і тактычныя дзеяньні ў розных умовах.
Па выніках асноўнага заліку, беларуская каманда апярэдзіла байцоў з расейскіх падразьдзяленьняў са Смаленску і акупаванай Хэрсонскай вобласьці, якія занялі другое і трэцяе месцы адпаведна.
Менскія амапаўцы перамаглі на гэтых спаборніцтвах другі год запар, адзначыла прэсавая служба МУС Беларусі.
Пераможцаў узнагароджваў 17-гадовы сын Рамзана Кадырава Адам. Як паведаміў кіраўнік Чачні, Адаму Кадыраву там жа ўручылі мэдаль «Абаронца Чачэнскай Рэспублікі». Гэтая ўзнагарода прысуджаецца за «асабістую мужнасьць і адвагу» ў сытуацыях з рызыкай для жыцьця.
Адам Кадыраў ужо мае як мінімум 17 узнагарод, у тым ліку найвышэйшую ў Чачні — Ордэн Кадырава, а таксама званьне Героя Чачэнскай Рэспублікі.
Акрамя гэтага, ён займае шмат пасад, сярод якіх —
- начальнік аддзела бясьпекі кіраўніка Чачні,
- куратар МУС Чачні,
- куратар Расейскага ўнівэрсытэту спэцназу імя Пуціна,
- куратар чачэнскага батальёна, які ваюе ва Ўкраіне.
Форум