Сьвятлана Ціханоўская сустрэлася зь міністрам замежных справаў Даніі Ларсам Лёке Расмусэнам, міністаркай у справах Эўропы Марые Б’ерэ і з Камітэтам замежнай палітыкі Фолькетынгу.
У сустрэчы 28 жніўня ў Капэнгагене з Марые Б’ерэ ўдзельнічалі таксама амбасадарка Даніі ў Літве Грэтэ Сылясэн і прадстаўнік у нацыянальным адраджэньні Аб’яднанага пераходнага кабінэту (АПК) Павал Баркоўскі, паведаміў АПК.
Нацыянальная культура і ідэнтычнасьць дапамагаюць беларусам «супрацьстаяць паглынаньню і асыміляцыі», гэтыя фактары адпавядаюць «патрэбам эўрапейскай бясьпекі», заявіў Павал Баркоўскі на сустрэчы з Бʼерэ.
«Удзел дацкай дыпляматыі можа стаць важным крокам у бок эўрапейскага выбару беларусаў», — цытуе Баркоўскага прэс-служба АПК.
Як паведамляецца, на сустрэчы прадстаўнік кабінэту падкрэсьліў «асаблівую ролю» гэтай скандынаўскай дзяржавы ў падтрыманьні беларускіх культурных і адукацыйных праграмаў на ўзроўні як МЗС, так і грамадзкіх структураў, такіх як Дацкі інстытут культуры.
Баркоўскі заклікаў Данію стаць «адвакатам большага падтрыманьня адукацыйных і культурных праектаў у рамках праграмы Ацэнкі патрэбаў грамадзянскай супольнасьці Эўракамісіі».
Ён прапанаваў лабіяваць удзел беларускіх арганізацыяў у праграме Creative Europe, што «адкрыла б магчымасьці для буйных культурных праектаў, асабліва ў кінавытворчасьці».
Бакі разгледзелі пытаньне падтрымкі беларусаў Даніяй у часе яе старшыняваньня ў Эўразьвязе (з 1 ліпеня да 31 сьнежня 2025 году).
29 жніўня Ціханоўская прыме ўдзел у нефармальнай сустрэчы міністраў замежных справаў ЭЗ у Капэнгагене.
Ціханоўская таксама возьме ўдзел у імпрэзе, арганізаванай газэтай Politiken і Дацкім таварыствам замежнай палітыкі, а таксама сустрэнецца з супрацоўнікамі Дацкага інстытуту супраць катаваньняў DIGNITY, які ўзначальвае Міжнародную плятформу адказнасьці за Беларусь (IAPB).
Форум