Больш гадзінаў фізычнай культуры ў школе
У 2025/26 навучальным годзе мяняецца школьная праграма. Адна з асноўных яе навінак — дадатковы ўрок фізычнай культуры: цяпер іх будзе тры замест ранейшых двух ува ўсіх клясах — зь першага па адзінаццаты. Адны заняткі на тыдзень будуць гульнёвымі, без нарматываў. Вынятак толькі для вучняў з спэцыяльнай мэдычнай групы — яны будуць займацца фізычнай культурай, як і раней, двойчы на тыдзень.
Настаўнікі прадмету цяпер змогуць задаваць вучням хатняе заданьне, чаго раней не прадугледжвалася.
Пры гэтым у 10–11 клясах увядуць дыфэрэнцыяваны падыход: дзяўчаты і хлопцы будуць займацца двойчы на тыдзень асобна. Трэцяя навучальная гадзіна будзе агульнай.
«Асновы кіраваньня квадракоптэрам» ды іншыя новыя прадметы
У 10–11 клясах сярэдніх агульнаадукацыйных школаў уводзяць новы прадмет — «Гісторыя Беларусі ў кантэксьце сусьветнай гісторыі», які заменіць два ранейшыя — «Гісторыя Беларусі» і «Сусьветная гісторыя».
Навучаньне кіраваньню аўтамабілем уводзяць для вучняў 11-х клясаў вясковых школаў, спэцыялізаваных ліцэяў, сувораўскіх і кадэцкіх вучэльняў. Заняткі будуць праходзіць на базе школаў і арганізацыяў ДТСААФ. Улады спрабуюць стварыць стымул для працаўладкаваньня выпускнікоў у сельскай мясцовасьці і спрыяць рыхтаваньню іх да службы ўва Ўзброеных сілах.
Сама нашумелай навацыяй школьнай праграмы сёлета стаў прадмет «Асновы кіраваньня квадракоптэрам». Расейскае выданьне «Insider» апублікавала матэрыял пра тое, як у Расеі сотні тысяч школьнікаў уцягнулі ў праграмы стварэньня дронаў для вайсковых мэтаў Міністэрства абароны. Пачатак навучаньня школьнікаў кіраваць дронамі ў Беларусі — гэта і паўтарэньне расейскай ініцыятывы, і дэманстрацыя Лукашэнкам ляяльнасьці Пуціну, і рыхтаваньне да наступных крокаў, у тым ліку да ўцягваньня дзяцей у вайну, піша Белсат.
Навучальна-палявыя зборы для школьнікаў
Для дзясятых клясаў уводзяць абавязковыя навучальна-палявыя зборы цягам 10 дзён, з 26 траўня да 5 чэрвеня. Раней такое датычыла толькі навучэнцаў ваенізаваных навучальных установаў, цяпер — усіх звычайных агульнаадукацыйных школаў.
Праграма будзе разьлічаная на 60 вучэбных гадзін, у яе ўваходзяць тактычнае, фізычнае, вайскова-мэдычнае рыхтаваньне, аказаньне першай дапамогі, шыхтавае і агнявое рыхтаваньне, абарона ад зброі масавага паражэньня, вывучэньне агульнавайсковых статутаў. Зазначаюць, аднак, што, адрозна ад навучэнцаў кадэцкіх вучэльняў, звычайным школьнікам не абавязкова быць на зборах дзень і ноч.
Заняткі будуць праходзіць на базе найбліжэйшых да школаў вайсковых частак, вайсковых катэдраў ВНУ ці ў спэцыялізаваных цэнтрах дапрызыўнага рыхтаваньня.
Дадатковыя вакацыі
Для вучняў 1–2-х клясаў, а таксама вучняў 3-х клясаў з асаблівасьцямі псыхафізычнага разьвіцьця, будуць прадугледжаныя дадатковыя зімовыя канікулы ў трэцяй чвэрці — 7 дзён з 16 да 22 лютага.
Агулам графік вакацыяў выглядае наступным чынам:
Восеньскія — 8 дзён, з 2 да 9 лістапада ўключна.
Зімовыя — 14 дзён, з 25 сьнежня да 7 студзеня ўключна.
Веснавыя — 8 дзён, з 22 да 29 сакавіка ўключна.
Летнія — 92 дні, з 1 чэрвеня да 31 жніўня. Для 9-х класаў — 82 дні, з 11 чэрвеня да 31 жніўня. Для навучэнцаў некаторых спэцыялізаваных навучальных установаў — 87 дзён, з 6 чэрвеня да 31 жніўня.
Іншыя школьныя навацыі
З гэтага навучальнага году вучні, якія жывуць у Беларусі, абавязаныя вучыцца толькі ў беларускіх установах агульнай сярэдняй адукацыі. Дыстанцыйнае навучаньне ў замежных школах не дазваляецца.
Таксама з новага навучальнага году ўводзіцца забарона на карыстаньне мабльнымі прыладамі ў школах Беларусі. На час заняткаў вучні мусяць здаваць свае тэлефоны у замыканыя шафы ў асобным кабінэце.
Даражэюць платныя дарогі
З 1 верасьня ў Беларусі вырастуць тарыфы на праезд платнымі дарогамі. Яны ўведзеныя пастановай Міністэрства транспарту і камунікацыяў. Для аўтамабіляў з агульнай масай больш за 3,5 тоны тарыфы за кілямэтар вырастуць наступным чынам:
- з €0,114 да €0,117, калі ў машыны дзьве восі;
- з €0,142 да €0,146 — для грузавікоў з трыма восямі;
- з €0,171 да €0,176 — для транспарту, у якога чатыры і больш восяў.
Для электронных віньетак на 15 дзён застаецца ранейшы тарыф — €20. Тарыф на 30 дзён падаражэе з €31 да €32, а гадавы вырасьце з €107 да €110.
Таксама перагледзелі штрафы. Разавы тарыф штрафу за поўную неаплату для машын масай да 3,5 т захавалі на ўзроўні €14, а для цяжэйшых павлічылі з €36 да €37. Штраф за няпоўную аплату для грузавікоў вырас з €18 да €18,5.
Новыя правілы ўезду ў Латвію
1 верасьня зьмяняецца парадак уезду ў Латвію грамадзянаў трэціх краінаў, у тым ліку Беларусі. Паводле новых правілаў, каб прайсьці мяжу, іншаземец павінен загадзя запоўніць анкету на сайце eta.gov.lv і атрымаць адказ — дазвол ці адмову. На канец жніўня сайт не працуе.
Такая норма замацаваная папраўкамі ў «Закон аб іміграцыі», якія Саэйма Латвіі прыняла ў красавіку.
Анкету трэба падаваць не пазьней чым за 48 гадзінаў да паездкі. У ёй неабходна пазначыць наступныя зьвесткі:
- мэту паездкі (уезду); плянаваны тэрмін і месца знаходжаньня;
- маршрут паездкі;
- кантактную інфармацыю;
- выбарныя пасады, якія займае сам чалавек або ягоныя сваякі;
- удзел у выбарах у якасьці кандыдата;
- былы або дзейны статус дзяржаўнай ці муніцыпальнай службовай асобы;
- службу ўва Ўзброеных сілах, спэцслужбах і памежнай службе, мытні або ў органах унутраных справаў, юстыцыі ці замежных справаў (у тым ліку дыпляматычнай службы).
Калі пададзеная няпоўная або фальшывая інфармацыя, асобе будзе пагражаць адміністрацыйная адказнасьць.
Пасьля адпраўкі анкеты заяўніку на ўказаную электронную пошту прыйдзе адказ — дазвол або адмова ва ўездзе. Падаваць інфармацыю можна і раней, чым за два дні, але калі пляны мяняюцца, то зьвесткі трэба абнаўляць. Пры перасячэньні мяжы краіны транзытам дастаткова пазначыць толькі даступныя кантакты.
Новыя патрабаваньні датычаць усіх грамадзянаў трэціх краінаў, якія ня маюць дазволу на жыхарства ці візы Латвіі і ня ёсьць грамадзянамі адной з краінаў Эўразьвязу, краінаў NATO, адной з 38 краінаў Арганізацыі эканамічнай супрацы і разьвіцьця (АЭСР), Эўрапейскай эканамічнай зоны (ЕЭЗ), Швайцарыі ці Бразыліі. Гэта азначае, што пад дзеяньне закону трапляюць, у прыватнасьці, беларусы і ўкраінцы.
Новы спосаб сплаты штрафаў для безьбілетнікаў
Ужо з 1 верасьня заплаціць штраф можна будзе толькі безнаяўным разьлікам у сыстэме АРІП. Пра гэта выданьню «Смартпрэс» паведамілі ў «Менсктрансе».
Раней штраф можна было заплаціць гатоўкай непасрэдна ў аўтобусе, тралейбусе, трамваі кантралёрам.
На жнівень 2025 году штраф за безьбілетны праезд складае ад 0,5 да 1 базавай велічыні (Br21–42).
Форум