Лінкі ўнівэрсальнага доступу

У Емэне ізраільскім ударам забіты кіраўнік ураду хусітаў


Ізраільскі ўдар па сталіцы Емэну Сане. 24 жніўня 2025 году
Ізраільскі ўдар па сталіцы Емэну Сане. 24 жніўня 2025 году

У Емэне ў выніку ізраільскага ўдару забіты Ахмэд аль-Рагаві, прэмʼер-міністар ураду, створанага групоўкай «Ансар-Алаг» (емэнскімі хусітамі).

Пра гэта паведамляюць Erem News, емэнская газэта Адэн аль-Гад і расейскае агенцтва РИА Новости з спасылкай на свае крыніцы. Афіцыйна гэтая інфармацыя не пацьверджаная.

Паводле «Адэн аль-Гад», ізраільскія войскі ўдарылі па жылым доме ў сталіцы Емэну Сане, дзе, як мяркуецца, знаходзіўся аль-Рагаві. У выніку атакі загінулі ён і некалькі яго паплечнікаў.

Erem News сьцьвярджае, што, апроч Ахмэда аль-Рагаві, забітыя Абдульсалям аль-Манбахі, асабісты памочнік кіраўніка Найвышэйшай палітычнай рады хусітаў Махдзі аль-Машата, і Сахр аш-Шарджабі, кіраўнік апарату начальніка генэральнага штабу хусітаў.

Mako піша пра гібель міністра абароны Мухамада Насэра аль-Атыфі і начальніка генэральнага штабу хусітаў Мухамада аль-Гамары. Апошні, паводле зьвестак выданьня, фактычна кіруе ваеннай кампаніяй супраць Ізраілю.

Дым над месцам атакі па Сане 24 жніўня 2025
Дым над месцам атакі па Сане 24 жніўня 2025

Армія абароны Ізраілю (ЦАГАЛЬ) 28 жніўня заявіла аб «дакладным удары» па вайсковым абʼекце хусітаў у раёне Саны:

«ЦАГАЛЬ вядзе рашучую барацьбу з тэрарыстычным рэжымам хусітаў, адначасова ўзмацняючы ўдары па тэрарыстычнай арганізацыі ХАМАС у сэктары Газа, і будзе працягваць дзейнічаць, каб зьліквідаваць усякую пагрозу грамадзянам Ізраілю», — гаворыцца ў прэс-рэлізе.

Праіранская групоўка «Ансар-Алаг» (хусіты), якая кантралюе значную частку Емэну і валодае арсэналам балістычных ракет, абстрэльвае Ізраіль і судны ў Арабійскай затоцы й Чырвоным моры, патрабуючы спыненьня баявых дзеяньняў у сэктары Газа. Ізраіль у сваю чаргу наносіць удары ў адказ па цэлях у Емэне.

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.
Ігар Лосік Кацярына Андрэева Ірына Слаўнікава Марына Золатава
XS
SM
MD
LG