Колькасьць ахвяр расейскага ўдару па Кіеве вырасла да 23, паведаміў начальнік Кіеўскай гарадзкой ваеннай адміністрацыі Цімур Ткачэнка.
Сярод загінулых — чатыры дзіцяці. Пацярпелі 52 чалавекі.
Расейскае войска ў ноч на 28 жніўня нанесла масіраваны ўдар па Ўкраіне, у тым ліку па Кіеве. Паводле Ткачэнкі, пры ўдары выкарыстоўваліся бесьпілётнікі тыпу «Шахед», балістычныя і крылатыя ракеты. Патрапляньні былі зафіксаваныя больш чым у 20 лякацыях у Дарніцкім, Дняпроўскім, Саломенскім, Шаўчэнкаўскім, Галасееўскім, Абалонскім і Дзясьнянскім раёнах.
У Дзяржаўнай службе Ўкраіны па надзвычайных сытуацыях паведамілі, што ноччу ратавальнікі працавалі на месцах разбурэнняў, працягвалі разбор завалаў і пошукавыя работы. Псыхолагі ведамства аказалі дапамогу 147 жыхарам горада.
«Гэтыя расейскія ракеты і ўдарныя дроны зьяўляюцца дакладным адказам усім у сьвеце, хто тыднямі і месяцамі заклікаў да спыненьня агню і рэальнай дыпляматыі. Расея выбірае балістыку, а не стол перамоваў. Выбірае працягваць забойствы, а не заканчваць вайну. І гэта значыць, што Расея да да гэтага часу не баіцца наступстваў. Расея карыстаецца тым, што частка сьвету заплюшчвае вочы на забітых дзяцей і шукае апраўданьняў для Пуціна», — заявіў напярэдадні прэзыдэнт Украіны Ўладзімір Зяленскі.
У выніку атакі таксама былі пашкоджаныя будынкі офіса кіеўскага бюро Радыё Свабодная Эўропа/Радыё Свабода, выданьня «Украінская праўда» і місіі ЭЗ.
