Таксама затрымалі дырэктара віцебскага прадпрыемства «Элект» Аляксандра Пілатава. Пра гэта «Люстэрку» паведамілі дзьве крыніцы.
На працы абодвух кіраўнікоў заявілі, што тыя ў адпачынках, але не змаглі ўдакладніць, калі тыя вернуцца. Асабісты нумар тэлефону Пілатава недаступны. На ягонай старонцы Vk.com і ў Viber-акаўнце пазначана, што ён ня быў онлайн з 31 ліпеня. Пасьля гэтага дня Пілатаў ня згадваўся ў сацыяльных сетках БелТІЗ і ў навінах на сайце прадпрыемства.
Таксама ў жніўні зьнік з Telegram-каналу БелТІЗ і Шэпель, які раней быў там частым героем публікацыяў.
Журналістка зьвярнулася ў арганізацыю БелТІЗ, якую ўзначальвае Алег Шэпель, на падставе запрашэньня на мерапрыемства. Там сказалі, што кіраўнік знаходзіцца ў адпачынку і ня можа размаўляць. Суразмоўніца таксама паведаміла, што на мерапрыемстве ў кастрычніку кіраўнік БелТІЗ «ня зможа прысутнічаць», бо «будзе заняты ў гэты час паводле графіку».
У Параалімпійскім камітэце заявілі, што Шэпель у адпачынку. Дату яго заканчэньня назваць ня здолелі.
«Люстэрка» таксама зьвярнулася на прадпрыемства «Элект», якім кіруе Аляксандр Пілатаў. Там заявілі, што дырэктар у адпачынку і ў ад’езьдзе, але не сказалі, калі вернецца.
Што вядома пра Шэпеля і Пілатава
На думку абедзьвюх крыніц, пытаньні сілавікоў да Шэпеля і Пілатава маглі быць зьвязаныя з іх прафэсійнай дзейнасьцю. Адзін з суразмоўцаў адзначыў:
«Цяпер зьявіліся шалёныя расейскія грошы, а „БелТІЗ“ ніколі не цураўся грошай, якімі б яны ні былі. Я думаю, жаданьне нейкім чынам іх дзяліць перасіліла ўсе меры асьцярожнасьці. Тое, што цяпер адбылося, на мой погляд, — гэта зусім эканамічныя матывы. І ўжо ніякія сувязі Алега Аляксандравіча тут не спрацавалі, раз гэта адбылося».
Алегу Шэпелю 58 гадоў. Ён пяць разоў перамагаў на Паралімпіядах у складзе савецкай і беларускай зборных, прычым у цалкам розных дысцыплінах: пяціборстве, скачках у даўжыню і вышыню (двойчы), бегу на 400 мэтраў. Чатыры разы быў бронзавым прызэрам.
З 2002 году Шэпель старшыня Цэнтральнага кіраўніцтва Таварыства інвалідаў у зроку («БелТІЗ»). З 2003 году былы атлет узначальвае Паралімпійскі камітэт Беларусі. Таксама Шэпель займаўся рэстаранным бізнэсам.
Шэпель — адзін з прыхільнікаў тэорыі, што «ва ўсім вінаватая Амэрыка». На Гульнях 2016 году ў Рыа-дэ-Жанэйру прыклаў руку да скандалу. Расейская зборная тады ў поўным складзе была адхіленая ад удзелу з-за допінгу, а прадстаўнік беларускай дэлегацыі, насуперак правілам, выйшаў на цырымонію адкрыцьця зь сьцягам краіны-суседкі. Шэпель постфактум заявіў, што гэта была не палітычная акцыя, а «жэст салідарнасьці».
Аляксандру Пілатаву 40 гадоў. Ён кіруе прадпрыемствам «Элект» пяць гадоў, на гэтай пасадзе ён зьмяніў свайго брата. Да гэтага Пілатаў працаваў на Віцебскім электратэхнічным прадпрыемстве. Летась Пілатаву надалі ганаровае званьне «Чалавек году Віцебшчыны» ў намінацыі «Сацыяльная сфэра, сацыяльная абарона насельніцтва, культура, адукацыя, навука, спорт, ахова здароўя, моладзь».
Прадпрыемства «Элект» месьціцца ў Віцебску і ўваходзіць у структуру «БелТІЗ».
Форум