Як паведаміў зьвязаны з прэс-службай Лукашэнкі Telegram-канал «Пул первого», яго сустракалі ў аэрапорце Цяньдзінь з чырвонай дарожкай, ганаровай вартай і танцамі ў нацыянальных касьцюмах, а віцэ-прэм’ер Мікалай Снапкоў, які да 2020 году быў паслом Беларусі ў Кітаі, павіншаваў яго зь днём народзінаў. На гэта Лукашэнка адказаў: «У нас такога сьвята няма».
Тым часам у двух сэрбскіх гарадах — Бялградзе і Нові-Садзе — зьявіліся білборды зь віншаваньнямі на адрас Лукашэнкі.
На віншаваньнях з народзінамі было напісана «Сэрбія цябе любіць». Яны былі падпісаны «Іван Івановіч — Кансэрватыўны рух «Нашы». У заяве руху гаворыцца, што Лукашэнка — «шчыры і вялікі сябар сэрбскага народу», і што Беларусь «заўсёды была побач» у самыя цяжкія для Сэрбіі моманты, паведаміла Сэрбская служба Радыё Свабода з спасылкай на інфармацыйнае агенцтва Beta.
Рух «Нашы» — гэта ультраправая афіцыйна незарэгістраваная арганізацыя. Яна адкрыта падтрымлівае расейскае ўварваньне ва Ўкраіну, выступае супраць эўрапейскай інтэграцыі Сэрбіі і выступае супраць мігрантаў і ЛГБТ. Летась у лютым прадстаўнікі руху абклеілі Бялград плякатамі з надпісам «Сэрбія з Лукашэнкам». У апошнія гады яны таксама разьмяшчалі плякаты ў падтрымку прэзыдэнта Расеі Ўладзіміра Пуціна, а таксама пагрозьлівыя плякаты, накіраваныя супраць некаторых апазыцыйных палітыкаў у Сэрбіі і супраць СМІ.
Кансэрватыўны рух «Нашы» паўстаў з Сэрбскага народнага руху «Нашы», таксама незарэгістраванай арганізацыі. У 2012 годзе пракуратура Сэрбіі ініцыявала яго забарону праз распальваньне нацыянальнай, рэлігійнай, расавай і сэксуальнай нянавісьці і дыскрымінацыі. Аднак Канстытуцыйны суд тады ацаніў, што ўмовы для забароны іх дзейнасьці не былі выкананыя.
Сэрбія выбарачна далучылася да санкцый супраць Беларусі, пры гэтым упарта адмаўляецца ўводзіць іх супраць Расеі за ўварваньне ва Ўкраіну.
Аляксандру Лукашэнку 30 жніўня споўніўся 71 год, зь іх 31 год ён знаходзіцца пры ўладзе на падставе зфальсыфікаваных вынікаў выбараў.
Форум