Аб тым, што ён ваюе на баку Расеі, стала вядома ў красавіку, калі ўкраінскі дзяржаўны праект «Хачу жыць» апублікаваў прозьвішчы 742 грамадзян Беларусі, якія падпісалі кантракты з расейскай арміяй. Тады Аляксандар Паўлавіч Раманенка яшчэ быў жывы. 26 верасьня яму мела б споўніцца 28 гадоў.
Аб гібелі беларуса 25 жніўня паведаміў міжнародны праект «НЕ ЖДИ меня из Украины».
Згодна зь інфармацыяй ініцыятывы «Кібэрпартызаны», Аляксандар Раманенка нарадзіўся ў Мацькаўцах Вілейскага раёну Менскай вобласьці. Апошняе месца ягонай працы — прыватнае вытворча-гандлёвае ўнітарнае прадпрыемства «Котаў дрэў», якое займаецца расьпілоўваньнем, габляваньнем і насычэньнем драўніны.
У ініцыятыве былых сілавікоў BelPol Свабодзе паведамілі, што на яго міліцыя тройчы складала адміністрацыйныя пратаколы — у 2017, 2018 і 2021 гадох праз праблемы з алькаголем. Першы раз яго затрымалі п’яным на дарозе — ён знаходзіўся на праязной частцы ў цёмны час бяз флікераў, другі раз ён піў піва ў грамадзкім месцы і меў неахайны выгляд, а трэці раз яго затрымалі п’яным на чыгуначным вакзале ў Менску.
У праекце «НЕ ЖДИ меня из Украины» Свабодзе паведамілі, што Аляксандар Раманенка служыў у адным з падразьдзелаў 20 гвардзейскай агульнавайсковай арміі Расеі. Яе штаб знаходзіцца ў Варонежы, а асобныя падразьдзелы адразу ў некалькіх абласьцях — Варонескай, Курскай, Белгарадзкай, Смаленскай, Бранскай і Маскоўскай. Аднак не змаглі ўдакладніць, на якім кірунку фронту ён загінуў і калі.
Згодна з інфармацыяй Каардынацыйнага штабу, беларусаў актыўна пачалі вэрбаваць на службу ў расейскую армію з другога кварталу 2023 году. З таго часу колькасьць падпісаных з грамадзянамі Беларусі кантрактаў расьце.
Як і ўсе іншаземцы, грамадзяне Беларусі праходзяць праз адмысловыя пункты адбору на вайсковую службу. Найчасьцей у Маскве ці Падмаскоўі, а таксама ў Растове. Сярод «расейскіх» навабранцаў шмат колішніх зьняволеных.
З 742 грамадзян Беларусі, прозьвішчы якіх апублікавалі сёлета ў красавіку, 96 лічыліся загінулымі. У той жа час, як паведамлялі ва ўкраінскім дзяржаўным праекце «Хачу жыць», гэтыя лічбы грамадзян Беларусі, якія ваююць на баку Расеі, не канчатковыя. Яны могуць быць у некалькі разоў большыя.
Форум