Як адзначаецца на афіцыйным сайце Ўзброеных сіл Літвы, «зубы цмока» усталявалі таксама і недалёка ад пунктаў пропуску, якія яшчэ працуюць.
«Усталяваныя бар'еры – гэта толькі частка вялікай інтэграванай карціны. Мы пачынаем з тактычнага ўзроўню – канкрэтных перашкод на мяжы, а пазьней абʼяднаем увесь інжынэрны сцэнар у адзіную канцэптуальную сыстэму», – сказаў камандуючы Узброенымі сіламі Літвы Раймундас Вайкшнорас.
Паводле яго, каля дзейных пунктаў пропуску перашкоды разьмясьцілі такім чынам, каб пры неабходнасьці іх можна было хутка перамясьціць на дарогі. Цяпер «зубы цмока» ужо ўсталявалі на дарогах пунктаў пропуску ў Шумску, Лаварышках, Райгорадзе і Латэжэры на мяжы зь Беларусьсю, і ў Раманішках – на мяжы з Расеяй.
Неўзабаве Ўзброеныя сілы Літвы супольна зь іншымі дзяржаўнымі ўстановамі правядуць дадатковую ацэнку іншых важных памежных раёнаў, дзе таксама будуць заплянаваныя так званыя «паркі контрамабільнасьці». Раней заяўлялі аб намеры стварыць 27 такіх паркаў контрамабільнасьці на межах Беларусі і Расеі.
Фармаваньне Балтыйскай лініі абароны адбываецца паводле падпісанага ў студзені 2024 году пагадненьня паміж міністэрствамі абароны Літвы, Латвіі і Эстоніі. Яе мэта – зьнізіць пагрозу наземнага ўварваньня з тэрыторыі Расеі і Беларусі, а таксама абмежаваць магчымыя дзеяньні варожых дзяржаў на сушы.
Краіны Балтыі прынялі рашэньне ўмацоўваць усходнюю мяжу на фоне мігранцкага крызісу і ў сьвятле патэнцыйных ваенных пагроз, якія паходзяць ад Масквы і Менску.
8 жніўня 2023 году Літва закрыла пункты пропуску Шумск (Лоша) і Цьверач (Відзы), 1 сакавіка 2024-га – Лаварышкі (Катлоўка) і Райгорад (Прывалка). На мяжы зь Беларусьсю працягваюць працаваць два памежныя пераходы – Меднікі (Каменны Лог) і Салечнікі (Беняконі).
Форум